Muqeddes Kalam (latin yéziq) Yeshaya 15

Moab toghruluq bir bésharet

1 Moab toghrisida yüklen’gen wehiy;

Halaketlik bir kechtila, Moabtiki Ar shehiri weyran qilinidu;

Halaketlik bir kechtila, Moabtiki Kir shehiri yoq qilinidu;■

2 Yigha-zarlar kötürüsh üchün,

Mana u butxanisigha, Dibon’gha, shundaqla barliq égizliklirige chiqti;

Moab Nébo we Medeba sheherliri üchün peryad kötüridu;

Hemme bashlar taqir körünidu,

Jimiki saqallar késilip chüshürüldi.□ ■

3 Kochilarda ular böz kiyidu;

Ögziliride, meydanlirida, herbir adem köz yashlirini yaghdurup peryad kötüridu.

4 Heshbon’gha, Éléalah sheherlirige yigha olishidu,

Awazliri Yahaz shehirigimu yétip baridu.

Shunga Moabning eskerlirimu nida qilidu;

Uning wujud-baghrini titrek basidu.

5 Méning qelbimmu Moab üchün yigha-zar kötüridu;

Ularning qachqunliri Zoargha hem Eglat-Shéli-Shijagha beder qachidu;

Mana ular topliship, yighlighan péti Luhitqa chiqidighan dawan yoli bilen yuqirigha mangidu,

Horonaimgha chüshidighan yolda turup halakettin nale-zar kötüridu.

6 Chünki Nimrimdiki sular qurup kétidu,

Ot-chöpler soliship,

Gül-giyah tügep kétidu;

Héch yap-yéshilliq qalmaydu.□

7 Shunga ular bayliqliri, tapqan-terginini yighip «Terek wadisi»din ötmekchi bolidu;

8 Ularning kötürgen yighisi Moabning chégrasigha,

Ahu-zarliri eglaimgha,

Pighanliri Beer-élimgha yétidu.

9 Dimonning suliri qan’gha tolup kétidu,

Chünki Dimonning üstige téximu köp balayi’apetni toplaymen;

Chünki Moabning qachqunliri hem zéminida qalghanliriningmu üstige bir shirni ewetimen.□

■15:1 Yer. 48:1; Ez. 25:9; Am. 2:1

□15:2 «Mana u butxanisigha, Dibon’gha... chiqti» — bashqa birxil terjimisi: — «Mana u Bajit, Dibon dégen jaylargha, ... chiqti». Mushu ayette Yeshaya Moabiylarning butxanilirida we butqa choqunidighan «égizlik»liride dua qilishlirining bikar bolidighanliqini körsitidu. «hemme bashlar taqir körünidu, jimiki saqallar késilip chüshürüldi» — chach chüshürüsh we saqal yulush qattiq hesret, pushayman qilishni yaki matem tutushnimu bildüretti.

■15:2 Yer. 48:37; Ez. 7:18

□15:6 «Ularning qachqunliri Zoargha hem eglat-shéli-shijagha beder qachidu (5-ayet) ...chünki Nimrimdiki sular qurup kétidu...» — bilishimizche 5- we 6-ayettiki sheherler (Zoar, Nimrim qatarliqlar) Moabning jenubiy teripide. Ar, kir, Nébo, Medeba bolsa shimaliy teripide. Qarighanda bolidighan hujum shimal tereptin kelgechke, ular jenubiy terepke qachidu. Asuriye Moabgha ikki qétim hujum qildi, miladiyedin ilgiriki 715- we -711-yilida.

□15:9 «Dimon» — belkim «Dibon» (1-ayet) bilen oxshash bolushi mumkin, yerlikler Dibonni belkim «Dimon» dep atishi mumkin. «shir» — kelgüside Moabqa tajawuz qilidighan (1) Asuriye padishahini yaki (2) Babil padishahini körsitidu.