1 Vyoifichile lufuku, watambika wakulu nawawika chitala na wasekulu na walangusa wa Malajizo ga Musa, wamkowela Yesu wamhilichila Pilato. 2 Pilato kamuuza Yesu kalonga, “Hegwe kwa mndewa wa Wayahudi?” Yesu nakedichila kalonga, “Ena, hegwe nakulonga.”

3 Watambika wakulu na wamvilizila Yesu mbuli nyinji. 4 Pilato kamuuza kahi Yesu lwa keli, “Hambe ulonje chinhu? Ulole vyowokulonjeleza menji.” 5 Ila Yesu halonjile ne luzi, mbaka Pilato kabubuwala.

6 Chila mhela wa mvina ya Pasaka, Pilato nakamchumulilaga munhu yumwe yawele mchinweng'ho yaganigwe na wanhu. 7 Lelo na kwali na munhu yaliyochemigwa Balaba, yali yawichigwe mchinweng'ho hamwe na wanhu wanji kwa kukopola. 8 Wanhu wenji nawamlutila Pilato womlanda yawaditile kota vyoyaditaga. 9 Pilato kawauza kalonga, “Mwangugana ndimchumulile mndewa wa hemwe wa Wayahudi?” 10 Nakalonga ahyo kwa vila nakavizela kota watambika wakulu, nawamigala Yesu kwa heye kwa kumonela maya hela.

11 Ila watambika wakulu nawawasonjeleza wanhu wamlande Pilato yawachumulile Balaba. 12 Pilato kahiluchila kwa kuuza kalonga, “Ndimchumulile ayu mlingumchema mndewa wa Wayahudi?” 13 Wanhu weng'ha watowa iyowe kahi walonga, “Mumuwambe ayo mumsalaba!” 14 Ila Pilato nakawauza, “Lekachoni! Kadita choni chihile?” Ila hewo walutilila kutowa iyowe, “Muwambeni mumsalaba!”

15 Pilato nakagana kulinojeza alila likugusi lya wanhu, nakamchumulila Balaba kulawa mchinweng'ho. Nakalajiza Yesu yazapigwe ng'hobwa, hamba nakamlavya yawambigwe mumsalaba.

16 Hamba wamizi nawamhilika Yesu mchipepela, mng'handa ya mkulu wa Loma, wakungajiza chilundo cheng'ha cha wamizi. 17 Nawamvaliza ikanzu lya chiundewa liwele na lanji ya zambalau, nawatowa ng'hata ya miwa ifandile kota chipembelo, wamuwichila kumutwi. 18 Nawaluka kumlamsa wata, “Ulamche Mndewa wa Wayahudi!” 19 Wamtowa na idenje kumutwi, wamtemela mite, wamfugamila na kumwinamila. 20 Lowamalile kumbeza, wamvula lila ikanzu, wamvalisa nguwo ya heye wamhilika kuza kumuwamba mumsalaba.

21 Lowali mnzila, nawating'hana na munhu yumwe yalinguchemigwa Simoni, mwenyeng'haye wa Kilene. Heye yali mhaza wa Alekizanda na Lufo, na mhela awo yali yolawa kumgunda kuya kuli muji. Lelo, nawamkola lupichi yapiche msalaba wa Yesu. 22 Hamba wamhilika Yesu mbaka honhu hali hochemigwa Goligota, honhu ha Izeje lya Mutwi. 23 Nawampa divai wahanzile na mikwandi ja kuhoza usungu ila Yesu nakalema kung'hwa. 24 Nawamuwamba mumsalaba, wegawila nguwo za heye kwa kuzitowela simbi leka wamhagule yalikohi yohola choni. 25 Yali saa tatu lufuku howamuwambile Yesu mumsalaba. 26 Na nongwa ya Yesu na yandichigwa mchibao chiwichigwe mchanya mwa msalaba, “Mndewa wa Wayahudi.” 27 Hamwe na Yesu nawawamba wabokaji weli, yumwe kumoso na yumwe kudilo kwa Yesu. 28 Aho genela Maandiko Matakatifu galingulonga, “Nakawichigwa hamwe na wehile.”

29 Wanhu nawali wokola honhu aho, wali wombeza na kutigasa mitwi jawo na kulonga, “Nawali ulonga koigwisa ng'handa ya Nguluwi na kuizenga kwa mazuwa gadatu.” 30 Lelo, uduliche mumsalaba wilohole gwegwe. 31 Na hewo watambika wakulu na walangusa wa malajizo ga Musa nawambeza walonga, “Heye nakawalohola wanji, ila kangulemwela kilohola yuye. 32 Hambi hegwe ndo Kilistu Mlohozi, Mndewa wa Izilaeli! Yeduliche kulawa mumsalaba leka tone na kukunda.” Na wanhu wala weli wawambigwe mumsalaba hamwe na heye nawamliga.

33 Kulawa saa sita nemisi, mbaka saa tisa matinazo, isi yeng'ha yali na jiza. 34 Loifichile saa tisa matinazo, Yesu nakalila kwa lizi likulu, nakalonga, “Eloi, Eloi, lema sabakitani?” Ilinguzeleka, “Nguluwi wa heni, Nguluwi wa heni, mbona kundeka?” 35 Wanhu wenji nawamemile ahala, lowahuliche ahyo, nawalonga, “Hulichizeni! Kangumchema Eliya.” 36 Munhu yumwe kahola libofyabofya, kadilizila mli divai na chinhu chiliusungu, kawika mli idenje kamha Yesu yang'hwe aku yolonga, “Tulole kota Eliya kokuya kukulohola.” 37 Yesu nakatowa iyowe nakatwesemka lwa mwiso!

38 Lelo, ipaziya liwele mli ng'handa ya Nguluwi naligawanize honhu helile ng'hatu nalidejeka hagati kulawa kuchanya mbaka hanyi. 39 Mkulu wa wamizi nayawele ahala, vyoyawene Yesu vyoyabagame, nakalonga, “Kakomya ayu nayali Mwana wa Nguluwi.”

40 Nawali baho wadala wamwe wolola kwa kutali, yumwe wa awo yali, Maliya Madelena na Salome na Maliya mamo wa Yakubu mdodo na Yose. 41 Awa na wamuwinza Yesu loyali Galilaya na kumkolela mijito, kwali na wadala wanji wenji woyile Yelusalemu hamwe na heye!

42 Mhela wa matinazo nawali ufichile. Ayo yali zuwa lya kiwika goya, zuwa lilingulongola zuwa lya kwesela. 43 Aho nakoya Yusufu mwenyeng'haye wa Alimataya. Yali munhu mkulu kuli Undewa, yali yobeteza kuya kwa Undewa wa Nguluwi. Lelo, nakamlutila Pilato ne kudumba, nakalanda yapegwe lukuli lwa Yesu. 44 Pilato nakabubuwala heko vyoyahuliche kota Yesu kabagama. Lelo, nakamchema mkulu wa wamizi, nakamuza kota Yesu na kabagama hamuwa. 45 Pilato nakalonjelwa na mkulu yula wa wamizi kota Yesu nayali yabagame katali, nakamkundila Yusufu yahole lukuli lwa Yesu. 46 Aho Yusufu nakagula sanda iwele na utabuli uzelu, kaudulisa hasi lukuli, kahola sanda inojile ng'hatu na kufunjiliza lukuli na kaluta kuuwika kuli chilaga chihongoligwe kuli italawe lili kota mhalika. Kagudusa iganga kadinya mchihindilo. 47 Nawo Maliya Madelena na Maliya mayake Yose na wahona aho honhu hoyalambalikwe.