Kayëte nte kerëhnëkëhni Pol vëvë Filip
Wade yehëhna hnë iŋi kayëte
Filip nkol nte hwëhnak nafa mbë Masedëwan ye. Afaƴik Pol njiko hnam wati nte njasëɗëho nkaw̃ ntëw̃u kigëna ŋa. Apëƴahnëk Wanës Wakasëk ŋa nkol tac hafo vahnë va kwëtahnëni do cery sali ŋa ntiyak. Njëkëryin Kayëte Vantiyehn Vefaƴik hna 16.11-40.
Pol, gë Timote ɗarël lëw̃u, kerëhnëkëhni vële hw̃ëtahnëk vëvë Filip va wati nte nkeho hnë kaso mbë Sesare (yëbëlan bëhn wafëhw imbëɗ gë warar gë bëhn wafëhw imbëɗ g'imbëɗ gë warar (53 gë 58) ga ndëcëk hnagi Yesu ỹa) ma hnë kaso mbë Rom (yëbëlan bëhn wafëhw imbëɗ gë ryaw̃ ma bëhn wafëhw imbëɗ gë ryaw̃ gë wahi (60 gë 62) ga ndëcëk hnagi Yesu ỹa). Vahnë vëvë nkol Filip va mbarëniho wayëɗ do njëɗaniha aryampo hnë vëhni, Epafërodi, soŋe njëɗahna Pol. Awa, Pol kerëhnëkëhni soŋe camehnëhni do kamënaỹehnëhni. Apacëhnëhnëkëhni gante nke ka do natëka hnë Këris hna mama nkehahnëk hnë kaso. Añaɗ kamëỹehnëhni tëfëtalahnëniha Këris do natëhni hnë fop.
Wëlin wanës wakwëhn nafa hn'iŋi kayëte: itama, nahan, ikwëtahn, uhnatah, Këris, uhorot.
Wëlin gante nke kayëte ka:
Simpaỹi, Icamehn gë iƴëfa (1.1-11)
Soŋe ye natëka Pol mama cëɗahnik (1.12-30)
Geryin had Këris (2.1-18)
Vëhni mo ye Timote gë Epafërodi (2.19-30)
Usatah paryi w̃a W̃ën hna matik (3.1–4.1)
Wanira watëkwa (4.2-9)
Pol camehnëɗëhëhni vëvë Filip va (4.10-20)
Simpaỹi rëkwa (4.21-23)
1
Simpaỹi
1 Ami Pol, gë Timote, vëryokuŋëhn Yesu Këris, herëhnëryiɗëhu, w̃uhnë fop vëfacah Yesu Këris vële ye hnë nkol nte w̃acik Filip ŋa, vëvë haryënkw hnë cery sali do gë vëyohal va: 2 Araɓi W̃ënu ŋa, Rëm fu ỹa g'Ahwëhn a Yesu Këris ndëwanihu do njëɗënihu ƴam ỹa!
Iƴëfa Pol soŋe vëvë Filip
3 Camehnëɗëfuha W̃ënu ŋa nte-wo-nte nahadëmu ŋa. 4 Fop wawati wale yëfanëhnëɗëmu w̃a w̃uhnë fop, ntiɗëfu kwëlëkwël g'uhnatah, 5 kaɓi ndënkwëtaɗëfu cape nte hnufërun ŋa hnë pëƴahn Wanës Wakasëk hna koɓëri fac ryënkwëryënkw hna hafo iỹi wati; 6 apacahnëko dënk, ale fëgwëk hnë w̃uhnë aŋi ntiyen nëfak tëfalëɗ gante padënëɗ fac ile njihahniɗ Yesu Këris ỹa.
7 Catanëko gante kwëhnahnëɓu vinahan vitac soŋe hun ki, kaɓi kwëtamu ntaw̃ary mën li. W̃uhnë fop nkentahnirun hnë ufërën W̃ën hna g'ami dënk lakënde yewu kaso hna ma lëkwanduw̃ëhni vële ỹew̃ëɗ Wanës Wakasëk ŋa, tufëɗëfuhëhni waŋi wanës toña ye. 8 Ha, W̃ënu ŋa ye seɗe mën: ŋahnëmu ɗus w̃uhnë fop g'iŋahn nte w̃atik hnë Yesu Këris ŋa.
9 Wëlin uyëfa mën w̃a: Araɓi iŋahn hun ŋa naỹ gë haw̃ary pëɓa uyët do gë hakili, 10 gante koɗun ahëncëtëlehnahnu ile fecek ỹa. Aki pacëɗun do kwëhnaɗiluhna ile heyanderun soŋe fac ile njihahniɗ Këris ỹa, 11 do pëɓu vantëw̃el usatah ule w̃atik hnë Yesu Këris, soŋe icëmb do wahnëw̃ W̃ënu ŋa.
Pol kaso hna do iƴi haryënkw Wanës Wakasëk
12 Vëyënta mën, ñaɗëfu ayëtu ile rëkiko ỹa ŋaỹëtëna iƴi haryënkw Wanës Wakasëk ŋa ɓare ankwënëk. 13 Koyëna fop vële yëkaɗëho hnë tere asankaf hna, do hn'ile-wo-le hna, njëtëni acëɗiɓu soŋe ile ryokuŋëhnëɗëfuha Këris ỹa. 14 Vëyaɓah fagant vëỹënta fu va, gante nuɗëniho kaso ka, nuỹani tama hnë Ahwëhn hna: tac nkwënakëhni kamëna soŋe pëƴahnëhni wanës W̃ënu ŋa hara dakëlëlihna.
15 Toña ye vëryampo fagant lëw̃ hni pëƴahnëɗëniha Këris ỹa g'iñew̃ary do gë dobël, ɓare vëryampo pëƴahnëɗëniha Këris ỹa gë nahan përën. 16 Vëhni, ile ntiɗëni ỹa, hn'iŋahn hna matiɗ, njëtëni nkeɓu ani soŋe rufahnu Wanës Wakasëk ŋa toña ye, 17 vëỹëntaw̃ va pëƴahnëɗëniha Këris ỹa gë hakili dobël, vinahan vindëw̃ hni va pacëna; nahaɗëni nkwënëhnëniho idën vankënca mën va.
18 Mena! Vinahan vidëw̃ hni va koɗ cat ma tumpa, gante-wo ka Këris ỹa pëƴahnik, do natëko. Nkoɗ natënɗo fëna, 19 kaɓi njëtëɓu wapuyalahna pehëɗëfu, gë wayëfa hun w̃a do gë uryema Iƴir mba Yesu Këris ŋa. 20 Napëɗëfu ɗus do pacahnëko ñoñ cëfëhnëɗilohna, ɓare g'itama fop, dol had kwëlëkwël, uwám mën hna ma cëm mën hna tufahnëɗëfu inaỹ Këris ŋa mbahn mën hna. 21 Soŋe mën a, uwám w̃a Këris ye do cëm hna nuỹaɗëfu ntëbi. 22 Ɓare ge nkoɓu ɗuniỹa li koɗëfu liwu ɗoku ile yëɗanëɗ vantëw̃el vapërën. Ƴëtëla ile rëhnaɗëfu. 23 Andoỹiɓu vacape vaki: ñaɗëfu hërënaw̃u iỹi uwám soŋe yefu gë Këris, do rac fecekëndëho ɗus; 24 ɓare soŋe hun ỹa, apecek wow̃u mbahn hna. 25 Kaɓi apacahnëko rac, njëtëɓu nkoɗëfu. Nkontëɗeɓu gë w̃uhnë fop ayihahnu haryënkw do ahwëtahnu g'uhnatah. 26 Aki ɓoka mën ŋa fagant hun liɗ nëŋu g'ahaw̃ary gë Yesu Këris soŋe mën.
27 Gante-wo nke ka, ƴasëryin gante tëƴëk Wanës Wakasëk woɓa Këris ka. Koyëna, age njiryiɓu yëkiwu ma ge ƴiryila wëryu nkorun ahahnëndawu hnë iƴir ndampo fo, do mëtaryëɗun ndampo fo gë ntaw̃ary tac fo soŋe ikwëtahn nte w̃atik hnë Wanës Wakasëk. 28 Antë aravu vëw̃ëtary hun ntakënanihu hnë ñoñ: nkehnëhnëɗëhëhni dahëse ile rufahnëɗ mbëvëɗëni, g'ile rufahnëɗ w̃uhnë pehëtëɗerun; do watac matiɗ hnë W̃ën hna. 29 Soŋe Këris ỹa, njëɗaku w̃uhnë gena bi ahwëtahnuna fo ɓare fëna ahorotu soŋe lëw̃u. 30 Ha, dolëma, had gante njëtërun ki, nkentahnirun uw̃ët rac ule hnurunëho w̃ëtaryëɗëfuho koɓëri ŋa do woɓu w̃ëtahnëndu w̃i.