21
Wei marana au murina Saul David i viḡaviei ma i ḡoei da ita viraḡeni. Saul natuna - Jonathan David i vibenabenamei ma David i ruba au dobu ḡela da Saul ita raugovaḡei.
Ahimelek David i voagui
1 ✡ Mrk 2:25-26David i nae au Nob da Pirisi pulo tauapuna Ahimelek ita inanai. Tauna ana rovona i opu da David i viegualauei, ma i riwa, “Aiwai aubaina u nei, ma am rava mepa?”
2 David pirisi Ahimelek i paribei i pa, “Gulau Saul nola tagogi aubaina i paritawaneu wate wenanare i riweu, ‘Eḡa aiai ina aramanei aiwai a kaukauei.’ Au sorodia a riwei da e paipainiu. 3 Awarim lam da uta vereu? Palawa apuapunana 5 ma vereu bo aiwai ḡelauna kampa.”
4 Wate pirisi i riwa, “Awariai eḡa palawa ota ita mamae, wate vovivirana Bada awarina. Wei palawana ma vaia mepa da am sorodia aupom biaḡa eḡa waivine maiteni ita viawawana.”
5 David i paribelei, Riwa kaua tauai eḡa waivine maiteni ata matamatave, maranai a opuopu ḡavia aubaina au nelara e ujiuji. Amadodo lamna gulau ana nola a kaukauei ma wei nolana aubaina a vokaukaua kaua. 6 Nai marana palawa waduboi i votawanaei ma palawa voui i terei Bada au naona au tempol. Kampa eḡa lam ḡelauna ita mamae ma pirisi palawa vovivirana David i verei.
Anina ma David rava i tama-naiei ma nai au dobuna i raugovaḡa nae ma i terei ai bada. Maranai Saul i nonori da pirisi ḡeḡetelarana Ahimelech David i voagui, Tauna pulo tauapui pirisi i vunu-pai ma Abiathar lawalawaina i voterei, ma tauna i ruba govaḡa da David awarina i ḡeta. Maranai dobuḡela ai sorodia Israel i viḡaviei, lamna David ana sorodia maiteni taui i viḡaviei ma Israel i gagaloei. Saul ana sorodia maiteni dobuna i naeni ma David i baiei da ita viraḡeni, wate eḡa ita nelaḡai. Mara tagogi David Saul ita viraḡeni wate lamna eḡa ita kauei aubaina tauna God ana vinevine. Wate Saul amapo i ḡoei da David ina viraḡeni.