1 Mhela awo, ikugusi lya wanhu wenji naliting'hana kahi, chilyo nachowawele nacho nachimala. Lelo, Yesu nakawachema walanguswa wa heye, nakuwalonjela, 2 “Ndanguwonela isungu wanhu awa, kwa vila twikala hamwe mazuwa gadatu, nachilyo chowalinacho chimala. 3 Wone ndiwalonjele walute kaye ne kulya, wanji wozilika mnzila. Mina wanji walawa kutali ng'hatu.”

4 Walanguswa wamuuza, “Hahano twa kisolo, topata kohi chilyo cha kuhega kwa wanhu weng'ha awa?” 5 Yesu kawauza, “Mwanajo mibumunda jilinga?” Hewo wamwidichila, “Saba.”

6 Yesu nakawalonjela wanhu wekalise hanyi, kahola ajila mibumunda saba, kata malumbo Nguluwi, kamogola, kawapa walanguswa wawape wanhu, na walanguswa wadita hiho. 7 Nakwali na tusomba tuchefu, Yesu kahola kata malumbo Nguluwi, kawapa walanguswa wawamogolele wanhu walye. 8 Wanhu weng'ha walya, weguta, nawali wanhu wafichile elufu zine. Walokoteza usanyangwa, navimema vidoto saba. 9 Na hewo wadile nawali wanhu elufu zine. Yesu nakawalaga, 10 na baho nakakwina mli itumbwi hamwe na walanguswa wa heye, nakaluta kuli wilaya ya Dalimanuta.

11 Mafalisayo nawoya kwa Yesu, waluka kilewa na heye. Nawagana kumjeza Yesu, yawalajile ulajilo kulawa kilanga. 12 Yesu nakesinza mnhumbula, nakalonga, “Lekachoni lulelo alu lwangugana ulajilo? Hebu! Ndanguwalonjela ndikomya! Lulelo alu halupegwa ulajilo woneche wula.” 13 Nakawaleka, nakenjila kahi mitumbwi, nakaluka majendo kuluta kumwambu mwa ilamba.

14 Walanguswa nawasemwa kigala mibumunda minji mitumbwi lyawo, nawahola limwe hela. 15 Yesu nakawalonjela, “Milole, mwime goya na usaso wa Mafalisayo na usaso wa Helodi.” 16 Walanguswa weuza waliyeka walonga, “Kangulonga hino vyo yatuwene hatuholile mibumunda?” 17 Yesu nakagazela majesa gawo, kawalonjela, “Mwangijesa choni vyo mlihela mibumunda? Ndaze, mng'hali kuvizela? Ndaze, nhumbula za hemwe zilemwa kuvizela? 18 Mna meho, hamlingulola? Mna makutu, hamlinguhulika? Hambe mkumbuche? 19 Mhela hondiwamogolele mibumunda jihano, kwa wanhu elufu zihano, na mlokoteza vidoto vilinga vya upumunizo?” Wedichila, “Kumi na vili.” 20 Yesu nakawauza, “Na ahala ndiwamogolele mibumunda saba, wadile wanhu elufu zine, namlokoteza vidoto vilinga vya upumunizo?” Wedichila, “Saba.” 21 Lelo, nakawauza hewo, “Namng'hali kuvizela?”

22 Nawoya Betisaida, ako wanhu wamigala munhu yohambe yalole kwa Yesu nakumlanda yamibate. 23 Yesu kamibata moko ayula munhu, kaluta naye kutali na ahala honhu, kamtemela mite kumeho, hamba Yesu nakawika moko kumeho kwa heye kamuuza, “Ndaze, kwangona choni?” 24 Yula munhu kalola kuchanya nakulonga, “Ena, ndanguwona wanhu wokoneka kota migodi jijenda.” 25 Yesu kahiluchila kuwika moko kumeho kwa munhu yula. Sambi nakakupula meho, meho gake gahiluka kulola kota katali. Chila chinhu nayali yochona goya. 26 Yesu kamhilusa kaye akuno yomlonjela, “Uleche kuhiluka kuli chijijini!”

27 Yesu na walanguswa wa heye nawaluta kuli vijiji habehi na Kaisalia Filipo. Lowali mnzila, Yesu nakawauza walanguswa wa heye, “Mndonjele, wanhu wangulonga heni nda whaani?” 28 Wamwidichila, “Wanji wangulonga hegwe kwa, Yohani Mbatiza, wanji wangulonga kwa Eliya na wasigale wangulonga hegwe kwa yumwe wa waloli wa Nguluwi.” 29 Yesu kawauza!, “Ndaze hemwe, mwangulonga heni nda whaani?” Petili kedichila, “Hegwe ndo Kilistu Mlohozi yahaguligwe na Nguluwi.” 30 Hamba Yesu nakawalemeza, “Mleche kumlonjela munhu kota, heni nda whaani.”

31 Hamba Yesu nakaluka kuwalangusa walanguswa wa heye, “Mwana wa Munhu koganigwa kugazigwa, nakulemigwa na wakulu na watambika wakulu na walangusa wa malajizo ga Musa. Kota kokopoligwa, na logopuluta mazuwa gadatu kulawa hoyabagame, kozilipuka.” 32 Yesu nakawalonjela mbuli ayi ne kuvisa. Aho, Petili nakamhola hafungo, kaluka kumng'hanuchila. 33 Ila Yesu nakahinduka, kawalola walanguswa wa heye, kamng'hanuchila Petili yolonga, “Uche kwa heni Limazoga! Majesa ga hegwe hagawele ga Chinguluwi leka ga chiwunhu hela.”

34 Hamba nakawachema chilundo cha wanhu hamwe na walanguswa wa heye, nakuwalonjela, “Wone munhu yoneche yogana kumbinza heni, imgana yeleme yuye, yahole msalaba wa heye, yambinze. 35 Wone munhu yogana kulohola ukomu wa heye, kowajiliza, ila munhu yalingwajiliza ukomu wa heye, kwa Mbuli Inojile, koulohola. 36 Ndaze, munhu kowa na choni chinojile wone koihaliza isi yeng'ha na kwajiliza ukomu wa heye? Ndita hebu! 37 Kuduhu ne chinhu munhu choyodita leka yauhiluse ukomu wa heye kahi. 38 Wone munhu yoneche kuli lulelo alu lwihile na hambe lumjese Nguluwi, yalingumbonela soni heni na malanguso ga heni, na heni Mwana wa Munhu komonela soni munhu ayo, mhela hoyokuya muli ukulu wa Mhaza wa heye hamwe na wahilisi wa kilanga welile wa Nguluwi.”