1 Tibom anhan, APU DIOS di atom te mungkamaid da moy mangun-unud ke he-a. Maid moy damanan pundinolan takon di oha. 2 Takon di hinag-on da ya langkakan da te man-ut maphod di kalyon da, mu gaga-ihoy wadah nomnom da.

3 Upupom, APU DIOS di tokon nadan athidin tatagu te man-ut maphod di kali da muden gaga-ihoy wadah nomnom da. Ya upupom damdamay tokon nadan mumpahhiyan kanan day 4 “Mahapit taku, kinali nalaka takun ihapitan di dahdin tagut apputon taku. Ya dahdiy kabaelanan mangipatikod ke ditaku nadah pinhod takun aton?”

5 Mu himmumang hi APU DIOS an kananay “Tinibok di ma-ma-at nadah mahmok ya nawotwot an tatagu. Ya dingngol kuy palak da gapuh namahig an punholholtapan da. Ta hidiye nan umaliyak ta ihwang ku dida te hidiyey nabayag an hahad-on dan atok.”

6 Am-in di kalyon APU DIOS ya makulug ya midinol, umat nah nakammahman silber an namimpitun nalanat, ta hidiye nan adi e punhalinduwaan di kalyona.

7 Ot gapu te athidi ya inila mi, APU DIOS an ipaptok mu nadan mipaligligat an tatagu ya ihwang mut nangamung didah ad-adin aton nadan gaga-ihon tatagu, 8 te takon di kay da hiyyahiyyan mundaldallan ya pakatoballon am-in di tataguy gaga-ihon at-atton da.