1 Nanga angokeme, ⸤Pulu Yemone yambomanga ulu telemelema apurupe pilimbe kinie⸥ olio yamboma ⸤yunge unguma⸥ mane silimolo yemanga ulu telemoloma paa tondolo mundupe apurupe pilimbe kene enenga ye mare aisilini ‘⸤Pulu Yemonga unguma⸥ yamboma mane siemili.’ naa niengi. 2 ⸤Aku nikirumunge pulumu niembo:⸥ Wale aisili olio ‘ulu ⸤peanga⸥ te temolo.’ konopu lepolie naa telemolo; ‘Ulu keri te naa temolo.’ konopu lepolie telemolo. Aku sipe uluma olio yamboma kinie pali wendo olemo. Yambo tene walsikale kepe ungu keri te naa nilimo liemo kanu yambomo yu yambo paa peangamo, yunge kangime pali manda nokopa konjimbe.

3 Ungu nikirumunge pulumu i sipe mele: Yambo tene ‘Kongi ote te nanga ungumu pilipili.’ nimbe yunge kerena aini te panjinjilimo kanu kinie yuni ‘Otemo i sipe pupili, i sipe pupili.’ nimbe ainimu lipe sumbi sinjilimo kinie otemo aku sipe topele topa pulimo.* 4 Sipi telemo mele piliengila! Sipime paa mele ailime nakolo poporomene kolea lupe marenga topa mundumbe telemo kinie sipimenga sitiyama paa mele kangama nakolo sipi kongono telemele yemane ‘Kolea tenga pumulú.’ konopu lelkolie sitiyama ambolko pupú tolemele kinie ‘Pumulú.’ nilimele kolea akuna pulimo. 5 Aku sipe mele olionga alimbelumu kangimunge mele kangamo nakolo yu yuyu kapi nimbe yunge imbi ambolopa ola limo. Tepe kanga tene kolea aisili kuli tepe nolemo mele ene piliengi! 6 Alimbelumu tepe mélemola. Olionga kangimenga pali yu mele kangamo nakolo yuni ulu pulu keri aisili tepalie kangime pali tepa kalaro monjipe, ⸤akumuni ungu nilimolo ungumane⸥ kuli tepene koleamanga pali nolemo mele yamboma tepo kenjilimolo. Aku tepemo yu ⸤Pulu Yemone kurumanga nomi Setene lipe mundumbe⸥ tepe koleana* wendo omba kalemo tepemo.

7 Yambomane kongi kinie kera kinie wambiye kinie takara mele lupema kinie nomu kusana suku molemo melema kinie aku mele lupe lupe aisili liku ‘Aku melemane olionga nimulú unguma pilku teangi.’ ningu mane siku nokolemele, 8 nakolo yambo tene yunge alimbelumu aku sipe manda mane sipe naa nokolemo. Yu ulu keri tembando taka lepa naa pelemo mélemo; yamboma kolemele tomoma mele olionga alimbeluna si nimbe pelemo.

9 Alimbelumuni kerena Ailimu olionga Lapamo kapi nimbu imbi ambolopo ola linjilimolo; Pulu Yemone yu molemo mele aku sipe terimu yamboma alimbelumuni kepe ‘Molko kenjengi!’ nimbu, nimbu kenjilimolo. 10 Kere teluna ⸤Pulu Yemo molo yambo te⸥ kapi nimbe imbi ambolopa ola linjilimo ungu peangama kinie nimbe kenjilimo ungu kerime kinie wendo olemo. Nanga angokeme, aku sipe ulumu ulu peanga te molo. 11 Mana no telu pikipe wendo olemona no peanga te kinie no kombili teli te kinie teluna wendo naa olemo. 12 Nanga angokeme, unju piki te unju ollipi mongo manda tombaye? Molo unju waene te unju piki mongo manda tombaye?* Aku sipe, no kombili teli tenga no peanga te manda wendo naa ombá.

13 Enenga yambo te unguma mimi sipe pilipe, yambomanga uluma pilipe apurupe konjipe, pilipe konginjili pelemoye? Aku sipe telemo yambo te molomu liemo ‘Yambomane yu sike aku sipe yambomo molemo mele ningu kanangi.’ nimbe yunge aulke andopa ulu tembama paa peanga lepili. Yu kara pupe yunge imbi ambolopa ola naa lipe, konopuni pilipe konjipe, pilipe konginjili pelemo ulu peangama mindi tepili. Aku temba kinie yambomane kanokolie ‘yu sike pilipe konginjili peli yambomo molemo.’ ningu kanonge. 14 Nakolo yambo mare imbi ola molemo molo teko konjilimele molo ulu telemele mele kanokolie ‘Aku siku naa molangi. Aku siku naa teangi. Olio aku sipu molemelkanje papu.’ ningu ene kinie konopu keri panjiku mumindili kolongi liemo aku siku konopuni pilimele mele ‘Tepo konjikimulu. Olio pilipe konginjili pelemo.’ ningu eneno kapi ningu imbi ambolko ola naa liku, aku siku kolo toko ungu sikema toko manie naa mundeyo. 15 Aku sipe pilipe konginjilimu mulu koleana wendo naa olemo; ya ma koleana wendo olemo. We konopu oumanga* ⸤Pulu Yemonga⸥ Minimu naa molorumuma perimu kanu konopumanga wendo olemo; aku sipe ulu wendo olemomanga lapamo depelemo yu.** 16 ⸤Aku ungu nikirumunge pulumu i sipe:⸥ Yambo mare imbi ola molemo molo teko konjilimele molo ulu telemele mele kanokolie ‘Aku siku naa molangi. Aku siku naa teangi. Olio aku sipu molemelkanje papu.’ ningu ene kinie konopu keri panjiku mumindili kolemele uluma telemele yamboma molemele kinie ene molemelena yamboma konopu teluna pupili naa molko konopu lupe lupe pepili molko, marene ulu pulu keri lupe lupema telemele akumunge ⸤‘kanu pilipe konginjilimu mulu koleana wendo naa olemo.’ nikiru⸥.

17 Nakolo mulu koleana wendo olemo pilipe konginjili akumu ⸤lupe⸥. Pulu Yemone pilipe konginjilimu yamboma silimo kinie kanu yambomane i siku telemele: