1 Ho towe kkaftoroy ngal semal le yesa mal bo hobe far hamdefa le yebe wochog mala iy spegil tamom. Hammaler rechoka re yalwich mo yifam le yebe wochog bo ir spegil bisim. 2 Yebe wol ila sengal mele hobe faor ngalir rechoka resa fefel le yebe wochog bo ir spegil solom, mo fefel ka re yalwich mo yifam le yebe wochog bo ir spegil mengam.

3 Hafalir fefel kala yesa mes rir le tor le ye kekammaler. 4 Hare ye mel semal fefel le yesa mes ril ngo yor lol hare yor lol mekla lol, ngo metamol ngo rebe foru yengang kala yar Kristiano mo lobugter. Be iye sengal mala rebe foru ila ngo yebe tefael payel hachigchig kowe mekla wulutugur mo wulutugul mekla wulutugur re foru ngalir, bo ila mele ye fel mo irel Deus. 5 Semal fefel le yesa mes ril ngo tor le yema hamale, ila yesa yetedah depal uwol Deus, ngo yema mapel lubong mo leral bo yebe hafalpechey Deus bo yebe tipingi. 6 Iwe ngo semal fefel le yesa mes ril ngo yesa tapeli holongol irel mekla ye tayikof ila yesa faesul mes, le ila mwo ye chil molow. 7 Hobe kangalur foloy ka bo ila ngo tor le yebe sor sew bo derer. 8 Iwe ngo hare semal le ye tema hammaler chol bugtal mo yal family, ila ngo yesa tahchaloh tugul la yar Kristiano ngo yesa kkel yal tayikof mo imor rechoka rete chepar.

9 Ho towe tefadiy idel semal fefel le yesa mes ril lal babior la ye mel ider fefel kala yesa mes rir iyang igle ye ted ligdi weleg lepal ragel. Iwe ngo be hal fael sew chog yal riri, 10 ngo ye momay wegdegel: Be semal fefel le yebe ma hamaler mekla lol ngo yema mechal le yebe budoh wasola irel mala imwal, ngo yema faor yengang kala ye tottol bo yaglir Kristiano kala choluwal, ngo yema tipingir rechokla re hafohoy, ngo yema yedamgel bo yebe ma foru chog mekla ye momay.

11 Ho towe yetolong ider fefel kala yesa mes rir ngo re chil lefechig lal babior, bo fael mala ye bela sew yad le yesa kkel deper le rebe riri ngo re bele ttagul tang Kristus. 12 Iwe ngo re bele tayikof bo resa hatawsi molwe re hatugulu ngali metamo. 13 Re bele wol kkay yar be hatolpaloh yar time irel yar loh irel sew mo sew imw, ngo te iye chog, bo re bele wol kkay le rebe toa lunglung ngo re hapilsedaw ngalir yarmat irel yar yengang le re kekapta tot formel le torloh pelal le ir rebe kapta. 14 Ila idipli le fefel kala yesa mes rir ngo re chil lefechig rebe riri, bo yebe yor layur ngo re hammale bugter. Ila ngo rechokla re ma hapaliyel ngalgich, ila tor hapatpat tayikof la rebe sor irech. 15 Bo tot fefel ka yesa mes rir ila resa tagul resa dabey mala depel Satan. 16 Te tugul semal fefel le ye Kristiano, ngo yor fefel kala sa mes rir irel imwal ngo be hammaler ngo towe ligdirloh bo eklesia be hammaler. Eklesia ila yebe hammaler fefel kala yesa mes rir igle tor le yebe hammaler.

17 Rechokla resa mmal ngo ye momay yar yengang irel mekla hammalel eklesia ila rebe luluwaley hare rebe harwowa paliyer. Mele ila ngalir chog rechokla ye kkel yar yengang irel yar yengang mo hammedaf. 18 Bo Babior we ye Santus ye sor bo, “Ho towe hogoyu yewal semal karbow irel yodla ho teptap le ye susur fedaley faesol ire kowe” iwe ngo “Chol yengang ila ye tugul le yebe yor paliyer.” Dt 25:4; Mt 10:10; Lk 10:7 19 Ho towe talenga mekla re sor le semal le yesa mal sa tayikof iyang, le hare yebe te rumal hare ye cholop tot le rebe mel bo tugul iyang. Dt 17:6; 19:15 20 Hobe ma kaftoroy ngalir panger rechokla re molfid mo luwul yarmat, ila ngo ikla sibis rebe motog.

21 Fael metael Deus mo Kristus Jesus mo angelus kala re santus ngo ibe kangalug le hobe taelenga pangal foloy ka, ngo ho towe hafobdirir sibis ngo ho hammaler sibis, bo hobe far haffidgirloh panger. 22 Ho towe nngat le hobe yetedah pom uwol semal hobe mapela bo yebe yangtali yengang la yael Samol. Ho towe dabey molfid kala yarmat rema foru. Hobe mel le hobe taldag.

23 Ho towe ma yul chog chael. Hobe ma yulmi sugfed wine bo yebe hamomayi lal siyem bo ila homa toa tomayloh chog.

24 Molfid kala yar tot yarmat ila ye mechrag yach gola, ngo yebe hamoloh mo imor irel tatelal hapatpat. Iwe ngo mekla molfidir ikla sibis ila bela wol miril loh ngo ye moch llah. 25 Wol ila sengal wegdeg ka ye momay bo ye mechrag le sibe gola. Ikla mwo ye weres la sibe gola ngo towe yoh le yebe mwol.