Ⅰ Foesũ mifɔ̃ bɔnaa lɔtɔ bɔkɔlɛ banɔkɔɛ̃ fɔtsa katsa, lɔkɔa bɔfɔnɛ kayɔkayi fɔtsa a kĩ bɛtsa nɛ Kristo akũ a awɛ buyi. Mitafɔ̃ bumuniki bɔnaayi kayɔ mɔ fɔtsa katsa nɛ ayekĩ bɔdani tɔwɔlɛ kamɛ, bɔfɔnɛ tudzuma kĩ tɛla nfasɔ, mɔ ayekĩ bɔtɛ Baguma budo, Ⅱ mɔ fɔtsa katsa nɛ mui kawɔla amaniɛ, awɛ kate nɛ bati akũ, kayidza kato kanɔkpa mɔ kadzɛmɛna nkaɛ a akũ. Ⅲ Mifɔ̃ bɔnaa lɔtɔ bubo anɛ! Ade lɛtsa a kĩ ntɛ Baguma tunɔ ni, bɔ́akɛna a.

Ⅳ Kitonɛkĩ nde bati a kĩ bimuniki nɛ be katɛkado liti a, aapuli bibuki bɛdani tɔwɔlɛ kamɛ? Bɛna nɛ Baguma ɔhaĩ kamɛ tɔ̃ bɛta ode futetsa a onukpɛ̃ bɛmɔ́, bɛna Hũhũ Kpalɛwa a lɛmɛ tsɛfã. Ⅴ Ade bɛta lɛtsa wĩ a kĩ lideĩ nɛ Baguma kalɛ kamɛ a onukpɛ̃ bɛmɔ́, bɛna katinya a kĩ kaaya a kamɛ kɔbɛ̃ a tsɛfã a. Ⅵ Lɛmɛ bimuniki nɛ be katɛkado liti! Bɛláapuli bimuniki mɔ be bibuki bɛdani tɔwɔlɛ kamɛ, kitonɛkĩ bibuki babɔa Baguma Obi a nɛ asendua akũ, kado ye kɔnyɔã nɛ kanade.

Ⅶ Baguma ahila tite a, kĩ tamɔa oni mui kafɔ̃ futse amɛ nɛ te akũ kana nfasɔ kakpa bikĩ be sũ banɛ fɔba nɛ te akũ a. Ⅷ Lɛmɛ ntɛ fu mɔ tuwĩ kpa mɛ nɛ te akũ ni, nfasɔ adima lɛláa te akũ. Baguma aapuli edumu te ade nɛ kawũna kamɛ a, baapila te mɔ fi.

Ⅸ Nwaɛ̃ amɛ, titɔ kĩ bɔlɛ foe lɔmɔ malo ni, mi kɔ̃ bɔtɛ budo kĩ minyina fɔtsa wĩ a kĩ fɔnɛnɛ fɔbɛ̃, kĩ fɔ́afɔ̃ mina nkpã katɛ. Ⅹ Kitonɛkĩ Baguma lɛ́nyɛ oti kĩ yaádã kpĩĩ, kĩ yaálɛla adzuma a kĩ mikɛna mɔ ɔdɔ a kĩ minyɛ mitsa nɛ yĩ dĩ sũ. Mibumɛna mi bakɔba Kristofɔ ade milamɛna be kabumɛna finyaa malo a. Ⅺ Boe kawɛ mɔ ɔsĩ nyɛ kĩ mi kamɛ odi nyɛ odi epi ye mbɔdi kabɔa kamɛ lɔmɔ kɛnaawo kawũna, ayekĩ mi awɛ aata lɛtsa a kĩ de akũ miate anɛ a. Ⅻ Bɔtáwɛ kĩ mikɛna ɔnyɔnɛ, mbom mikɛna fɔtsa ndɛ bati kĩ bɛtɛ bido, kĩ bideĩ ɔwɔlɛ bɔɛɛ, kĩ foesũ bɛna fɔtsa a kĩ Baguma lɛ eyi kĩ yaakpa a.

ⅩⅢ Kĩ Baguma lɛ eyi kĩ yaakpa Abraham fɔtsa a, ɛtani ye mɔawɛ akũ ɛkpa ye, kitonɛkĩ odima lɛbɛ̃ ye Baguma kĩ yaatani. ⅩⅣ Ɛlɛ kĩ, “Maahila nɔ ade maakpa nɔ babi mɔ bawa beblebee lɛmɛ a.” ⅩⅤ Abraham na ɔwɔlɛ bɔɛɛ, foesũ ye awɛ ta lɛtsa a kĩ Baguma ke otse kĩ yaakpa ye a.

ⅩⅥ Bati atani fɔtsa kavɛ lɛtsa a kĩ lɛbɛ̃ be a kakɔa katsua fɔlɛtsa kavɛlɛ a kamɛ. ⅩⅦ Ade foesũ Baguma tani fɔtsa nɛ ye bɔhɛ a akũ a, kitonɛkĩ ɛwɛ kĩ foe kamɛ fɔkpalɛ bikĩ baatɛ lɛtsa a kĩ ɛlɛ eyi a kĩ ye nhihiɛ lɛláavɛmɛna da. ⅩⅧ Foesũ Baguma kɛna fɔtsa nviã kĩ fɔnyɛ bɔhɛ mɔ katani, kĩ fɔláapuli fɔdani, ade Baguma lɛmɛ lɛláapuli ɛma fɔvã nɛ foe akũ a. Nɛ fukĩĩ sũ ni, boe a kĩ bulo bɔnatani ye a bubuki bɔana ɔwɔlɛ, bɔate anɛ nɛ lɛtsa a kĩ ɛlɛ eyi kĩ yaakpa boe a akũ. ⅩⅨ Budeĩ kɔnɛte kĩĩ bɔkpa boe akũ nɛ boe kadzi kamɛ, ndɛ ayekĩ kutse tunu api koe kadzɛla kpli a. Kɔnɛte a akpã boe katsãmɛna lima a kĩ litsua kɔla a kamɛ kawomɛna nɛ kakɔ kpalɛwa flee a. ⅩⅩ Ade awĩ Yesu nya lɔtɔ ewo ndɛ boe lɔtɔ ɔnyanɛ aye, ɛdani daa Ɔsɔfɔnɔkɔɛ̃ Flee nɛ Melkizedek osi a akũ a.