1 Vuꞌun Pabloun schiꞌuc ti Silvanoe, schiꞌuc ti Timoteoe, ta jtsꞌibaboxuc talel ti jcartacutic ta atojolic ti jchꞌunolajeloxuc ti oyoxuc ta jteclum Tesalónicae, ti oyoxuc ta stojol ti Jtotic Diose schiꞌuc ti Cajvaltic Jesucristoe. Ichꞌic bendición yuꞌun ti Jtotic Diose schiꞌuc ti Cajvaltic Jesucristoe. Acꞌo yacꞌboxuc jun avoꞌntonic.

2 Tey onoꞌox ta jvulesoxuc ta coꞌntoncutic ti cꞌalal ta jcꞌoponcutic ti Diose. Tey onoꞌox ta xcalbecutic vocol ta atojolic. 3 Yuꞌun ti cꞌalal ta xcalbecutic vocol ti Jtotic Diose, jaꞌ tey ta xvul ta coꞌntoncutic ti ta sjunul avoꞌntonic laꞌabtejic ti jech achꞌunojique, ti ta scꞌuxul avoꞌntonic laj avacꞌ abaic ta tunele, ti ta sjunul avoꞌntonic amalaojic ti Cajvaltic Jesucristoe. 4 Quermanotac, cꞌux ta xaꞌioxuc ti Diose. Jnaꞌcutic lec ti jaꞌ laj stꞌujoxuc ti stuque. 5 Yuꞌun ti cꞌalal laj calboxuc avaꞌiic ti colebal lequil achꞌ cꞌope, mu loꞌil cꞌopuc noꞌox laj avaꞌiic. Yuꞌun jaꞌ iꞌabtej smucꞌul stsatsal ti Chꞌul Espíritu ta atojolique. Jech o xal laj avaꞌiic ti jaꞌ melel ti lequil achꞌ cꞌope. Xanaꞌic lec ti laj jtucꞌulan jbacutic ta atojolic yoꞌ jech lec oyoxuque. 6 Jech ti voꞌoxuque laj achanic ti coꞌntoncutique. Laj achanbeic yoꞌnton ti Cajvaltic xtoque. Cꞌalal laj achꞌunic ti lequil achꞌ cꞌope, acꞌo mi toj ep laj avichꞌ avocolic, pero xamuyubajic xa yuꞌun ti Chꞌul Espíritue. 7 Ti jech icuch avuꞌunic ti avocolique, tey laj avacꞌbeic yilic ti jchꞌunolajeletic ti tey oyic ta yosilal Macedoniae schiꞌuc ti liꞌ oyic ta Acayae. 8 Voꞌoxuc ta aventaic ti maꞌuc noꞌox tey ta Macedoniae, ti liꞌ ta Acayae ti itanij avuꞌunic ti lequil achꞌ cꞌop yuꞌun ti Cristoe. Yuꞌun buꞌyuc noꞌox itanij batel avuꞌunic. Jech o xal buꞌyuc noꞌox aꞌyinbil acꞌoplalic ti achꞌunojic ti Diose. Ti jech taje, mu xa persauc ta xcalcutic ti acꞌoplalique. 9 Yuꞌun jaꞌ stuquic ti cristianoetique ta xalic ti ay calcutic avaꞌiic ti lequil achꞌ cꞌop ta atojolique. Jaꞌ jech xtoc ta xalic ti laj avichꞌicuncutic ta muqꞌue. Ta xalic xtoc ti laj xa avictaic ta yichꞌel ta mucꞌ ti cꞌusitic meltsanbil ta cꞌabale, yoꞌ jech laj xa avacꞌ abaic ta tunel yuꞌun ti batsꞌi cuxul Diose. 10 Jaꞌ jech xtoc ta xalic ti amalaojic ti ta xchaꞌsut talel ta vinajel ti Jesuse, ti jaꞌ Snichꞌon ti Diose, ti ichaꞌcuxesat yuꞌun ti Diose, ti jaꞌ jpojvanej cuꞌuntic yuꞌun ti tsots castigo ti ta xtale.