1 Yesu nakawalangusa wala walanguswa, “Muhu yumwe yali na lufufu, yali na mkola mijito. Wanhu nawamlonjela ayu mkola mijito wa hegwe kangulya chaka vinhu vya yula yamuwichile, 2 Yula yali na lufufu kamchema kamlonjela, ‘Mbuli zachi za hegwe zondili nguhilika? Undajile choukolele lufufu lwa heni? Mina hegwe huza nguwa chitumagwa kahi.’ 3 Yula chitumagwa kejesa, Ayu mkulu kangumbusa kuli kumwandichila, ndodita ndaze kuluta kumgunda siweza, kuluta kulanda kota wali hela chinhu, ndangona soni. 4 Ndivizela lya kudita, aho hoyombinga wanhu waze ngunhyema kowekalaga.

5 “Yolawa kawachema weng'ha walinguganigwa na yula yali yowandichila yumweyumwe, kamlonjela yalongole, ‘Zilinga uli ngudaigwa mkulu wa heni?’ 6 Heye nakedichila mibiga ja kutelechela mafuta miya na imwe ga mzeituni. ‘Yula nayandikaga kamlonjela. Hole ai iwele ngulajila voili ngudaigwa, kalise himahima wandiche hamsini.’ 7 Kahi kamuuza munhu yunji yalingudaigwa, ‘Hegwe kangukudai zilinga?’ Heye nakedichila migunila miya ja uhemba. ‘Hole ayi ilingulajila voulingudaigwa, wandiche samanini.’

8 “Ila yula mkulu kamtogola ayo yandikaga voyali wakitumbila yali yakolile luhala, mina wanhu wa ayi isi wana luhala na mbuli za hewo zihile kusinda wanhu wa lumuli.”

9 Heye Yesu kazangulonga, “Heni ndangukulonjelani migane na wanhu kulawa kuli lufufu lwihile lwa isi, lozimala mobocheligwa na hewo, mozangikala mazuwa gose ne kuduma. 10 Munhu yoneche yalinguganigwa muli mbuli ndodo. Kowa yaganigwe muli mbuli ng'hangala. Ila munhu halingukundigwa kuli mbuli ndodo, howeza kukundigwa kuli mbuli ng'hulu. 11 Wone hemwe wanhu wohambe wakukundeni kuli lufufu lwihile lwa amu muisi, munhu yachi yokupani lufufu lwa kukomya? 12 Na wone hambe mkundigwe kuli lufufu haluwele lwa hemwe, munhu yachi yokupani lufufu luzeleche?

13 “Haduhu chitumagwa yokola mijio kwa wakulu weli, kwa vila ama komzudila yumwe na kumgana yunji, au kochilongozaga na yula yumwe na kumbeza ayo yunji. Homfugamila Nguluwi na lufufu.”

14 Ila Mafalisayo lowahuliche ago geng'ha, ila hewo wali wogana lukami lufufu, wambeza Yesu. 15 Aho nakawalojela, “Hemwe mwangilola mnoga hali wanhu, ila Nguluwi kavizela mnhumbula ya hemwe. Mina chila chilingoneka chikulu hali wanhu, Nguluwi kochona acho chiha.

16 “Mizilo na gala gandichigwe na waloli gali mbaka mihela ja Yohani Mbatiza. Kulawa aho Mbuli Inojile ya Undewa wa Nguluwi wangutagusigwa, na chila munhu kangwinjila kwa ludali. 17 Ila isi yeng'ha na kilanga vyokusigwa chimdawalo hela kusinda helufi imwe ya malajizo gandichigwe kusigwa.

18 “Yoneche yamleche mchewake na kuhola yunji, mng'hondwa, na yoneche yali kumhola mdala yalechigwe mng'hondwa.

19 “Kwali na munhu yumwe yali na lufufu, yali yovala mivalo ja sendi nyinji ng'hatu na kitani chinojile na kudita mvina chila yokwinuka. 20 Kahi kwali na munhu yumwe yali nguchemigwa Lazalo, yula yali na vilonda lukuli lweng'ha yali womigala mli lwizi lwa yula yali na lufufu. 21 Nakaganaga yalye usanyangwa uwele ngulagala kulawa mli mchisanya ya yula yali na lufufu, na ganji, mibwa jali jikuya jimyanga vilonda vya heye!

22 “Lelo yula munhu yali hela chinhu kaholigwa na Nguluwi, mhilisi wa kilanga nakamhola, kekala habehi na Ibulahimu na yula yali na lufufu kaga, nakatiligwa. 23 Na yula yali na lufufu yawele yogazigwa kula kuli isi ya wabagame, kenula meho ga heye, kamona Ibulahimu kwa kutali na Lazalo yekale hafungo. 24 Hamba kachema kwa lizi, ‘Mhaza Ibulahimu, mbonele isungu, mlonjele Lazalo yadolize chidole cha heye mli mazi yahoze umyango wa heni mina ndangugazigwa kuno kuli chiluli.’

25 “Ila Ibulahimu nakedichila, ‘Kumbuche mwanangu hegwe na kupegwa ganojile lowali uchikala muisi, na Lazalo nakabochela gehile. Lelo heye kanguhozigwa na hegwe kwangugazigwa. 26 Ila na ago geng'ha, hotuli hetwe na komli hemwe hawichigwa ikulubila ikulu, ili wawele ngugana kuya kumuli kulawa kuno walemwele, na wawele komuli walemwele kuya kuno kotuli.’ 27 Ayo yali na lufufu nakalonga, ‘Lelo mhaza Ibulahimu ndangukulanda umlajize yalute kaye kuli ng'handa ya mhaza wa heni. 28 Mina ndina wang'holozangu wahano yalute yawakanye waleche kuya kuno kuli kugazigwa.’

29 “Ila Ibulahimu nakamlonjela, ‘Wang'holozo wanago Maandiko Matakatifu ga Musa na waloli wanji wa Nguluwi wowalonjela ago, waleche wawahulichize hewo chowolonga.’ 30 Ila heye nakalonga, ‘Hebu mhaza Ibulahimu! Ila wone munhu yazilipuche kulawa wanhu wajile na kuwalutila, womgalamchila Nguluwi.’ 31 Heye Ibulahimu nakalonga, ‘Wone hambe wagasome Gandichigwe ga Musa na waloli wanji wa Nguluwi, howojesa hebu! Wone yalute yazilipuche kulawa wanhu wabagame!.’ ”