1 Apu Dios an daydayawok, donglom anhan tun ibagak ta adim pamgay op-opya. 2 Te nahalman an makallangkak ya gaga-iho hantudan tatagun dakol di ipabahul dah adi makulug ke ha-on. 3 Ya gaga-ihoy kalyon dan ha-on ta labanonak yaden maid di gapuna. 4 Makibuhul dan ha-on takon di pinhod ku dida ya idasadasalak dida. 5 Ballohan day maphod an atok ke didah gaga-iho. Ya ballohan dah hingit di pamhod kun dida.

6 Pumili kah gaga-ihon huwes an munhumalya nah buhul ku. Ya tudduwom on munlangkak an tagut kalyonan numbahul hidiyen buhul ku. 7 Ta deket ie dah korte ya kalyon day numbahul. Hana ot ta takon nan dasal na ya mibilang an bahul. 8 Ya hana ot ta gagalan mapoppog di nitaguwanat hinnatkon mon taguy mihannot nah ngunu na.* 109:8 Tibon yuy Acts 1:20. 9 Hana ot ta mapuh-ig day iimbabalena ya mabalu nan inayana. 10 Hana ot ta madadag di punhituwan nadan imbabalenat eda mo humanawwangan ya eda mo mungkodkoddoh kanon da. 11 Hana ot ta alan nadan immutanganay nganneh diyen limmuna. Ya hana ot ta alan di hintaguwan am-in di nun-aatuwana. 12 Hana ot ta maid di umulen hiya weno mangipaptok nadah napuh-ig an imbabalena. 13 Hana ot ta maten am-in di holag nat makal-iwan di ngadana. 14 Hana ot ta adi kal-iwan APU DIOS nadan gaga-ihon inat handidah aammod na, takon nadan gaga-ihon inat inana. 15 Ya hana ot ta adi kal-iwan APU DIOS di liwat dan am-in ya hana ot ta makal-iwan dat nangamung. 16 Te namahig hidiyen tagun maid anhan di kananat umuleh ibbanan tagu. Pinaligat na ya numpate na nadan nawotwot ya makahkahmok an tatagu. 17 Gagaid an mun-idut hi ibbanan tagu. Kinali hana ot ta maat ke hiya nadan idut na. Adina pinhod an mabendisyonan di ibbanan tagu. Ya hana ot ta maid damdamay bendisyon ke hiya. 18 Nadadawo tuwalin mun-idut umat hi pumbulwatiyana. Hana ot ta nan idut na ya umat nah danum an inumona ya umat nah makan an kanonat itmog di adol na. 19 Ya hana ot ta mibangngad ke hiya nadan idut nan paddungnay milibbut ke hiya umat hi bulwati weno paddungnay milibod ke hiya umat hi balikit.

20 APU DIOS, hana ot ta dadiyen idut nadan buhul ku ya diday kiatana. 21 Mu ha-oy ke pe ya baddanganak ke he-a APU DIOS an Nakattag-e ta patibom ke ha-on an maule ka tuwali. Ta ihwangak anhan gapuh pamhod mu. 22 Makakkahmokak ya u-umyungak an abu, kinali makahhapul kuy baddang mu. 23 Kayak a-on mungkauma ya umatak nah ba-atong an nalakan maabul. 24 Munggagayonggong di lulug kuh nuntopolak an uggeyak nangan ot makakkuugak an ammuna moy gunit ku ot mablatan. 25 Deket tinibowak hi tatagu on katataw-anak ya munwigiwig dah panaltalangga dan ha-on.

26 Baddanganak ya ihwangak anhan, APU an Dios ku gapuh ongal an pamhod mu. 27 Ya ipainilam hanadah buhul kun he-ay mangihwang ke ha-on. 28 Ta takon di idutanak ke dida ya bendisyonanak ke he-a. Ya hana ot ta didan nangipaligligat ke ha-on ya mibabain da. Mu ha-on ken muttatyum ya paamlongonak. 29 Adim iabulut an mangapput dadiyen buhul kut mibabain dat nangamung.

30 APU DIOS, ahik ikantay pumpasalamat ku ya pundayaw kun he-a nah kaamungan nadan tatagun mundayaw ke he-a 31 te gagaid kan bumaddang nadah nawotwot ta ihwang mu dida nadah mangipipaten dida.