1 Handih um-umbun kami nah pingngit di wangwang ad Babilon ya kumkumga kamin munnomnomnom nah boble mi an Zion. 2 Ot ihable mi nadah kaiw an willow nadan gitala mi. 3 Adimi pinhod an ikantaan nadan buhul min nangialin dakamih tu ot mumbalin kamin balud. Deke on kanan dan dakamiy “Ikantaan dakamih mipanggep hi Zion.”

4 Mu nganney innun min mangikantah pundayaw min APU DIOS hituh boblen di udum an tatagu? 5 Takombo kattog di mama-id di laing kun munggitala hin iwalong daka Jerusalem an boble mi. 6 Ya takon di mipkot di dilak hi alangngaang ku hin kal-iwak di mipanggep hi Jerusalem an boble mi ya hin hay udum an bobley umipaamlong ke ha-on.

7 APU DIOS, nomnomom di inat nadan iEdom handih hinggop day Jerusalem ot muntukuk dan kanan day “Pakadadaggon takuh tuwen boble! Ya paluwon takun am-in di babale.”

8 Dakayun tatagud Babilon, ahi kayu madadag. Ahi umamlong nan tagun mangibaloh inat yun dakami. 9 Om, umamlong nan tagun mangigutob hi iimbabale yu ta mate da.