Ⅰ Mi babisɛ̃, mibu mi bamanɛ, kitonɛkĩ Kristo kamɛ lɛkɛnana wĩ fɔanɛ kĩ miakɛna. Ⅱ Mbla atɔnyade kĩ nfasɔ deĩ nɛ ye akũ nyɛ kĩ, “Bu aga mɔ ama, Ⅲ ayekĩ nɔ kadzi kamɛ aalɛ, odzi nkpã gɛlɛɛlɛ nɛ tite akũ.”

Ⅳ Mi balɛga, mitakado mi babi kalɔkpa, mbom midɔɔla be kadɔɔla wĩ, mivɛlɛ be, mikpa be kɔdɛ nɛ boe Ɔlate osi a akũ.

Ⅴ Mi basate, mibu mi tite akũ balate nɛ libe mɔ kukũtila kamɛ. Mikɛna foe mɔ mi tɔwɔlɛ flee ndɛ ayekĩ míasum Kristo. Ⅵ Mitakɛna foe anɛ kamɛ kɛkɛ kasum, ayekĩ baamu mi sũ, mbom ndɛ Kristo basumunɛ aye ni, mikɛna lɛtsa a kĩ Baguma awɛ a futo mi tɔwɔlɛ flee kamɛ. Ⅶ Mikɛna mi basate tudzuma nɛ kawɔlɛ kamɛ ndɛ boe Ɔlate miasum, kĩ nnɛ́ batidziwa miasum. Ⅷ Mite anɛ kĩ boe Ɔlate aase odi nyɛ odi kɔtɔ nɛ adzuma wĩ a kĩ ɛkɛna a akũ, ntɛ ɛnyɛ ɔsate ĩye edzi ye akũ akũ.

Ⅸ Mi balate lɛmɛ, kɛnɛ kĩ miakɛna foe lɔmɔ mikpa mi basate, lɔkɔa mifɔ̃ be libe kado. Mite anɛ kĩ mi atsu nviã a flee Ɔlate mɔapɛ mideĩ nɛ ode, kĩ yaadzɛmɔ odi nyɛ odi, ade ɛláadã odima anɛ a.

Ⅹ Ke kawũna kamɛ a, mi ɔmɔa kakɛna mɔ boe Ɔlate ɛna ɔsĩ ebu, fɔtsã ye kɔbɛ̃ kpale akũ. Ⅺ Mibla kawũkanɔ fɔtsa flee a kĩ Baguma kpa mi a, ayekĩ míapuli miyidza midza nɛ Abonsam tɛdake tisi a akũ. Ⅻ Kitonɛkĩ nnɛ́ bɔmɔ́ batidziwa lamɛna kawũ kanɔ, mbom bɔmɔ́ ablɔ hũhũ kpa kĩ edeĩ kɔbɛ̃ nɛ ɔwɛ kamɛ, hũhũ kĩ yanya akũ, hũhũ kĩ edeĩ otumi, mɔ hũhũ kpa kĩ edeĩ nɛ ɔtũ katinya kĩĩ kamɛ lamɔ kanɔ. ⅩⅢ Foesũ mibla Baguma kawũkanɔ fɔtsa flee a finyaa, ayekĩ ntɛ Luwi kpa a ya ni, míapuli midza minɔ kawũ a minaawũna, mibuki mina kɔbɛ̃ nɛ mi kamɛ.

ⅩⅣ Foesũ mina nɛ kukũmanɛ kamɛ, mikɔa ɔnɔkɔali mibɔa abɔsɔ, mikɔa tuwĩ kakɛna misua mi ɔwɔlɛ ndɛ tɔwɔlɛ libĩĩ katɛ sɔbɔtsaɛ aye. ⅩⅤ Ade mina nɛ kukũmanɛ kamɛ milɛ lukudɔ Kalɛ Wĩ a kĩ kɛnyɛ mi kawũkanɔ tɛpambua kĩ miado. ⅩⅥ Lɔkɔ nyɛ lɔkɔ ni, milɛ katɛkado ndɛ fubĩĩ katɛ sɔbɔtsaɛ, kitonɛkĩ ade foe bɔakɔa budina fubĩĩ mɔ fi a kĩ Okesĩnɛ a atalɛ a. ⅩⅦ Mitsa Baguma nkpã katɛ a ndɛ sɔbɔtsaɛ lɔbɔɛ aye, milɛ Baguma kalɛ a ndɛ lɛpamɛ gɛlɛɛlɛ kĩ Hũhũ a kɔa edo nɛ mi awɛ. ⅩⅧ Mikɛna fukĩĩ flee nɛ mpaɛbɔ kamɛ, mikaavia Baguma kabumɛna. Mifɔ̃ Hũhũ a ɛkpã mi mibɔa mpaɛ nɛ lɛtsa nyɛ lɛtsa kamɛ. Nɛ foesũ ni, mina nɛ kukũmanɛ kamɛ, mitafɔ̃ akpɔ liveli mi. Mibɔa mpaɛ daa nɛ bati a kĩ bɛkpalɛ be akũ a flee lɔlɔ.

ⅩⅨ Mibɔa mpaɛ nɛ yĩ malo lɔlɔ kĩ Baguma edo yĩ fɔlɛtsa wĩ nɛ onukpɛ̃, ayekĩ ntɛ maalɛ kɔdzɛla ni, maapuli ndo ɔwɔlɛ ĩnyɛ Kalɛ Wĩ fɔlɛtsa kɔlawa a ntsa bati. ⅩⅩ Baguma Kalɛ Wĩ kĩĩ fɔtɔ ɔnyanɛ manɛ sũ, ade foesũ nwaa kɔla malo a. Mibɔa mpaɛ mikpa yĩ kĩ mpuli ndo ɔwɔlɛ nlɛ Kalɛ Wĩ a ndɛ ayekĩ fɔfɛta.

ⅩⅪ Tihiko, boe ɔwaɛ̃ paa, kĩ ɛnyɛ boe Ɔlate adzuma wĩ ɔkɛnanɛ a, aaya nɛ awã, ebi mi yĩ akũ fɔlɛtsa, ɛfɔ̃ minyi ayekĩ nlamɛna adzuma a. ⅩⅫ Kado ndo ye nɛ mi sɛkɛ̃ kĩ ɛyaabi mi ayekĩ boe flee bɔlamɛna adzuma nɛ awĩ, lɔkɔa edo mi kɔbɛ̃ lɛmɛ.

ⅩⅩⅢ Baguma boe Ɔlɛga mɔ boe Ɔlate Yesu Kristo bɛkpa boe bawaɛ̃ a flee lukudɔ, ɔdɔ mɔ katɛkado. ⅩⅩⅣ Baguma ɛmɔ be flee a kĩ bɛkɔa ɔdɔ kĩ ɛla kawũna a bawɛ boe Ɔlate Yesu Kristo kalɛ a kɔnya.