1 APU DIOS an mangitakdog ke ha-on, humangom anhan di dasal ku. Deket waday kabulubulunak on baddanganak ke he-a. Kinali daan mo anhan ta homkonak bod uwanit donglom tun dasal ku.

2 Dakayun tatagu, tipe anhan ta pinhod yun abun pa-iyon di ngadan ku? Kon-anat ahiyu itikod an mumpabahul hi langkak ke ha-on?

3 Hituwey nomnomon yu: Hi APU DIOS ya inappil na nadan mangun-unud ke hiya te diday tataguna. Deket mundasalak ke hiya ya humangonay dasal ku.

4 Dakayun tatagu, deket waday bimmoh-olan yu ya tibon yu ta bokon hidiyey humlun hi punliwatan yu.* 4:4 Tibon yuy Ephesus 4:26 Pakannomnomon yuy mipanggep ketuwe ten mibakbakillang kayu nah hilong.

5 Mundinol kayun APU DIOS ya iappit yuy lebbengnan miappit ke hiya.

6 Wada day tatagun kanan day “Dahdi anhan di bumaddang ke dakami?”

Kinali, APU DIOS, ipatibom anhan di ulem ke dakami.

7 Ong-ongal di indat mun ha-on hi pun-amlongak mu nadan pinuppumhod di inliyak da ya dakol di mainum an kinapya da.

8 Makallinggopak, kinali makahhuyopak nah hilong te ipaptokak ke he-a, APU DIOS, ta maid di maat hi ad-adi.