1 Yesu nakalawa kuli Ng'handa ya Nguluwi, naloyali yoluta, walanguswa wa heye nawamlutila, wamlajila vyoizenjigwe goya Ng'handa ya Nguluwi. 2 Yesu kawalonjela, “Ena, moweza kugalola aga geng'ha! Ndanguwalonjelani ndikomya, kuduhu ne iganga limwe lipona aho mchanya mwa liyage, chila chinhu chowifigwa.”

3 Yesu loyali yekale mchanya mwa chidunda cha Mzeituni, walanguswa nawamlutila chinyele hafungo, nawamuuza, “Utulonjele mbuli azi zolawila hanili? Chilajilo chachi chitulajila kuya kwa hegwe na kuduma kwa mhela?” 4 Yesu kawedichila, “Milolele mleche kuhadigwa na munhu. 5 Mina wenji wolawila wolonga chila yumwe kota, ‘Heni ndo Kilistu Mlohozi’ Na hewo wowajiliza wanhu wenji. 6 Mohulika mbuli ya ngondo na uhesi wa ngondo, ila mleche kisinza, mina ago gokuya kulawila, ila kuduma kung'hali. 7 Isi imwe yochitowa na isi iyage, undewa umwe wochitowa na undewa uyage. Ahano na ahala howa na nzala na jimachinyina. 8 Geng'ha ago ndo kota mwaluko wa usungu wa kulela mwana.

9 “Hamba wowalavya leka mgazigwe na kukopoligwa. Isi zeng'ha zowazudilani kwa mbuli ya itagwa lya heni. 10 Kahi, wenji woleka makundo ga hewo, wochibagula na kizudila. 11 Wolawila waloli wenji wa udesi wowajiliza wanhu wenji. 12 Kwa mbuli ya konjezeka kwa wehile, igano lya munhu lyotita. 13 Ila munhu yula yokwimilila mbaka kuduma ndo heye yoloholigwa. 14 Leka, mwiso haunafika, Mbuli Inojile ya Undewa wa Nguluwi yodamligwa kota ulolezi kwa nhanzi zeng'ha.

15 “Lelo, lomkona ‘Izudizo lilinguwifya Ng'handa ya Nguluwi,’ Lilonjigwe na mloli wa Nguluwi Danyeli lima honhu Helile, yalingusoma yavizele vyoili.” 16 Aho, wawele Yudeya na wabilimile kuchidunda. 17 Yawele kuchanya mwa chiswiswili cha ng'handa ya heye, yaleche kidulika kuhola chinhu mng'handa. 18 Yawele kumgunda yaleche kuhiluka kumbele kuhola nguwo ya heye. 19 Wochona wawo wachimai wawele na himila na walingonyeza zuwa azo! 20 Mumlande Nguluwi leka kubilima kwa hemwe kuleche kuwa mhela wa mbeho ama zuwa lya kwesela! 21 Mina mhela awo kowa na kugaya ng'hatu kohakunalawila kuli mwaluko wa isi mbaka lehano, na hailawila kahi. 22 Wone zuwa azo naziwe hazipunguzigwe, kuduhu munhu ne yumwe yahawele yoloholigwa, ila zuwa azo zipunguzigwa na Nguluwi kwa mbuli ya wala wahaguligwe.

23 “Lelo, munhu yowalonjelani mazuwa ago, ‘Mlole Kilistu Mlohozi kahano’ Ama ‘Ka ahala,’ mleche kukunda. 24 Mina wokuya Kilistu wa udesi na waloli wa udesi. Wodita ulajilo mkulu na vinduzanduza leka wojeza kuwajiliza wala wahaguligwe na Nguluwi. 25 Mhulichize, mina nandiwalonjela mhela haunafika. 26 Lelo, howowalonjelani, ‘Mlole, ka kugunuche,’ Mleche kuluta ako, ama, ‘Mlole, kevisa mng'handa,’ Mleche kunda. 27 Mina kota vila lumwemwesa lwa limlungu kulawa kolulawilaga mbaka koluzibilaga isanya, ahyo ndo vyoiwa kuya kwa Mwana wa Munhu. 28 Ahala hohawele mtufi, ndo hojimema mikungule.

29 “Hala hokumala kugaya ako, isanya lowichigwa jiza na nyelezi halibunguzuka. Nhondwe zolagala kulawa kilanga na mong'ho ubatilile vinhu avyo vyeng'ha wotigaswa. 30 Hamba, ulajilo wa Mwana wa Munhu wokoneka kilanga, na aho nhanzi zeng'ha muisi zodama, womona Mwana wa Munhu yokuya ha ng'hungugu ya kilanga yawele na ludali na ukulu lwinji. 31 Na heye kowalajiza wahilisi wa kilanga wa heye wawele na mhalamhanda ilinguyowa ng'hatu, na hewo wowakungajiza wahaguligwe wa heye kuli nzingo zeng'ha zine, kulawila kilanga kweng'ha.

32 “Kwa ikuyu milanguse nhelo ayi, hala nhagala lozikwaluka kutitima na kubahula, mwanguvizela kota mhela wa nhonya wa habehi. 33 Hivyo du hemwe homkona mbuli zino zeng'ha ziditikwa, mvizele kota Mwana wa Munhu kahabehi kuya. 34 Ndanguwalonjelani ndikomya, lulelo alu halubagama vinhu avi vyeng'ha havinalawila. 35 Ulanga na isi zopuluta, ila ulonzi wa heni haupuluta hebu.

36 “Ila, kwa mbuli ya zuwa au saa ayo, kuduhu munhu yavizelele yokuya hanili, ne wahilisi wa kilanga, ne Mwana. Mhaza yaliyeng'ha ndo yavizelele. 37 Kota hila vyonaiwele mhela wa Nuhu, ndo vyoiwa kuya kwa Mwana wa Munhu. 38 Mina mhela awo, mazi tendema nalogang'hali lawila, wanhu wali wolya na kung'hwa, wohola na kuholeka, mbaka Nuhu loyenjile mgati mwa itumbwi ling'hangala. 39 Nahawavizelele kwali na choni mbaka gala mazi tendema logalawile, gawabagamiza weng'ha. Ndo vyoiwa mhela Mwana wa Munhu hoyokuya. 40 Mhela awo wanhu weli wowa kumgunda, yumwe koholigwa na yumwe kolechigwa. 41 Wadala weli wowa wolipula sokolo, yumwe koholigwa na yumwe kulechigwa.

42 “Lelo, mikale meho, kwa vila hamvizelele zuwa hoyokuya Mkulu wa hemwe. 43 Mvizele hino, wone yawele na ng'handa nayavizele mhizi hoyokuya yahawele meho, nahalileka ng'handa ya heye ibenigwe. 44 Leka ahyo, mwime goya, kwa vila Mwana wa Munhu kokuya saa yohamuizelele.”

45 Yesu kalutilila kulonga, “Yalikohi lelo chitumagwa wa kitumbila na yawele na luhala, wone mkulu wa heye yamuwiche hachanya ha wanhu weng'ha, yawape chilyo kwa mhela wuwula? 46 Kobweda yula chitumagwa wone mkulu wa heye loyohiluka komfika yodita ahyo. 47 Ndanguwalonjelani ndikomya, komuwika chitumagwa ayo yalolelaje lufufu lwa heye lweng'ha. 48 Ila wone chitumagwa yehile yelonjele mnhumbula, ‘Mkulu wa heni kakawa kuhiluka,’ 49 Hamba nakwaluka kuwatowa vitumagwa wayage, nakwaluka kulya na kung'hwa hamwe na walingugala, 50 mkulu wa heye mpogozi kokuya zuwa lohalizelele na saa yohaizelele. 51 Komgaza vibi na kumuwika mchilundo chimwe na wadesi. Ako kowa na chililo na kugwalaza mizino.