Matthew
Saadanii Kaimanaꞌo Kuwai
Diꞌoraz kaarita dauaꞌo
Diꞌoraz kaarita Matthew saadanii Tominkaru naꞌiki udani Jesus Christ dauaꞌo. Matthew, uruu 12 apostlenao bii ikiꞌo. Uapostle-tinan uaꞌii zii, uruu zaamaapauz tax puraatannaa,* zaamaapauzo tax puraatannaa: Putukapa kaarita tokon ii, Parada-karu Mashaꞌapannaada-kinao diꞌii. mazan Jesus zaamatan uruu kaudinaꞌo nii paꞌati, uruu idi uwaꞌakan pakaudin-kizi. (Puawunuuta Matthew 9:9-13 idaꞌa.) Mark naꞌiki Luke saadanii kaarita idaꞌa Matthew uu dakota-kao Levi kii.
Pakaaritan idaꞌa kiwiitapa Matthew kowaadan kanom Jesus Christ dokozu-daunnao nii. Ukowaadan uruu King David Takaan-daun, ukauꞌan Matthew dakotan uruu David dani kii. Matthew kowaadan uruu wuruꞌu Christ, Jewnao zaudapaniaz, prophetnao kowaadauzon idi kotuaꞌa naa ĩꞌati Tominkaru dyuudan nii ĩzannaa nii naꞌiki ĩnaobanaa nii. (Hebrew paradan idaꞌan udakota-kao Messiah kii.)
Naꞌiki ukowaada naꞌapam Jesus kaudinan maꞌozakaꞌo idaꞌan, ushaꞌapata umanawun kidaꞌo aimaakan aonaꞌo pidan kaꞌiitan pashaꞌapatan. Ukakuda karinainao pidannao, usoꞌota oiaꞌo doronainao pidannao ai, naꞌiki ukadishita-kida mawakainao.
Iriba Matthew kowaadan Jesus kakinaopan dauꞌu pidannao. Ukakinaopan sakitapaꞌo mashaapa-karu dauaꞌo chapter 5, 6 naꞌiki 7 idaꞌa; ukakinaotan 12 paꞌapostlennao chapter 10 idaꞌa; ukowaadan diꞌitinapa-kinai kuwai kida Tominkaru naobanai-tinan dauaꞌo chapter 13 idaꞌa; utominapa-kidan daꞌanainao paugaru kaimanaꞌo mashaapa-karu dauaꞌo chapter 18, 19 naꞌiki 20 idaꞌa; naꞌiki ukowaadan amazada katokon-tinan dauaꞌo chapter 24 naꞌiki 25 idaꞌa.
Matthew kowaada naꞌapam Jesus zowii-kao, naꞌiki ukadishitan pamawaka-kizi iki. Ukowaada naꞌapam udyuudan apostlenao kakuwaapaꞌanan paꞌati ipai amazada kawanaꞌati, naꞌiki uaipan ĩzaamatan papidanannao nii. (Puawunuuta Matthew 28:16-20 idaꞌa.)
Kaarita buutinpan kida
Jesus dokozu-daunnao 1:1-17
Jesus Christ shakatan 1:18—2:23
John Chikaawunuupauzo kaudin-kizi dauaꞌo 3:1-12
Jesus chikaawunuu-kao naꞌiki utiwaa-kidapa-kao 3:13—4:11
Jesus kaudinan Galilee Baara ii aka 4:12—18:35
Jesus kaudinaanan pamakopan dono Jerusalem iti 19:1—20:34
Jesus shaꞌapatanii kida, pazowii-kao uaꞌii 21:1—26:46
Jesus zaamata-kao, naꞌiki uzowii-kao 26:47—27:66
Jesus kadishitan pamawaka-kizi iki, naꞌiki uaidinan pidannao ati 28:1-20
1
Diꞌoraz Jesus dokozu-daunnao
kainaabatinapa-kinaa
kainaabatinapa-kinaa
(Luke 3:23-38)
1 Diꞌoraz kuwai idaꞌa kakuwaapa-karu Jesus Christ dokozu-daunnao sakadinan ikiꞌo dauꞌanaꞌo.† Jewnao kaduz umanawunuꞌo ĩꞌati wuruꞌu kainaabatinapa-karuz padokozu-daunnao diꞌiki. Jesus Christ, uruu King David takaan-daun, naꞌiki David, uruu Abraham takaan-daun.
2 Diꞌi naa ĩꞌuu kida sakadinanuꞌu Abraham diꞌikiꞌo atii King David idaꞌati: Abraham dani uu Isaac; Isaac dani uu Jacob; Jacob dani uu Judah naꞌiki kainaꞌa baꞌoran uꞌinawuzunao; 3 Judah dainao uu Perez naꞌiki Zerah (ĩdaro uu Tamar); Perez dani uu Hezron; Hezron dani uu Ram; 4 Ram dani uu Amminadab; Amminadab dani uu Nahshon; Nahshon dani uu Salmon; 5 Salmon dani uu Boaz (Boaz daro uu Rahab); Boaz dani uu Obed (Obed daro uu Ruth); Obed dani uu Jesse; 6 Jesse dani uu King David.
Aizii diꞌi Jesus Christ dokozu-daunnao dauꞌanaꞌo King David diꞌikiꞌo, atii patarubanao naꞌakan idaꞌati Israelitenao pawiizi iki Babylon iti: David dani uu Solomon (Solomon daro Uriah daiaro-daun); 7 Solomon dani uu Rehoboam; Rehoboam dani uu Abijah; Abijah dani uu Asa; 8 Asa dani uu Jehoshaphat; Jehoshaphat dani uu Jehoram; Jehoram dani uu Uzziah; 9 Uzziah dani uu Jotham; Jotham dani uu Ahaz; Ahaz dani uu Hezekiah; 10 Hezekiah dani uu Manasseh; Manasseh dani uu Amon; Amon dani uu Josiah; 11 Josiah dani uu Jehoiachin‡ Jehoiachin: baꞌoran uꞌuu Jeconiah naꞌiki kainaꞌa baꞌoran uꞌinawuzunao.
12 Aizii patarubanao naꞌakan daunaꞌanaꞌo Israelitenao Babylon iti atii Jesus Christ idaꞌatiꞌi dauꞌanaꞌo: Jehoiachin dani uu Shealtiel; Shealtiel dani uu Zerubbabel; 13 Zerubbabel dani uu Abiud; Abiud dani uu Eliakim; Eliakim dani uu Azor; 14 Azor dani uu Zadok; Zadok dani uu Achim; Achim dani uu Eliud; 15 Eliud dani uu Eleazar; Eleazar dani uu Matthan; Matthan dani uu Jacob; 16 Jacob dani uu Joseph, uruu Mary daiaruz; Mary dani uu Jesus, Jesus uruu wuruꞌu dakota-kariwaiz Christ§ Christ: Uruu Tominkaru dyuudaniaz papidanannao zannaa nii. Putukapa Christ dauaꞌo kaarita tokon ii, Parada-karu Mashaꞌapannaada-kinao diꞌii. nii. 17 Ukauꞌan 14 ĩtonazinaa aitinpan Abraham diꞌikiꞌo atii David idaꞌati. Naꞌapa uaitinpan iriban koshan 14 David diꞌikiꞌo atii ĩtarubanao naꞌakan donoꞌo idaꞌatiꞌi ĩdyaun Babylon iti; naꞌiki naꞌapa uaitinpan ĩiriban koshan ĩtarubanao naꞌakan daunaꞌan ĩdyaun Babylon iti atii Christ idaꞌati.
Jesus shakatan dauaꞌo
(Luke 2:1-7)
18 Kaikapaꞌo daꞌi Jesus Christ shakatauzonuꞌu. Jesus daro Mary, Joseph taapaniꞌi naa pazaamatan niꞌo paudaiaro nii. Mazan ĩzaamataakan uaꞌii, Mary kaudanin naa. Wuruꞌu okaudaninuz Kaimanaꞌo Doronaa idaꞌanaꞌo. 19 Aizii Joseph kaimanaꞌo pidan uruu, ukauꞌan aonaa ubaꞌazootin-kidaꞌazon Mary iribaꞌo pidan bii ii, udiꞌitinpan paꞌidaꞌa sodi naꞌapam nii pamarinaꞌatan pamazidaꞌazon otuma.
20 Joseph daꞌawuꞌukan padiꞌitinpan puꞌu tuukii. Sariapa Tominkaru diꞌikiꞌo angel kaawan uꞌidaꞌati uzandaꞌawun ii. Naꞌiki ukian uꞌati, “Joseph, King David takaan-daun, aonaa putariaꞌanaꞌa pumazidan Mary tuma. Aonaa naꞌapaꞌoram idaꞌanaꞌo mani karikaonan wuruꞌu okaudaninuz, mazan Kaimanaꞌo Doronaa maꞌozakan idaꞌanaꞌo wuruꞌu okaudaninuz. 21 Okaudanipan an, daonaioraꞌo nii odani nii. Naꞌiki Jesus* Jesus: Tominkaru kazannaatan, kiaꞌo wuruꞌu uꞌuuaz. kii paꞌi pudakota uꞌuu, ushaꞌapanum kauꞌan ukazannaatan nii papidanannao ĩꞌoian ai,” ukian uꞌati.
22 Aizii wuruꞌu naꞌapaꞌoraz shaꞌapan, Tominkaru Paradan mishiinan ukianuz paprophetin idaꞌan: 23 “Kainaꞌaꞌo nii baudaꞌapa paꞌinaꞌo zun, aonaꞌo zii okiitauzo-kao kaudanin nii daonaiora idi. Uruu Immanuel kii-karu nii udauꞌan, watumaꞌo Tominkaru kiaꞌo wuruꞌu kii-karuz.”
24 Joseph pokodaꞌakan, sariapa umishidan Tominkaru diꞌikiꞌo angel paradan paꞌati. Uruu idi umazidan Mary tuma. 25 Mazan aonaa naꞌapainim ukiaapauzon Mary, atii naꞌapa okaudanipan. Joseph kaꞌuutan naa wuruꞌu koraidaonaaz Jesus kii.
*^ zaamaapauzo tax puraatannaa: Putukapa kaarita tokon ii, Parada-karu Mashaꞌapannaada-kinao diꞌii.
†1:1 Jewnao kaduz umanawunuꞌo ĩꞌati wuruꞌu kainaabatinapa-karuz padokozu-daunnao diꞌiki.
‡1:11 Jehoiachin: baꞌoran uꞌuu Jeconiah
§1:16 Christ: Uruu Tominkaru dyuudaniaz papidanannao zannaa nii. Putukapa Christ dauaꞌo kaarita tokon ii, Parada-karu Mashaꞌapannaada-kinao diꞌii.
*1:21 Jesus: Tominkaru kazannaatan, kiaꞌo wuruꞌu uꞌuuaz.