MATTHEW
Hamadefal
Ebangelium we tefayel Matthew ila ye kapta Hapatpat Momay we kofal Jesus, le iy Demer we Deus ye hayho molwe ye hatugulu ngalir mokwe lol mo irel Bogtag we Muswe. Hapatpat Momay le ila te fal ngalir chog yarmetal Jews, le ila rechokwe Jesus yela subdoh sala mel luwulur, bo fal ngalir panger yarmetal faileng le.
Ebangelium le yael Matthew ila ye fel igegel yal kapta kofal meka. Ye chap mo irel yodwe ye subdoh Jesus iyang, le ye hamdefa kofal yael Jesus baptismus mo kofal Moniyan we ye hagla le yebe wigid depel Jesus ngal molfid, iwe ngo ye kapta wululul yael Jesus foloy, mo yal hamedaf mo yal hachuchuy tomay mo uwor yarmat wol Galilee. Yela wol miril mele ngo Ebangelium le ye sa kapta igegel malekah we yael Jesus we ye chuy mo Galilee sa loh wol Jerusalem, mo mokwe ye wel ngal Jesus irel molwe hartal wiik irel yal molow woal talople we ye loh yee, la yug mo irel yodwe re krudu mo yodwe ye molow tefael mo irel maes.
Ebangelium le ye halehaloh kofal Jesus le iy semal Sensey le ye sallap, ngo yor kkelal le ye be hamdefa Hatobtob we yael Deus, ngo ye hamdefa kofal mala Lamliyel Deus. Dolpael mekla ye foloyu ila resa hateyili fengali sala lomow (5) momol mo iyang: (1) Foloy we wol Tayit we, le kofal wegdeg, mo yengang, mo mmaler, mo lobola rebe loh mekla yarmetal mala Lamliyel Deus iyang (Momol we 5–7); (2) Yael Jesus foloyu igegel yar yengang chowe seg mo rumal we re dabeyal (Momol we 10); (3) Fiyong kowe hamadefal mala Lamliyel Deus wol laeng (Momol we 13); (4) Ye foloyu kofal wegdigir rechoka resa mel bo re dabeyel Jesus. (Momol we 18); Iwe ngo (5) ye foloyu kofal yodla hartal ral mo kofal mala Lamliyel Deus le yebe budoh.
Palpal Meka Yadol Babior Le
Yal daoy mo yal subdoh Jesus Kristus 1:1—2:23
Yengang kowe yael Johannes Baptista 3:1–12
Yael Jesus Baptismus mo yael Moniyan hagla 3:13—4:11
Yael Jesus yengang ngalir yarmat mo wol Galilee 4:12—18:35
Ye chap mo Galilee sa loh Jerusalem 19:1—20:34
Molwe hartal wiik woal Jerusalem mo lengchel Jerusalem 21:1—27:66
Yael Samol molow tefael mo irel maes mo yal ma llah ngalir yarmat 28:1–20
1
Ebangelium We Tefayel
Chapdoh Kowe Yael Jesus Kristus
(Luke 3:23–38)
1 Iye mele babiorol rechokwe re hamodoh mo imol Jesus Kristus le daowe yael David, ngo David ila ye budoh mo irel daowe yael Abraham.
2-6 Ye chap mo irel Abraham sa budoh irel King David, le iye mele babioror daokala: Abraham ila temal Isaac, ngo Isaac ila temal Jacob, ngo Jacob ila temal Judah mo mekla wol bisil; iwe ngo Judah ila temal Perez mo Zerah (ngo seler ila Tamar), Perez ila temal Hezron ngo Hezron ila temal Ram, ngo Ram ila temal Amminadab, ngo Amminadab ila temal Nahshon, ngo Nahshon ila temal Salmon, ngo Salmon ila temal Boaz (ngo sil ila Rahab), ngo Boaz ila temal Obed (ngo Ruth mele sil), ngo Obed ila temal Jesse, ngo Jesse ila temal King David.
7-11 Ye chap irel molwe wol mol David yee, la hola yodwe re hachuyar yarmetal Israel mo wol Babylon. Iwe ngo David ila temal Solomon (mala sil ila molwe ril Uriah), Solomon ila temal Rehoboam, ngo Rehoboam ila tamal Abijah; ngo Abijah ila tamal Asa; ngo Asa ila temal Jehoshaphat, ngo Jehoshaphat ila temal Jehoram, ngo Jehoram ila temal Uzziah, ngo Uzziah ila temal Jotham, ngo Jotham ila temal Ahaz, ngo Ahaz ila temal Hezekiah, ngo Hezekiah ila temal Manasseh, ngo Manasseh ila temal Amon, ngo Amon ila temal Josiah mo Jehoiachin mo mekla wol bisil. 2 K 24:14–15; 2 Ch 36:10; Jr 27:20
12-16 Irel yodwe re hachuya yarmetal Israel mo wol Babylon yee, la hola yodwe bungul yal subdoh Jesus, ngo Jehoiachin ila temal Shealtiel, ngo Shealtiel ila temal Zerubbabel, ngo Zerubbabel ila temal Abiud, ngo Abiud ila temal Eliakim, ngo Eliakim ila temal Azor, ngo Azor ila temal Zadok, ngo Zadok ila temal Achim, ngo Achim ila temal Eliud, ngo Eliud ila temal Eleazar, ngo Eleazar ila temal Matthan, ngo Matthan ila temal Jacob, ngo Jacob ila temal Joseph, ngo Joseph ila ril Maria. Iwe ngo Maria ila sil Jesus we rema ffesangu ngali bo Kristus.
17 Seg mo faw dalel yarmat le ye chap mo irel Abraham yee, la hola David, ngo wol seg mo faw dalel yarmat mo irel David yee, la hola yodwe re hachuchuyar loh yarmat wol Babylon, ngo wol seg mo faw dalel yarmat mo irel yodle ngal yodwe ye subdoh Kristus iyang.
Yal Subdoh Jesus Kristus
(Luke 2:1–7)
18 Iye sengal wululul yal subdoh Jesus Kristus. Maria we sil ila re kapta bo rebe paoy fengal mo Joseph, ngo imol yodwe rebe paoy sew ngo Maria sala gola le yesa siyal irel mala kkamelal Espritu Santus. Lk 1:27 19 Joseph ila semal mal le pangal yad ngo ye hafle pangal formel. Iwe ngo yete dipli bo yebe hatayikofa depel Maria luwul yarmat. Iwe yesa luwaley le re bele mehal le tor le be gola. 20 Yodwe chil luluwaley fedaley kofal molwe ngo semal angelusel Samol sa llah ngali luwul yal ddal sa kangalu bo “Joseph, le chol daowe yael David, ho towe motog le hobe hasi Maria bo yam habulupoy. Bo mala kkamelal Espritu Santus mele sa siyal Maria iyang. 21 Ye bele dimolowagili semal yalwich tarmal ngo hosa hadeda bo Jesus, bo fal mala be hadorar yarmat mo irel mekla molfidir.” Lk 1:31
22 Pangal meka ngo ye weldoh bo fael mala be llah loh meka yalol Samol le katos mo irel profeta kowe we re sor bo, 23 “Fefel we ye birgo ila bele siyal le yebe dimolowagili semal yalwich mal le rebe ffesangu ngali bo Immanuel” (fal yidle ila, “Deus ye mel irech”). Is 7:14 (LXX)
24 Yela mmat Joseph ngo ye sala foru mokwe angelusel Samol ye kangalu, yesa loh ye sala paoy ngal Maria. 25 Iwe ngo tor fael sew le re masor sew yee, yela dimolowagili yalwich mal we lol. Iwe ngo Joseph sa hadeda bo Jesus.