1 Athituy naganodwaan di Kanaan nah nangappit hi kalin-oban di algod Jordan ot ikap-ong nadan holag Israel. Hi Eleasar an padi, hi Joshua an imbabalen Nun ya nadan mangipangpanguluh holag Israel di nanganodwa kediyen boble. 2-5 Kinalin APU DIOS ke Moses handi an am-in nadan bobled Jordan nah nangappit hi kalin-oban di algo ya maganodwan mibunut ta ikap-ong nadan hiyam an holag Israel ya nan godwan di holag Manasseh. Mu nan nangappit hi timilan di algo ya ingkap-ong mo tuwalin Moses nadah duwat godwan holag Israel. (Hay holag Joseph ya nunduwa an dadiye ya holag Manasseh ya holag Eplaim.) Mu nada ken holag Libay ya abunay pumboblayan da ya pumpattolan di nidat ke dida. Adi umat hi nidat nadah ibba dan holag Israel an ambibbilog. Hay inat nadan holag Israel an nanganodwa nah luta ya mipuun hi intugun APU DIOS ke Moses.

6 Handih nungkampuwan dad Gilgal ya wada day immeh kad-an Joshua. Ya hi Kaleb an imbabalen Jephunneh an Kenissite di ohan dida. Kananan Joshuay “Kon manomnom mu din kinalin APU DIOS ad Kades Barnea ke Moses an muttatyuna mipanggep ke ditan duwa? 7 Nap-at di toon ku handih nangitud-akan Moses ke ha-on an nalpuwak ad Kades Barnea ot umaliyak an munsiim ketuwen boble. Nibangngadak ot kalyok ke hiyay ustuh mipanggep ketuwen boble. 8 Mu nadan ibbak an immalin nunsiim ya umipatakut di kinali da nadah ibba taku. Mu ha-oy ke ya impaka-un-unud ku peh APU DIOS an Dios ku. 9 Ot kediyen algo ya kanan Moses ke ha-on di ‘Gapu ke naen inat mu ya ibagi yuh nadah imbabalem nadan boblen dinalan muh em nunsiiman.’

10 Nap-at ta limay bilang di toon an nala-u nipalpu handih nangalyan APU DIOS kediye ke Moses hidi nah adi maboblayan an nundalanan takun holag Israel. Maphod ta impaannung APU DIOS di kinalina ot punnanongonak an matagu takon di nun-ine-e taku ot deyan nawalut limay toon kud uwani. 11 Yaden nanongna pay an nal-otak ingganad uwani, umat hi inlot ku handih nangitud-akanak ke Moses an e munsiim. Nal-otak pay an makigubat ya mangiat hi nganneh diye. 12 Kinali hay ibagak an idat mun ha-oy ya nan mabilid an boblen kinalin APU DIOS handi an midat ke ha-on an hidiye nan nahamad an naaladan hi binattu an boblen nadan o-ongal an tatagun holag Anak. Hana ot anhan ta baddanganak ke APU DIOS ta dog-alok dadiyen tatagu te hidiyey kinalinan ha-on.”

13 Binendisyonan Joshuah Kaleb an imbabalen Jephunneh ot idat nay Hebron ke hiya. 14 Ingganad uwani ya nanongnan bagin nadan holag Kaleb di Hebron. Man-uket nidat ke Kaleb an imbabalen Jephunneh an Kenissite hidiyen boble ya makangngun-unud nah AP-APU an Dios Israel. 15 Handi ya hay ngadan di Hebron ya Arba an ngadan din hi Arba an nundingngol am-in hanadah Anakite. Hidiyen bobley kaongngalan ya kaim-importanteyan an boblen hanadah holag Anak.

Ad uwani ya malinggop moh diyen boble.