1-3 Yesusva kohangavna Yeriko kotamonam, mongova indhanariniva lohvna, nihilva Sakius, himba kuwul wulluhunvna no indhanana, ten taeks di dombolvohvnam, himba dinindrini. Himba hellena, ona, doa Yesusva kohai, hev nengna, kava nonglalm vev Yesusm. Heva os owai, himba nonglavnamoa, himba petha ksil lohvna, doara indkumbi mera vithina Yesusmba.

4-5 Doa himba mi kohana, dandwonam os ganamba, tira vongo. Osm vevna, ata Yesusva men provav, ata hui kava nonglavav hemba. Doa Yesusva pronamba murapeta di no tira, hev nov vevongo ve, omnana, Sakius, yeoa lelnam holopeo, detiva kava ata yena deuvra livav.

6 Doa Sakiusva lelnam holopenamba tiriniva, Yesusm hevna deuvram wainga, hev indk vethavna. 7 Heva os indhanamba nunglivnamba, himba ovumnivna, Sakiusva indhanakoklarini, es hevpa ata Yesusva hena deuvrava nevav innemba?

8 Deuvmera aevulvna, Sakiusva pho, hev omnana, mendekli, si kava beswonam vevav, wohva mindnam kavnamba kava si indhanam moang vinvra, nom ten ambo nis euvmona vevm. Eva nom nemet ten kav ambo nis di dombvnam taeksram, kava henga si esesm vinvav hemba, 4pelara 4pelarava sena hohlonginvav.

9-10 Yesus omnana hem, deti doa Sesoava lopshai monakoklariniva yetatanamba. Manara, yimba doa Sesoamba keknam pevna undnahonam lohvhoamni, os ten Apraham tomonapev lohvnam. Kava arana ombol lohv, kava prona hona petharam, sna indhanam silelwolalm, lopshalm, nom ten monakoklam engivm.

11 Indhanamba hena moamba hillivna, wo Yesusva henga hemba olhmona unna. Noinda osva ishunna, Yesusva doara doa murapeta prona Yerusalemram, wo noinda indhanamba os ningvna, Sesoatindi nemelva musera avav daipota.

12 Doa Yesus olhmona unna, osm hena nengavnangm sungiavho vrowol vinna, eva mani lelnamma, memba sewonam. Yesus ona, mongo kuwul avna, himba nominiva galm vevna mongona kembellam, osm kam awora kuwul mendeklielm, wo henga kava provav kuwul wulluhunilm. 13 Himba boasna hevna andranindm 10pelaram unna, ambtok. Doa di moang vinvna, os henom 20 kina, henom 20 kina, venamba, singthana hevna andranindmba, bisnisandra nona vewol viu, verava, kav provra. Doa os sandhalahangana.

14 Wo monglava indhanamba no pethanindva hemba musk vinivna, himba moa pinginna no kembellamba, himba temba ganamba, una, kava ningminivmoa hemba, osva kana kuwul wulluhunda. 15 Heva os owai, hemba doa mendekli kuwulalm awona, hev henga prona hevna kembellam. Doa hev unna andranindm, hom ambtok, kava nonglalm vev dim nom, ten kav yem daswolahanganam. Yimba es dumbna hengava senamba?

16 Mongo hevna andranindrini ophona, mendekli, yimba kamba 20 kina lerahona, wo kava yenisrava bisnisandra venamba, 200 kina kava dombna. 17 Doa kuwul omnana, lehra yimba besal andranindrini lohv. Yimba lehra hona andrava vena, eva mani mendekliandram kava yemba seilva omnanamma. Daipota kava yemba mendeklilm awov, si yimba kuwul 10pelara kembelnindna wulluhunvav.

18 Doa mongo hevna andranindrini ophona, mendekli, yimba kamba 20 kina lerahona, wo kava yenisrava bisnisandra venamba, 100 kina kava dombna. 19 Doa kuwul omnana, lehra, si yimba kuwul 5pelara kembelnindna wulluhunvav.

20-21 Doa mongo hevna andranindrini ophona, mendekli, yimba kamba 20 kina lerahona, doa heva os kava ningekomandhana, nonamba bisnisandra venamoa yenisrava. Men yena diva. Kava yemba os nonglavna, yimba andral lohv, yimba ambo nis dombunv indhanana wohna osonnanamba.

22-23 Doa kuwul omnana, yimba andranindrini sahoklal, yimba kamba os nonglavna ona, andral lohv a? Kava ambo nis dombunvma owalna wohva a? Yena moamba pevm ambo olhai, indhanakoklarini. Yimba doarava pevna nengavnangmba beswonamba vretava, yimba kana diva benkrava dembhatava kanasirava, wo ata senamba hohlol lohta, heva os owai, yimba sahonam vena. 24-25 Doa kuwul unna no indhanam, no 20 kinaoa henaminioa livru, wo henom lerihu, ten 200 kina dombnam. Andranindva umnina, mendekli, es hevpa osva, himba 200 kina iav?

26 Kuwul unna, himba nomba mana emava iavrava, himba nomba si dombvav. Heva os himba nomba eskandva wulavrava mana emava, henamba vreivav, hevpa nis wohavav. 27 Doa no indhanamba temba kamba ovumnivnamba, kuwulalmba wulluhunilmba, hemoa hom wonambo, helvakomolm kana novra.

28 Yesusva no olhmomba ishopianamba, wo os wongana Yerusalemmonam. 29-30 Anganamba, wonphowolna sambla kembella, Betpaki kembel, eva Betani kembel, di murapeta olosingi erehilvna, os ningthiv oliv denwit nomba olomba. Doa hev wolanga ve hevrini samblam mi. Unna, yeoa engo yesna no kembellam. Ata yimba di nongla ephovav donkim, deuvra ningewola pathalohvra. Mendahal ereworal, indhanariniva nemetva noindava lohmana venamoa doava. Yeoa we epovhomanarava, hom waiepro. 31 Yemba mongova indhanariniva osva untava, manaram yimba epav hona donkimba?, os ohomno, mendekli oiva, nonam lohmana velm.

32-34 Doa no hevrini samblava mi engana, wo enonglana donkim, os Yesus ten unnam. No sambla indhana epavvna donkim, doa donkina aral unna, es hevpa? Doa hev uhunna, pina mendekli lohmana velm nosram vevpa. 35 Doa no sambla indhana donkimba Yesusindam waiepranamba, doa hevna kayen moan vehola evemna donkisra. Doa hev Yesusm no donkisra desvhueinamba, wo himba os gana. 36 Yesusva monam gavna donkisra, indkumbiva indhanamba hevna pikianmba monara velahangavna, Yesusm nonam okolalm.

37 Yesusva monam gavna donkisra, doa hev phona olora, os ningthiv, oliv denwit. Doa denwitmusm kuvhoanamba, indund holopevna sewolsis. Doa murapeta vevna Yerusalemra. Doa mindnam hevtindiva nomba indk vithivna, Sesoam mindnam okulivna, Sesoava mendekliandra doa wohvaomana vinna kana novra. 38 Una, Sesoa mendekli doa Yesusmba pusvundthoana kuwulalm, wo men himba sihav. Sesoa hemoa beswonam vrera. Sesoa indwonam avra, wo pioa hena nihilmoa okulivra.

39 Monglava Varisinindva di lovahvna indhanahovra. Hev umnina Yesusm, pevna aonghal mahalnindm ongawolo, osva manam himba sna moanamba eishomnavra yemba. 40 Yesus unna, owai, hona indhanamba moanghuiva lovahtava, doa honmba monariniva himba hev ambo ata moamba opievav, Sesoamba okulivav.

41-42 Yesusva mendah murapeta vevna, nonglanga vena Yerusalem kotam, doa wenop henamba dalvna. Hev unna, hona kembelnindva himba kamba mendah tit vriv. Himba doarava osva vitava, osm indwonam aevulla Sesoana indhanalm, himba ata beswonam aevulta, wo heva os owai, daipotava mendah ehlathaluhunv.

43 Wo noinda sikoklava si yemba luhunvav, ungundva si yemba kulthueinvav, bunemba si os yemba wulowunvav, mongnashara mongnashara velohvrava. Pethava si wolapa vilvola avrava pueilmengra. 44 Himba si yena deuvpa tupulowol vinvra, ungevlituendism helvakomo vinvra. Pueilva ningelohvavmoa, tetga vepieirava, honmba nominiva indakonda naluhungu vevra. Honamba si yemba vinvav, manara, Sesoava doa doara prona, yemba unilmba monakoklariniva, wo heva os owai, yimba hillivnamoa.

45 Yesusva tempelduvra sihanamba, doa bisnisnindm wolapho vena nomini, nomba temba hevna bisnisandra velvohvnam diva.

46 Hev unna, Sesoana moamba doara novol velohv os,

47 Elsus Yesusva sihalohvna tempelduvra, indhanam ishomana veluhunvna. Doa kuwulmendekli sembayang andranindna, katekis eva mundil hevm eishovna, es hevpa si pivva hemba helvakomandhivav? 48 Heva os owai, himba osva vinamoa, manara, ombandhanamba hevna aongva keknam elepewolinvna Yesusna moarava.