1 Ha-oy an hi Nehemiah an gobernador an imbabalen Hakaliah di oha nadah numpelma. Ya ibbak an numpelma datuwen papadin nitudok di ngadan da.

2-8 Datuwe nadan papadin numpelma: hi Sedekiah, hi Seraiah, hi Asariah, hi Jeremiah, hi Pashur, hi Amariah, hi Malkijah, hi Hattus, hi Sebaniah, hi Malluk, hi Harim, hi Meremot, hi Obadiah, hi Daniel, hi Ginnethon, hi Baruk, hi Meshullam, hi Abijah, hi Mijamin, hi Maasiah, hi Bilgai ya hi Semaiah.

9-13 Ya datuwe nadan ibbadan holag Libay an numpelma: hi Jeshua an imbabalen Asaniah, hi Binnui an imbabalen Henadad, hi Kadmiel, hi Sebaniah, hi Hodiah, hi Kelita, hi Pelaiah, hi Hanan, hi Mika, hi Rehob, hi Hashabiah, hi Sakkur, hi Serebiah, hi Sebaniah, hi Hodia, hi Bani ya hi Beninu.

14-27 Datuwe damdama nadan aap-apun numpelma: hi Paros, hi Pahat Moab, hi Elam, hi Sattu, hi Bani, hi Bunni, hi Asgad, hi Bebai, hi Adonijah, hi Bigbai, hi Adin, hi Ater, hi Hesekiah, hi Assur, hi Hodiah, hi Hashum, hi Besai, hi Harip, hi Anatot, hi Nebai, hi Magpias, hi Meshullam, hi Hesir, hi Mesesabel, hi Sadok, hi Jaddua, hi Pelatiah, hi Hanan, hi Anaia, hi Hoshea, hi Hananiah, hi Hasub, hi Hallohes, hi Pilha, hi Sobek, hi Rehum, hi Hasabnah, hi Maaseiah, hi Ahia, hi Hanan, hi Anan, hi Malluk, hi Harim ya hi Baana.

28-29 Am-in dan holag Israel an adi makihayyup nadah nakiboblen dida mipuun hi Tugun Apu Dios an dida nadan padi, nadan holag Libay, nadan mungkanta, nadan mungguwalya, nadan mungngunuh Templo, nadan inayan da ya imbabale dan damanan makaawat ya nid-um da nadan aap-apu da ot isapata dan paka-un-unudon day tugun APU DIOS an Ap-apu da. Ya insapata da bon takon di maidutan da hin ibahho dan un-unudon hidiyen Tugun an indat nan Moses an muttatyu na.

30 Ya isapata min adi kami makiapu nadah udum an tatagun nakiboble tuh boble mi. 31 Adi kami gumatang ten immialiy udum an tatagun munggattang ke dakami nah Sabadu weno nah udum an nangilinan an algo. Ya adimi liyakon di payo mi nah mikapitun toon. Adimi singilon di impautang mi nah mikapitun toon.

32 Ya katootoon on mun-amung kamih silber ta un-unudon min idat mi nan buwis di Templo. 33 Ya dakamiy nangamung nadah mahapul hi pundayawan nah Templo, umat hi tinapay, boga, nadan aggayam an maghob hi kabigabigat ya nadan miappit nah piyesta nah ka-budal di bulan ya nah udum an piyesta, nadan udum an pun-appitan, nadan miappit ta makaan di liwat am-in di holag Israel ya nadan udum an mahapul nah Templo.

34 Dakami nadah tatagum an papadi, nadan ibba dan holag Libay ya mumbubunut kamih katootoon ta maptok nan pamilyan mangidadaan nah kaiw an mahapul hi punggohoban nah miappit ke he-a, APU DIOS an Dios mi mipuun nah Tugun.

35 Ya ie mih Templo nadan mamangulun aniyon mi nah hintoon takon nan mamangulun mal-um an bungbunga-an. 36 Athidi bo nah panguluwan an lalakin imbabale min ie mi nah Templo ta idawat nan padi ke Apu Dios te hidiyey kanan nan tugun. Ya iappit mi nadan namangulun impan di baka mi ya kalnero mi weno gulding mi. 37 Ya ie mi nadah padi nah Templo nadan mamangulun alinan kapyaon mi nah mamangulun aniyon mih katootoon ya nadan udum an miappit umat hi mainum, lanan di oliba ya am-in di klasen bungbunga-an ya takon nan mikapuluh aniyon min inliyak mi. Ya idat mi nadah holag Libay nadan mikapulun in-appit min bungan di intanom mi te dida nadan nip-ong nadah boble min mangamung ke dadiyen idat mi. 38 Waday hin-oh-an padin holag Aaron an maki-e nadah holag Libay hi hin-oh-an boblen e mangamung nadah mikapuluh bungan di intanom mi. Ta dadiyen mikapulun inamung nadan holag Libay ya mie nah Templo. 39 Hanadan holag Israel ya nadan ibba dan holag Libay ya umiali dah iammung dan boga, mainum ya lanan di oliba an ie da nah bodegan di mausal hi Templo ya nah kiha-adan nadan padi, nadan mungngunu ya nadan mungguwalya nah Templo.

Ta adi miwalong hidiyen Templo.