1 Hi APU DIOS an nangibiklag hi kabunyan ya nunlutuh luta ya nangidat hi biyag di tagu ya hituwey kanana mipanggep hi Israel: 2 “Pumbalinok di Jerusalem ya Judah an kay mainum an butongonay tatagu nadah nunlinikkod an boblen mangipaeh titindalun e mangubat ke dida. 3 Kediye ya pumbalinok boy Jerusalem an paddungnay makaddam-ot an batu ta nadan mangipatnan e mundulig kediye ya maipit da.

4 Kediye ya adugak nadan iJudah ta maid di aton nadan buhul dan dida. Kulapok ya patakutok di kakabayu da ya talakok di nomnom nadan numpuntakke. 5 Ne kanan nadan aap-apun di Judah hi nomnom day ‘Nakal-ot nadan tatagud Jerusalem te hi APU DIOS an Kabaelanan am-in an Dios da.’

6 Kediye bo ya pumbalinok nadan aap-apud Judah an kay apuy nah muyung ya kay apuy nah dandanin maaniy page ta dadagon da nadan nunlinikkod an boble, mu hay Jerusalem ya malinggop an mapnuh tatagu. 7 Mamangulun pangapputok nadan udum an iJudah ta nadan tatagud Jerusalem ya nadan holag David ya adida matmatbal mu nadan udum an tatagud Judah. 8 Kediye ya ipaptok ku nadan tatagud Jerusalem ta nan nakakkapuy ke dida ya mumbalin dan nakakkal-ot an umat ke David an patul handi. Hanadan holag David di mumpatul ke didan kay ha-oy weno hay anghel ku mismuy patul da. 9 Ya dadagok am-in di tataguh kabobboblen mangubat hi iJerusalem.

10 Ahik wadaon hanadah holag David ya tatagud Jerusalem di homok ya pamhod dan mundasal. Ta hantuh pangang-angan dan ha-on an nahudpak hi pahul* 12:10 Juan 19:37 ya namahig an u-umyung da umat nah ammod an u-umyung gapuh natayan di binugtung an imbabale na ya umat bo nah ammod an natey panguluwan an imbabale nan lalaki. 11 Ya kediye ya namahig an u-umyung nadan tatagud Jerusalem, umat hi u-umyungan handidan tatagun mipanggep Hadad Rimmon an dios da nah nundotal an bobled Megiddo.

12-14 Ahi u-umyung am-in di pamilyan di holag David, hi Nathan, hi Libay ya hi Simei ya nadan udum an pamilya. Om, am-in datuwen pamilya ya ahida u-umyung.”