1 Ege E ekue nerute pek, abele ni Genesareta ge, ege gaire le lakub uiaba esaimelu, uiaba lagelage asolare Ade ra mer.

2 Epe E erdali neisi nar gur tauer nerute apek abele ni ge; nolea le kak, uiaba bakeauare net ogarup.

3 Epe E bakeamulu nerute nar ge, Simona ra nar, E abi damosi, Ma elele ami abele nar nerute apek abele ni ge. Epe E emeri lokod ge, E uiabi ereuerem, gaire le lakub, abele narlam.

4 Ege abara marau eseamulu, E abi detager Simona, Ma elele abele keper ge, ueakai uaba net esapili, a lar nagri.

5 Simona abi detager, kega, Opole, abele ki ge keriba au sagim, nolea lar nagri: epe mara mer nagri, abelelam kaka net ko bataueret.

6 Abele lu uiaba emetu ikeli, epe uiaba net esapili gaire lar mitkar; epe uiaba net batoatare:

7 Ege uiaba opu darakiriare uader emeri nerute nar ge, tabakeauare uiabi upidaratidalare. Epe uiaba tabakeauare, ege neisi nar mitkar, maike bataili.

8 Ege Simona Peteru umele, epe abi ekesmeri Iesu ra teter ge, kega, Opole, ma bakeamulu karielam, abelelam kaka uit le.

9 Abelelam E abi damered, pako uader kemem abim, abelelam gaire lar uiaba nagri;

10 Ege mokakalam Iakobo pako Ioane, Zebedaio ra omasker, uiaba larem okakis Simona. Epe Iesu abi detager, Simona, Ma nolea geum kak; ditimed peirdi gaire le nagri marielam.

11 Ege uiaba nar akaridalie, epe uiaba gaire lu uridili dikaer, a uiaba abi irmili.

12 E bakeamulu nerute uteb ge, nerute le nagri gim, abara gem lepera mitkar: ege E Iesu erdali, epe abim ekesmeri tabara opem, E abi damosi, kega, Opole, ese ma lagelage, ma umele kara gem ogdirup.

13 Epe abara tag itrimud, E abi itut, kega, Kaka lagelage; mari ogdirup. Epe abara gim lepera akaid.

14 Epe E abi detaut, Ma nolea etomeret nerute le: debele ma bakeam abi etomeret abele zogozogo le, ma abi ais tonar ogdirup, mokakalam Mose ra gelar giz, ueakai uiaba umele abele atamelam.

15 Abele mer E osmed, gaire le asolare abim: epe gaire le lakub giz tabakeauare uiaba lagelage abi asolare, pako idigiri uiaba gim.

16 E bakeamulu le kak uteb, ege esorerapoilu.

17 Nerute gerger, E uiabi ereuerem; ege Faresaio giz pako ereuer le abele gelar giz, uiaba tabakeauare nerute uteb Galilaialam, pako Iudaia, pako Ierusalema; ege nagri Opole ra adigiri, abelelam E nadgirare uiabim.

18 Dasmer, nerute le uiaba tegared taba siklam gim nagri E ibibi; uiaba lagelage abim tegared, a abi ais Iesu ra opem.

19 A uiaba nolea umer kak, abelelam abele meta mitkar gaire le lakub, epe uiaba bakeauare meta tumge ezagerare Iesu muige, a lemlem ismi, uiaba sik dikri gim le tumge igimerare.

20 Ege E erdali uiaba oituli, E abi detager, kega, Mara uit emetu idigiri.

21 Epe aotale giz pako Faresaio giz uiaba dikiaporare, kega, Nete le dali E adud mer Adim? Nete umele uit idigiri, no Ade tepteb?

22 Epe Iesu erdali uiaba dikiaporare, E uiabi detaut, kega, Nako dikiaporare uaba nerkep?

23 Nako lu nolea beber, kega, Ege mara uit adem dikri: nako, Ma ekue bakeam?

24 Abelelam ueakai uaba umele Ade ra Uerem, E nagri sirdam geseb ge uit dikri, (ege E abi detager ibibi le,) Kaka mari detager, Ma ekue, bakeam ais mara sik, a bakeam mabara meta.

25 Epe E ekueid uiaba opem, ege tabara sik ekau, a bakeam tabara meta, E Adim naospered.

26 Uiaba uridili au damrare, uiaba naospered Adim; ege uiaba au geum, kega, Abelelam kerkar abele lu meriba erdalare abele gerger.

27 Ege abele lu eseamulu, epe E osmed, ege E erdali nerute telona giz, abara nei Leui, ege E emeri meta dipumed: E abi detager, kega, Kari narmili.

28 Epe gaire lu uridili dikaer, E sobkak abi irmili.

29 Ege Leui E ikeli uetpur abara meta ge abim: gaire telona giz abi kemem, pako uader uteid baiter uiaba eroli okakis

30 Faresaio giz a aotale giz, uiaba mudi mer abara kaimeg giz, kega, Nalugelam uaba eroli a ereli okakis telona giz a uit le giz?

31 Iesu uiabim detaut, kega, Saserim le giz lukup kemle lakak; gim le giz laglag.

32 Kaka nolea tabarki ko gaire barkak tonar dabgeri, debele gaire uit le giz, ueakai uiaba obazgeda.

33 Ege uiaba abi detaut kega, Nalugelam Ioane ra kaimeg giz leueru baili, pako esorerapare, pako Faresaio ra kaimeg giz; ege mara kaimeg giz uiaba eroli a ereli?

34 Ege Iesu uiabim detager, kega, Nako, umele gaire boai le ispida ko leueru baili, le ispida uiabi dog?

35 Kerker niai tabarki; le ispida uiabielam egared, abele gaire gerger uiaba leueru baili.

36 Ege E uiabim detager, nerute mer babisdarie, kega, Nole le kerkar mog uali itkedi okakis buzibuzi am uali; kerkar mog ualilam ekep itkedi, iako kerkar mog ualilam nole abkoreb buzibuzi am uali.

37 Nole le epaiteret kerkar uaina muige buzibuzi tarpor giz; epe tarpor giz arperiklam, uaina epaiteredoa, epe sor giz adud.

38 Ese ko kerkar tarpor giz sorem, debele epaiteret kerkar uaina, ueakai debele.

39 Nole le ereli emeret uaina, a iako ko sobkak lagelag kerkar uaina: abelelam E detager, kega, Emeret uaina debele.