1 Kanan bon APU DIOS ke Moses di 2 “Kalyom ke Aaron, nadah imbabalena ya nadah holag Israel hituwen mahapul an un-unudon da.

3-4 ‘Deket mun-appit di holag Israel hi lakin baka, hay impan di kalnero weno hay gulding nah kampu weno hi e-elena ya mibilang an nunliwat hidiyen tagu ten bokon nah hogpan hi Tabernacle di pun-appitanat ipresentanan iappit ke APU DIOS. Ta gapun diye ya adi mo makid-um hi tatagun APU DIOS. 5 Man-uket wadah tuwen tugun ya ta ialin nadan holag Israel ke APU DIOS nadan eda ianappit hi kumpulnan lugar. Mahapul nimpen iali da dadiyen iappit nan APU DIOS nah padi nah hogpan hi Tabernacle ta iappit nan pakihayyupan dan APU DIOS. 6 Iwaghik nan padiy dalan nan aggayam nah altar ya gobhona nan taba te pinpinhod APU DIOS di hamuy na. 7 Mahapul an itikod nadan holag Israel an mun-appit nadah dimonyo ta iohha dan APU DIOS di pundayaw da. Ya mahapul an un-unudon dat nangamung hituwen tuguna.’ ”

8 Kalyom bon didah tuwe: “Hanan holag Israel weno hintaguwan an nakiboblen man-ut mun-appit ke APU DIOS hi maghob, 9 mu adina iali nah hogpan nah Tabernacle ya adi mo makid-um hi tatagun APU DIOS.

10 Ya deket kanon nan holag Israel weno dahdin nakiboble nan aggayam an ugge nakaan di dalana ya adi mo mibilang an tagun APU DIOS ya adi mo makid-um hanadah tataguna. 11 Te hay dalay kawad-an di biyag, kinali iolden APU DIOS an mie nah altar nan dala ta makaan di liwat di tagu. 12 Kinali intugun APU DIOS an adi mabalin an ihdan di holag Israel ya nadan nakiboblen diday dotag di aggayam an ugge nakaan di dalana.

13 Hanan tagun mampap hi aggayam weno hamutin mabalin an mihda ya mahapul an ipatodtod nay dalana ne tinab-unanah luta. 14 Hay biyag di aggayam ya wadah dalana. Kinali intugun nimpen APU DIOS nadah holag Israel an adida kanon weno inumon di dalan di aggayam ya hamuti. Ta hidiye nan deket adi un-unudon nan tagu ya adi makid-um hi tatagun APU DIOS.

15 Hanan tagun mangan hi dotag di aggayam an nate weno pinaten di mailom an aggayam ya mahapul an ibalbal nay bulwatina ya mun-amo, mu nanongnan mibilang an adi malini inggana hilong. 16 Deket adina un-unudon hituwe ya makastigu.”