REVELATION:
Hamadefal
Revelation: Mekla ye llah ngal John ila ye teftaf diy lal babior le irel yodwe re hafohoyur Kristiano kowe le fael yar tugulul ladep irel Jesus Kristus le iy Samol. Yeramtale ye tefa babior le ila ye luluwaley le yebe hakela ngo ye halpa lal deper rechokla rebe yawli babior le, ngo ye hakela ngalir bo rebe yedamgel chog irel yod kala rebe bulong luwul hafohoy mo weres.
Pallengel meka lal babior le ila kaptael tot mekla John ye rongrong ngo ye wiri mo lal yal luluwal. Kaptael meka ye teftaf lal babior le ila iy ye teptap hawewe kala Kristiano kala chog mele re medaf iyang, iwe ngo yarmat cholop re togla fal. Hamadefal mekla ye mel irel sew mo sew momol babior le ye tefael mo tefael ngali ngo yete haffedeg yal hamdefa matmetael mokwe ye llah ngali. Ila mwo te haffedeg yar yarmat medaf irel babior le, ngo mala pallengel fal ila ye ffod: irel Kristus le iy Samol, ngo Deus ye bele halngol halusur loh panger rechoka rema happaliyel ngali, le Satan choluwar. Iwe ngo ye bele fang payel yar hachigchig rechokla ye tugul lal deper irel; ye bele fang ngalir laeng la ye tefoy mo talop la ye tefoy irel yodla yebe hamawo loh pangal meka.
Paalpal Meka Yadol Babior Le
Hamadefal 1:1–8
Chapdagel mekla ye llah ngali mo babior kowe yal ngal eklesia kowe fusuw 1:9—3:22
Babior we fusuw mokwe kemachol 4:1—8:1
Rapa we fusuw 8:2—11:19
Dragon we mo mael fefedeg we rumal 12:1—13:18
Matmetael mokwe ye llah ngali 14:1—15:8
Tohogol ssong kowe fusuw we yael Deus 16:1–21
Yal mmedarloh Babylon, mo yal lus mael hamtagtog we, mo rechokwe rete katosol profeta, iwe mo Moniyan 17:1—20:10
Mala hartael tatalal hapatpat 20:11–15
Laeng la ye tefoy, mo talop la ye tefoy mo Jerusalem la ye tefoy 21:1—22:5
Haygul loh 22:6–21
1
Mekla Ye Llah Ngal John
1 Ba1ior le ila kofael meka Deus ye fang ngal Jesus Kristus bo yebe kawraloh igegal. Deus ye ngaley mele bo yebe kewar ngalir re hagloy kala yal mekla ye tugul le towol ssulay ngo ye bele wel doh. Kristus mele ye hagolal ngal John we yal re hagloy pangal meka, irel yal fang loh angelus la lol irel, 2 iwe ngo John yesa sor pangal loh mekla iy yesa wiri. Iye mele yalol irel kofal hapatpat la ye budoh mo irel Deus, iwe mo mala ye katos le Jesus Kristus yesa halleha loh. 3 Be momay depel semal le yebe yawli babior le ngalir yarmat, ngo be momay deper rechokala re taelenga padpadal hapatpat le ye santus, ngo re dabey igegel mekla ye teftaf iyang! Bo mala yodol ila yesa harep, ila yodla pangal meka ngo bele weldoh.
Habong Ngal Eklesia We Fusuw
4 Babior le ila ye budoh mo irey ngang John le yai ngal eklesia kala fusuw le ye mel wol Asia:
Deus le ye mel igla, ngo ye mel igawe, ngo yebe chil budoh, iwe mo espritu kala fismol le re mel imol mala liliyel Deus rebe fang haradiya mo hopos ngalugmi. Ex 3:14; Rev 4:5 5 Iwe ngo haradiya mo hopos yebe wol budoh iremi mo irel Jesus Kristus we ye yitol depal irel folol Ebangelium we. Bo iy mele mol lol Deus mal ngo ye molow tefael mo irel maes ngo iy mele ye lamlir panger king lal faileng le.
Ye hachang gich, ngo irel yal mes mele ye taldigich mo irel mala kelel molfid. Is 55:4; Ps 89:27 6 Iwe ngo ye foru gich le sibe mel bo chol sew lam le gich temarong bo sibe yengang ngal Deus la Temal. Falmay mo ssor ngal Jesus Kristus pangal yodol! Amen. Ex 19:6; Rev 5:10
7 Ha kalloh, iye lay yesa bubudoh mo woal darmiy kalay! Panger yarmat mo rechokwe re sor bo yebe mes ngo re bele wiri; iwe ngo panger yarmat wol talop le ngo rebe tang irel yal tayikof deper irel mokwe re faor ngali. Ngo faesul tugul le be ila sengal! Dn 7:13; Mt 24:30; Mk 13:26; Lk 21:27; 1 Th 4:17; Zec 12:10; Jn 19:34, 37; Zec 12:10; Mt 24:30
8 Samol Deus we pangal ngo yema yoh irel ngo iy ye mel igla, ngo ye mel igawe, ngo yebe chil budoh, we ye sor bo, “Ngang mele chapdagel dah, ngo ngang mele haugugul loh.” Rev 22:13; Ex 3:14
Kristus Ye Llah Ngal John
9 Ngang John we bismi. Irel yai mel bo re dabeyel Jesus mele isa mel bo choulwami irel yedamgel luwul weres mo hafohoy kala yema holar rechokla ye tugul le rebe loh irel mala Lamliyel Deus. Resa yitilyey woal fulu le Patmos idal bo fael mala ifoloyu mekla yalol Deus mo mokla ye katos le Jesus yesa halleha loh. 10 Woal molwe bungul Samol, ngo Espritu Santus yesa bidiy uwoy, iwe ngo isa rongrong sew lliyalol yarmat le ye palleng, le ye wochog pallengel yalol sew roppa le ye maliliy doh mo lugutugruy, 11 le ye sor bo, “Tefadiy meka ho wiri lal babior, ngo hosa fang loh babior la irel eklesia kala re mel wol haplom kala fusuw: Ephesus mo Smyrna mo Pergamum mo Thyatira mo Sardis mo Philadelphia iwe mo Laodicea.”
12 Ila tagul tefael bo ibe kemahoy le iy molwe ye maliliy ngalyey, ngo isala wiri fusuw liliyel habulbul le hoal. 13 Iwe ngo ye mel sew formel luwul mokwe le ye wululul loh semal yarmat, ngo mala mengagol ila ye hola diy mekla pachpechael pechel, ngo ye mel sew bando hoal le ye dar lal mala wubal. Dn 7:13; Dn 10:5 14 Mala yal chemal ila ye wochog bbechragel yulol saaf hare burburul hatobtob, ngo lal mekla metal ila ye bulbul le ye wochog yaef; Dn 7:9 1:14–15; Dn 10:6 15 mekla pachpechal pechel ila ye yyongong le ye wochog sinchu kowe siya hammale hamayi ngo si chalfi yee, yela ddoldol loh. Iwe ngo mala lliyalol ila ye palleng le ye wochog mwargogol mo pupungul hatobtob. Ez 1:24; 43:2 16 Ye holu fisfos fis lal paol rela gilemra, ngo ye matwey mo lal mala yewal seyay saiden kowe rorure ngo metal le ye kkang. Iwe ngo werel woal mala metal ila ye wochog werel yaal llewlelyol. 17 Yodla iwiri chog ngo isa ppediyey diy wototol mo lengchel mekla pechel le iy sa wochog semal maes. Iwe ngo iy yesa yetedah rel paol rewe gilemra uwoy ngo yesa sor bo, “Ho towe motog! Ngang mele chapdagel dah ngo ngang mele haygugul loh. Is 44:6; 48:12; Rev 2:8; 22:13 18 Ngang yeramtala imolow le tor siyal! Imes, ngo igla ila isa molow tefael le tor siyal. Ngang mele ilamli maes mo lobosla liliyer cho mes. 19 Tefadiy meka hosa wiri lal babior, le meka igla mo ikla ye bele moch weldoh. 20 Iye mele fael fis ka fisfos le ho wiri mo lal payi rele gilemra, iwe mo liliyel habulbul ka fusuw le hoal: fis ka fisfos ila ikala mele angelusel eklesia kala fusuw, iwe ngo liliyel habulbul ka fusuw mele iy eklesia kala fusuw.