1-2 Aki, antë nkohahnin karëŋa nte ryënkwihnëk ỹëŋayinëk soŋe Këris: rac ye ikwëtahn W̃ënu ŋa do itav nkeya nte yoɗ g'icëm; karëŋa wayaryi gë tind wëɓák ŋa; iɓëhn vësëm gë kiti W̃ën le wok puɗina. Ha, antë mbokahnin iŋi karëŋa ndënkwëryënkw, ɓare ƴinëfu cape g'ikarëŋa nte rëfëka acër. 3 Wëlin ile liden ỹa, age W̃ënu ŋa maw̃ëryanëkëfu.

4-6 Gena bi koɗena mbok njoyini g'igwëcët higëna nkeya ntëw̃ hni, vële hnuỹak fac ryampo humpen W̃ën ha, do ryahëk uyëɗ ambin, hnuỹak sah hnë Iƴir Ipacah, rëkatëk gante njivëk Wanës W̃ën do yëtëk fëna fanka ɗuniỹa le yejëk ỹi, ɓare mbokanëni nkeya cër ntëw̃ hni ŋa? Nke had, soŋe lëw̃ hni dënk, mbokaryëɗëniha Ajë W̃ënu ŋa kërëwa hna do cëfëhnaỹehnëniha ɓulunda hna.

7 Ante cek nkal iŋa w̃ënka rëv le rëk rëvëɗëha ỹa do pëhnëndan wanëɗa wante nëfaɗëhëhni vëyam va, nuỹaɗ ɗëwara W̃ënu ŋa. 8 Ɓare ge pëhnëndanëk wadëmpëhn do dël meh, kitiŋik kwëhnana nafa, këbënanik ɗëwara w̃eh, do patand gë hwëɗëh.

9 Ɓare w̃uhnë, vëyahnik mën, age nësëɓun aki, apacahnëkëfu gë cape përën nkerun, rac ye ipeh ŋa. 10 W̃ënu ŋa catëk; ɗënkwëɗina vantiyehn hun va do iŋahn nte rufahnërun cape w̃ac lëw̃u ga ndokuŋëhnëɗunëhëhniwo koɓëri ŋa vëfacah va, do iỹi wati fëna. 11 Ñaɗëfun paryi ale-wo-le tufahn ikamëna tac fo hafo pu ɗanko fop itamahn hun ŋa ntiya. 12 Ñaɗilëfuna ayewu vëhëmak, ɓare tëfëtalahnëryinëhni vële hnuỹaɗ, g'ikwëtahn do g'iɗuñëna, had ntëw̃ ile ntehnëk W̃ën njëɗaɗëhëhni ỹa.

13 Ante ntehnëko W̃ënu ŋa iñë ntinëhnëɗëha Abëraham, kwëhnalaw̃ohna ahnë ale ỹak naỹëk ale kwëryahnëɗ, awa, më kwëryahnëk umë dënk 14 ntehn: «Ha, pëɓënëɗëmi iɗëwara do njaɓënëɗëmi.»✡ 6.14: Wapëgwala 22.16-17 15 Abëraham nduñënako nap do nuỹako ile ntehnëkawo W̃ënu ŋa.

16 Vahnë va kwëryahnëɗëni w̃ac ale lëbëkëhni vëhni dënk. Kwëry ŋa tëkwenëɗ gwajëtël ŋa fop. 17 Fëna W̃ënu ŋa, pacënëhnëkëhni g'ikwëry vële lëw̃ëɗ ile ntehnëkëhniwo ỹa; ñak tufëhni ipëhna tac gwëcëtaɗina muk. 18 Aki, gë vantiyehn vaki vatac vante wok gwëcëtaɗina nkok koɗina mër W̃ënu ŋa, njonëhnikëfu kamënaỹehn camah, fuhnë vële rënkayinëka va, soŋe pëlahnin ɗus tamahn nte ye haryënkw fu. 19 Tamahn tac nkenëhnëkëfu had nkahn uwám lëw̃ fu; njaw̃ek ɗus, koɗena nkëci, do tamahn tac ndëcëk pand ɗëndah✡ 6.19: Soŋe Walevi 16.2; Lik 23.45 mbë rënka ŋa hafo hn'ile cëvak hna, 20 hn'ile ndënkwëhnëkëfu Yesu hna, umë ale ye gaki asëna wasaɗëha asankaf soŋe kantëm had Melëkiseɗek.