1 Hay mikadwan nabunut an midatan hi luta ya nadan holag Simeon. Waday udum an boblen nidat ke dida nah lutan nadan holag Judah.

2 Datuwe nadan boblen nidat ke dida: Beersheba an kanan dan Seba, Moladah, 3 Hasar Sual, Balah, Esem, 4 Eltolad, Bethul, Hormah, 5 Siklag, Bet Markabot, Hasar Susah, 6 Bet Lebaot ya Saruhen. Himpulut tuluy bilang nadan o-ongal an boble ya nid-um nadan i-itay an bobleh di.

7 Hay udum pay an bobleh di ya Ain, En Rimmon, Ether ya Ashan. Opat datuwen o-ongal an boble ya nid-um nadan i-itay an bobleh di. 8 Ya nid-um pay nadan i-itay an bobleh nunlinikkod ingganad Baalat Beer an Ramah di ohan ngadanan wadah nangappit hi south.

Datuwen bobley nidat nadah holag Simeon an pumboblayan da. 9 Gapu te ong-ongal di lutan nidat hi holag Judah mu hay mahapul da ya nidat di udum hi boble da nadah holag Simeon.

10-12 Hay mikatlun nabunut an nidatan hi luta ya nadan holag Sebulun. Hay sakup di lutan nidat ke dida ya dimmatong ad Sarid. Nipalpuh di ot mumpaeh nangappit hi kalin-oban di algod Maralah ot dumatong ad Dabbeshet ya nah pingngit nan ittay an wa-el nah nangappit hi timilan di algod Jokneam. Ya mipalpu nah binnah-el di Sarid ya numpaeh nangappit hi timilan di algo nah pingngit di Kislot Tabor ingganad Daberat ot mumpatikid ad Japhia. 13 Nangngenangnge ingganah nangappit hi timilan di algo ot mipalpuh di ya numpae bod Gat Hepher ya Et Kasin ot mumpalikkod ad Neah ingganad Rimmon. 14 Hay poppognah nangappit hi north ya numpaed Hanaton ot mipoppog nah Nundotal an Iptahel. 15 Ya nid-um di Kattat, Nahalal, Simron, Idalah ya Betlehem. Himpulut duwan o-ongal an boble datuwe ya nid-um nadan i-itay an bobleh di.

16 Datuwen bobley nidat nadah holag Sebulun an pumboblayan da.

17 Hay nikap-at an nabunut an nidatan hi luta ya nadan holag Issakar. 18 Datuwe nadan boblen nidat ke dida, Jesreel, Kesullot, Sunem, 19 Haparaim, Sion, Anaharat, 20 Rabbith, Kishion, Ebes 21 Remet, En Gannim, En Haddah ya Bet Passes. 22 Hay poppogna ya dimmatong ad Tabor, Sahasumah ya Bet Semes ot mipoppog nah Jordan. Himpulut onom di bilang datuwen o-ongal an boble ya nid-um nadan i-itay an bobleh di.

23 Datuwen bobley nidat nadah holag Issakar an pumboblayan da.

24 Hay nikaliman nabunut an nidatan hi luta ya nadan holag Asher. 25 Datuwe nadan boblen nidat ke dida, Helkat, Hali, Beten, Aksap, 26 Allammelek, Amad, ya Mishal. Hay poppog nah nangappit hi kalin-oban di algo ya indalanah pingngit di Carmel ya Sihor Libnat. 27 Numpalikkod hi nangappit hi timilan di algo ot mumpaeh pingngit di Bet Aagon. Dimmatong ad Sebulun ya nah Nundotal an Iptahel ot mumpaeh nangappit hi north ingganad Bet Emek ya Neiel. Ot mumpae pay hi north ad Kabul, 28 Ebron, Rehob, Hammon ya Kanah ingganad Sidon. 29 Numpalikkod bod Ramah ot dumatong ad Tyre an nakaalladan an boble. Ya numpalikkod ad Hosah ot mipoppog nah Baybay an Mediterranean. Nid-um di Mahalab, Aksib, 30 Ummah, Aphek, ya Rehob. Duwampulut duwan am-in datuwen o-ongal an boble ya nid-um nadan i-itay an bobleh di.

31 Datuwen bobley nidat nadah holag Asher an pumboblayan da.

32 Hay nikan-om an nabunut an nidatan hi luta ya hay holag Naptali. 33 Hay poppognan lutan nidat ke dida ya numpaed Helep inggana nah kaiw an Oak ad Saanannim ingganad Adami Nekeb ya Jabneel inggana bod Lakkum ot mipoppog ad Jordan an Wangwang. 34 Nipalpuh di ot mumpalikkod ad Asnot Tabor hi nangappit hi kalin-oban di algo ot mumpaed Hukkok. Dimmatong hi pingngit di lutan nadan holag Sebulun nah south. Ot mumpaeh pingngit di lutan di holag Asher nah nangappit hi kalin-oban di algo ya ad Jordan an Wangwang nah nangappit hi timilan di algo. 35 Hanadan o-ongal an nakaalladan an bobleh di ya Siddim, Ser, Hammat, Rakkat, Kinneret, 36 Adamah, Ramah, Hasor, 37 Kedes, Edrei, En Hasor, 38 Yiron, Migdal El, Horem, Bet Anat ya Bet Semes. Himpulut hiyam datuwen o-ongal an boble ya nid-um nadan i-itay an bobleh di. 39 Datuwe nadan boblen nidat nadah holag Naptali an pumboblayan da.

40-48 Hay mikapitun nabunut an nidatan hi luta ya nadan holag Dan. Datuwe nadan boblen nidat ke dida: Sorah, Estaol, Ir Semes, Saalabbin, Aijalon, Itlah, Elon, Timnah, Ekron, Eltekeh, Gibbethon, Baalat, Jehud, Bene Berak, Gat Rimmon, Me Jarkon, Rakkon ya nadan boblen dommang di Joppa. Datuwe nadan o-ongal an boblen nidat nadah holag Dan an pumboblayan da. Mu handih adida kabaelan an sakupon nan eda pumboblayan ya eda mo ginubat di Lais. Hinggop dah diyen boble ot pumpate da nadan tataguh di ot ibagi dah diyen boble. Numboble dahdi ot hannotan day ngadana hi Dan an ngadan di ammod dan nahlagan da.

49 Handih nagibbun nunggogodwaan nadan holag Israel nadan luta da ya indatan dah Joshua an imbabalen Nun hi lutana. 50 Indat dan hiya nan boblen ibaganan Timnat Serah ad Eplaim an mabilid an boble mipuun hi olden APU DIOS. Iniphod Joshuah diyen boble ot hidiy pumboblayana. 51 Hi Eleasar an padi, hi Joshua an imbabalen Nun ya nadan ap-apun di holag Israel ya ingkap-ong da danaen boble handih naamung dad Siloh hi kad-an APU DIOS nah hinangngab di Tabernacle an imbunut da ot makaggibbuh diyen pangikap-ongan da ke dadiyen luta.