1 Hinumang bon Bildad hi Job an kananay 2 “Daan mot itikod mun kumalikalit donglom di kalyon min he-a? 3 Tipet e umalih nomnom mun kay kami bakan maid di inila mi? 4 Paligatom ot ya abuy adol mu gapuh boh-ol mu. Kon nganne damdama anhan di maat di boh-ol? Kon gapuh boh-ol mu ya mahannotan di luta ya mapokwal day babatu nadah dopla?

5 Makulug an gagalan mama-id di gaga-ihon tagu, umat nah dilag an mad-op 6 ta tumapol di nunhituwana. 7 Man-ut maandong di pundaldallana, mu mihubag te hiya pe metlaing di kaatan di gaga-ihon planuna.

8-10 Uggena inilan nakna ot ya abu nah bituh dalanona. 11 Namahig an abuna moy takut nan wada. 12 Kadangyan handi, mu ad uwani ya maagangan ya kay munho-ho-od di ligat hi panto na. 13 Katatakut di dogonan niwahit hi adol na ya mungkabuluk di hukina ya taklena. 14 Kay napilit an nipalah-un nah balenan makakkaphod ta hangngabona nan patul di kate. 15 Ya maghob di balena ya ngunut na. 16 Mialig nah kaiw an namag-anan di adol na inggana lamut nat mate. 17 Ta maid moy makalkalin hiyah dih boblena, takon hi udum an boble ya maid mot ingganay munnomnom ke hiya. 18 Ya makaan moh boblen di matagut mipae nah tapottapol. 19 Maid boy matdaan hi matagun holag na. 20 Ta hidiye nan gumayonggong am-in di tagu mipalpuh nangappit hi timilan di algo inggana kalin-oban di algoh pangngolan da kediyen naat ke hiya. 21 Athidiy maat hi gaga-ihon tagun iwalong nah Apu Dios.”