1-2 Himmumang boh Job an kananay “Om, inilak an makulug danaen kinalim. Mu nganney innunan e makalin maid di liwat di tagu ke Apu Dios? 3 Takon hin kananat idiklamun di taguh Apu Dios ya kon kabaelanan humangon di oha ni-mo nadah hinlibun mahmahan Apu Dios ke hiya? 4 Nakala-ing hi Apu Dios ya ongal di kabaelana. Maid di tagun e makihanggan hiya.

5 Maid maptok on dinlig nay bilid ya dadagona gapuh boh-ol na. 6 Ipaali na boy kolyog ya iwagot na nadan batun nipab-unan tun luta. 7 Ya kabaelanan adi pabudalon di algo takon nadan bittuwon. 8 Maid di namaddang ke hiyan nangibiklag hi kabunyan ya maid boy namaddang ke hiyan nangigatin nah katatakut an mataguh baybay. 9 Lintunan am-in di bittuwon an hay udum ke dadiye ya Bear, Orion ya Pleiades takon nadan bittuwon an wadah nangappit hi south di kabunyan. 10 Umipamodwong am-in dadiyen inat na. Ya adi mabilang di milagron atona.

11 Adiyak pakatibon Apu Dios takon di mih-up weno mala-u. 12 Deket impaenay kate hi ohan tagu ya maid di mangipatikod ke hiya. Maid boy ohan tagun ena kanan ke hiyay ‘Nganne boppoy at-attom?’ 13 Namahig di boh-ol Apu Dios. Dadagonan am-in di makibuhul ke hiya. Takon nadan mangipatnan bumaddang ke Rahab an katatakut an matagu nah baybay an makihanggan hiya.

14 Kinali, dahdiyak udot an e makihangga ya makihannun hiya? 15 Hay maat ku ya abu ya mumpahpahmokak ke hiya an Dios ku, takon hin kananat maid di numbahulak ke hiya. 16 Ya takon hin kananat iabulut nan kumaliyak ya inilak an adiyak donglon ke hiya. 17 Paddungnay impaalinay puwok ot maliputan am-in di adol ku yaden maid di bahul ku. 18 Namahig an muntutun-ud di ipaalinan ligat ke ha-on an adiyak anhan pawayaan. 19 Hiya ya ongal di kabaelana! Maid di miingngon hiya! Ya maid boy mipabahul ke hiya te maandong di pangat na. 20 Deket kalyok an maid di bahul ku ya kalyok an makangngun-unudak ke APU DIOS ya nunna-ud an kananay nihallaak.

21-22 Makulug an maid di bahul ku, mu indadluwak moy nitaguwak te immingleyak. Maid metlaing di hilbinah pumbiyagan te takon hin kananat numbahul nan tagu weno ugge ya dadagon metlaing Apu Dios dida. 23 Makatattawah Apu Dios hin maid maptok on nate nan maid di bahul nan tagu. 24 Hay punnomnom ku ya impaboltanay kabobboble tuh luta nadah gaga-ihon tatagu. Ya kulapona nadan huwes ta adi maandong di pangat da. Te kon dahdiy udum an mangat ketuwe hin bokon hiya?

25 Hay algok an napnuh ligat ya gagalan mange mu nan tagun nakal-ot an bumtik. 26 Ya gagalan mama-id umat nah bangkan gagalan mange ya umat nah tuldun gagalan ena hokbon nan aggayam ta kanona. 27 Agat itikod kun mundiklamu ta ipilit kun paamlongon di adol ku 28 takon di nanongnan munholholtapak. Mu inilak metlaing an nanongnay punnomnom Apu Dios an nabahulanak. 29 Kinali nganne metlaing di atok ta ipatibok an maid di bahul ku? 30 Takon hin kananat ulahak di liwat kun sabunak ta makaullahan 31 ya iwelleyak metlaing ke Apu Dios nah tupak ta makaluggitak ta paddungnay takon di bulwatik ya ibainak.

32 Mu hiya an Dios ya bokon tagu ta ek idiklamuh korte ta ipanu mih diy nunhallaan mi. 33 Mu hin kanana ke ya dahdiy mangipanuh nunhallaan mi? 34 Ya dahdiy mabalin an mangaan hi kabaelan Apu Dios ta adiyak mo tumakut ke hiya 35 ya ta adiyak umagol an kumalin hiya? Mu takon hin kanana ya maid metlaing di tulid kun kumalin hiya.