1-2 Kanan APU DIOS ke Moses di “Kalyom hanadah holag Israel hituwe: Ha-oy di AP-APU an Dios yu. 3 Adiyu iun-unud hi pangi-en nadan tatagud Egypt an numboblayan yu handi. Ya adiyu iun-unud hi pangi-en nadan iKanaan an numboble nah boblen pangiayak ke dakayu. 4 Aton yuy pinhod ku ya un-unudon yuy tugun ku. Ha-oy di AP-APU an Dios yu. 5 Deket un-unudon yuy tugun ku ya maphod di kitaguwan yu gapuh pangatan yun dadiye. Ha-oy di AP-APU.

6 Datuwey tugun kun maunud. Adiyu ihuyop di iiba yu. Ha-oy di AP-APU an Dios yu. 7 Adiyu ihuyop hi inayu ta eyu babainon hi amayu. Nomnomon yu an hi inayuh diye. 8 Ya adiyu ihuyop di dahdin inayan amayu.

9 Adiyu ihuyop di tulang yun babain imbabalen amayuh hinnatkon an babai weno imbabalen inayuh hinnatkon an lalaki takon hin ugge nitungoh nunhituwan yu.

10 Adiyu ihuyop di inap-apuyun babai, te kibabainan yu. 11 Adiyu ihuyop di imbintan amayu te tulang yuh diye. 12-13 Adiyu ihuyop di babain tulang amayu weno tulang inayu te iban amayu ke inayu dida. 14 Adiyu ihuyop di inayan di tulang amayu ya tulang inayu ta adiyu babainon dida te ammodon yu dida. 15 Adiyu ihuyop di inapu yun babai, te inayan di imbabale yu. 16 Adiyu ihuyop di inayan di tulang yu ta adiyu babainon di tulang yu.

17 Adiyu ihuyop di hin-ina. Ya adiyu ihuyop di inap-apuna te gaga-iho.

18 Adiyu iiney tulang di inayan yu ten matagu nan inayan yu.

19 Adiyu ihuyop di babain waday malpuh adol na te hiya ya mibilang an adi malini.

20 Adiyu ihuyop di inayan di hinag-on yu te mibilang kayun adi malini.

21 Ya adiyu iabulut an miappit di imbabale yu ke Molek te babainon yuy ngadan ku. Ha-oy di AP-APU.

22 Adi mabalin an ihuyop di lalakiy ibbanan lalaki te gaga-ihon abuh diye.

23 Adi mabalin an ihuyop di babai weno lalakiy aggayam te mibilang an adi maliniy ohan tagun mangat hi athidi ya himpappangeh tuwen aton di ohan tagu.

24 Adiyu aton dadiye ta adi kayu mibilang an adi malini te athidiy inainat nadan tatagu nadah boblen pangiayak ke dakayu. Nibilang dan adi malini, kinali dog-alok dida. 25 Ta gapun dadiyen inat da ya numbalin an adi malini nan boble dat hidiye nan kastiguwok didat makaan dahdi. 26 Mu dakayu, takon nadan nakiboblen dakayu ya mahapul an un-unudon yuy tugun kut adiyu aton datuwen gaga-iho.

27 Handidan numbobleh di ya inat da nimpen am-in dadiyen umipaboh-ol ot mumbalin di boble dan adi malini. Mu dakayu ya nadan nakiboblen dakayu ya adinadaman eyu aton dadiye. Mahapul an un-unudon yuy tugun ku. 28 Deket aton yu damdama dadiye ya balawon dakayu nah luta umat nadah numbobleh din balawon nan numboblayan da dida. 29 Deket wadan dakayun holag Israel di mangat hi athidi ya adi mo makid-um hi tataguk. 30 Un-unudon yuy tugun ku ya adiyu un-unudon di aton nadan tatagun numboble nah pangayan yun eyu pumboblayan ta adi kayu mibilang an adi malini. Ha-oy di AP-APU an Dios yu.”