7
1 Handih nagibbu nan binattun alad ya nun-iha-ad ku nadan hoob na ya tinudduk nadan guwalya, nadan mungkantah pundayawan ya nadan holag Libay an intudduk di ngunuwon da. 2 Tinudduk di duwan mumpaptok nah bobled Jerusalem an hay oha ya nan tulang kun hi Hanani. Ya nan oha ya hi Hananiah an ap-apun nadan mungguwalya te hiya ya maphod an tagu ya maid di umat ke hiyan paka-un-unudonah Apu Dios. 3 Kinalik ke didan mahapul an makabiggat on ahida imbughul nadan hoob ya paka-iddakkig da nadan onob ten nalin-ob di algo on ahi immanamut nadan guwalya. Ya tumuddu da nadah bimmobled Jerusalem hi mungguwalya nah naduttuk an pungguwalyaan da ya nadan udum ya mungguwalya dah pottok di babale da.
4 Hantun boble mid Jerusalem ya ambilog mu o-ohhay numboble. Ya takon di babale ya o-oha ni-an di nabohwat. 5 Hi Apu Dios ya impanomnom nan ha-on an amungok nadan tatagu ya nadan ap-apu da ya opisyal dat tibok nan dokumenton nitudkan di ngadan da hin niptok. Indani ya hinamak kuy nitudkan nadan namangulun nibangngad an nalpu nadah boblen nieyan da. Ya datuwey nitudok hidi.
6 Datuwe nadan nibangngad an ibbamin holag Israel an in-en Nebukadnesar an patul hidid Babilon. Nibangngad dad Jerusalem ya ad Judah an waday oha on nibangngad nah numboblayan na. 7 Mipuun hi grupun impangulun Serubbabel, hi Joshua, hi Nehemiah, hi Asariah, hi Raamiah, hi Nahamani, hi Mordekai, hi Bilsan, hi Misperet, hi Bigbai, hi Nehum ya hi Baanah.
8-25 Hituwey nitudok hi puun ya bilang nadan holag Israel an nibangngad an nalpu nadah boblen niayan da. Hay bilang di nahlag Paros ya 2,172, hi Sephatiah ya 372, hi Arah ya 652, hi Pahat Moab an aammod da Jeshua ke Joab ya 2,818, hi Elam ya 1,254, hi Sattu ya 845, hi Sakkai ya 760, hi Binnui ya 648, hi Bebai ya 628, hi Asgad ya 2,322, hi Adonikam ya 667, hi Bigbai ya 2,067, hi Adin ya 655, hi Ater (an hi Hesekiah di ohan ngadana) ya 98, hi Hashum ya 328, hi Besai ya 324, hi Harip ya 112, ya hi Gibeon ya 95.
26-38 Datuwe damdamay bilang nadan tatagun nibangngad an nalpu nadah numboblayan nadan aammod da: ad Betlehem ya Netopah ya 188, ad Anatot ya 128, ad Bet Asmabet ya 42, ad Kiriat Hearim, Kephirah ya Beerot ya 743, ad Rama ya Geba ya 621, ad Mikmas ya 122, ad Bethel ya Ai ya 123, nan ohan Nebo ya 52, nan ohan Elam ya 1,254, ad Harim ya 320, ad Jericho ya 345, ad Lod, ad Hadid ya Ono ya 721, ya ad Senaah ya 3,930.
39-42 Ya datuwe damdamay listaan nadan padin nibangngad: hay holag Jedaiah an holag Jeshua ya 973, hi Immer ya 1,052, hi Pashur ya 1,247 ya hi Harim ya 1,017.
43-45 Datuwey nibangngad an holag Libay: hay holag da Jeshua ke Kadmiel an holag Hodabiah ya 74, nadan holag Asap an mungkantah Templo ya 148, ya nadan mungguwalya nah Templo an holag Sallum, hi Ater, hi Talmon, hi Akkub, hi Hatita ya hi Sobai ya 138.
46-56 Ya hay holag nadan mumpungngunu nah Templon nibangngad ya hi Siha, hi Hasupha, hi Tabbaot, hi Keros, hi Sia, hi Padon, hi Lebana, hi Hagaba, hi Salmai, hi Hanan, hi Giddel, hi Gahar, hi Reaiah, hi Resin, hi Nekoda, hi Gassam, hi Ussa, hi Paseah, hi Besai, hi Meunim, hi Nephushesim, hi Bakbuk, hi Hakupha, hi Harhur, hi Baslut, hi Mehida, hi Harsa, hi Barkos, hi Sisera, hi Temah, hi Nesiah ya hi Hatipha.
57-59 Hanadan holag nadan muttatyun Solomon an nibangngad ya hi Sotai, hi Sopheret, hi Perida, hi Jaala, hi Darkon, hi Giddel, hi Sephatiah, hi Hattil, hi Pokeret Hassebaim ya hi Amon.
60 Hay bilang am-in di holag nadan mungngunuh Templo ya nadan muttatyun Solomon an nibangngad ya 392.
61-62 Hay nibangngad an holag dan Delaiah, hi Tobiah ya hi Nekoda an numbobled Tel Mela, Tel Harsa, Kerub, Addon ya Immer ya 642. Mu maid di ipatibo dah kitib-anan holag Israel dida.
63-64 Datuwe nadan kanan day padida, mu maid kayay dokumenton pangitib-an hin makulug an padida peman: hi Habaiah, hi Hakkos ya hi Barsillai. (Hituwen hi Barsillai ya nalahin hi oha nadah binabain imbabalen Barsillai ad Gilead mu ingngadanay ngadan di aman diyen babain inayana.) Mu gapu te maid di ipatibo dah kitib-anan makulug an holag Israel dida ya uggeda inabulut didan makid-um hanadah papadi. 65 Kinalin nan gobernador ke didan adida makikan nah niappit ke Apu Dios inggana waday padin mangusal nah Urim ya Tummim.
66-69 Hay bilang am-in nadan nibangngad ya 42,360. Hay bilang di muttatyu dan linalaki ya binabai ya 7,337. Hay bilang nadan binabai ya linalakin mungkanta ya 245. Hay bilang di kabayu da ya 736. Hay bilang di kabayun laba ya 245. Hay bilang di kamel ya 435. Ya hay bilang nadan donkey ya 6,720.
70-72 Hanadan udum an mangipangpangulu nadah pamilyan di holag Israel ya immidat dah ibaddang dan miusal nadah mahapul an mikapya nah Templo: hanan gobernador ya nahawwal hi pitun kilon balituk, 50 malukung, 530 bulwatin di padi; nadan mangipangpangulu ya immidat dah 170 kilon balituk, 1,461 kilon silber; hay in-ammung di udum ya 153 kilon balituk, 1,329 kilon silber, 60 bulwatin di padi.
73 Ot am-in nadan holag Israel, nadan padi, nadan ibba dan holag Libay, nadan guwalya nadah hoob nan boble, nadan mungkanta, nadan mungngunuh Templo ya numboble da nadah boble da.