1 Hanadan patul di Amorite nadah bobled Jordan nah nangappit hi kalin-oban di algo ya nadan patul di iKanaan an numpumboble nadah pingngit di Baybay an Mediterranean ya namahig di takut da ya nama-id di tulid da handih dingngol dan impatikod APU DIOS nan danum nah Wangwang an Jordan ot mamag-anan ot umagwat nadan holag Israel.

2 Kanan APU DIOS ke Joshuay “Mangapya kah ilap ta kugitom nadan linalakin holag Israel.” 3 Inun-unud Joshuah diyen APU DIOS an atona ot kugitona dida nah bilid ot mangadanan hidiye hi Bilid an Gibeat Haaralot.

4-7 Man-ut nakugit am-in di linalakin holag Israel handih timmayan dad Egypt muden ugge nakugit nadan nitungo nah adi maboblayan handih niha-adan dah dih nap-at an toon. Ya nada ken linalakin kakat-agun damanan makigubat handih wada dad Egypt ya nate dan am-in. Man-uke ya uggeda inun-unud hi APU DIOS. Insapatan tuwalin APU DIOS an adina iabulut an dumatong da nah makaphod an boblen kinalinan idat na handidah aammod dan maluwab di mitanom. Ot didan balun holag Israel di kinugit Joshua. 8 Nagibbu dan nakugit ot mihdi da ni-an hi kampu da inggana napoy-an di kugit da.

9 Kimmali boh APU DIOS ke Joshua ot kananay “Kinaan kud uwaniy nibabainan yuh nihbutan yud Egypt.” Hidiyey gapunan nangadanan hidiye hi Gilgal ingganad uwani.

10 Kediyen nungkampuwan nadan holag Israel ad Gilgal nah nundotal an nih-up ad Jericho ya numpiyesta da kediyen mikahimpulut opat an algo kediyen bulan. Hidiyey panginomnoman da handih nala-uwan di anghel APU DIOS hi babalen di holag Israel ad Egypt. 11 Ot hi kabigatana ya hidiyey lappunah nanganan dah bungan di nitanom ad Kanaan. Hay kinan da ya nihanglag an boga ya tinapay an ugge naha-adan hi mumpalbag. 12 Nipalpun diye ya maid moy mag-ah mana. Nipalpu bon diye ya hay nitanom hidid Kanaan di kalpuwan di kanon da.

13 Handih nih-up hi Joshua ad Jericho ya maid maptok ya tinibo na on tagun timmaddog hi hinangngab nan inodnanay ispada. Kanan Joshua ke hiyay “An he-ay oha nadah tindaluk, weno buhul daka?”

14 Himmumang nan tagun kananay “Bokonak tindalum ya bokonak buhul mu. Dehtuwak te ha-oy di ap-apun di tindalun APU DIOS.” Nunlukbub hi Joshua nah luta ot dayawona. Kananan hiyay “Muttatyuwak ke he-a, nganney pinhod mun atok?”

15 Kanan diyen tagu ke hiyay “Kaanom di apatut mu te wadah APU DIOS hitu.” Inun-unud Joshua ot kaanonay apatut na.