1 Kanan bon APU DIOS di “Olton yun tumkuk ta kalyon yu nadah tataguk an holag Israel di mipanggep hi liwat da. 2 Man-u man te mundayaw dah kabigabigat an kay hanan ihik da peman an inilaon di mipanggep hi pangi-ek ya kay hanan pinhod da peman an un-unudon di tugun ku. Ya kanan day pinhod dan idat kun diday maandong an tugun ku ya kanan day maan-anla dan mangun-unud ke ha-on. Mu hay kakulugana ya kali ya abu dadiye.

3 Kanan da boy ‘Tipet etaku muntopol ten adi metlaing hangudon APU DIOS hidiyen aton taku?’ ”

Kanan APU DIOS ke diday “Hay kakulugana ya man-ut muntopol kayu, mu kediyen puntopolan yu ya hay kiphodan yu ot ya abuy nonomnomon yu. Oha bo ya paligaton yuy pungngunuwon yu. 4 Deke bot muntopol kayu ya mun-aawwit kayu. Kon pangali yu on gapu te muntopol kayu ya pakaddonglok di dasal yu? 5 Man punlohanan yu ot ya abu nan puntopolan yu. Munyuyuung kayun umat nah nabakuy an holok. Ne numbulwati kayuh langgote ya nibakbakillang kayuh dap-ul. Kon athinay ustun muntopol? Ya kon kanan yu on paamlongonak ke danaen aton yu?

6 Dakayun muntopol ya athituy pinhod kun aton yu ta mipatiboy pundayaw yun ha-on. Itikod yun mangipaligligat hi mahmok an tagu ya aton yuy limpiyu ke dida. Ya ipae yu nadan tatagun paligligaton yun piliton yun pungngunuwon. 7 Umidat kayuh makan hanadah maagangan ya pahigupon yu nadan maid di nunhituwan da. Umidat kayuh bulwati nadah maid di bulwatina ya adiyu ukuwon an bumaddang hi iiba yu.

8 Deket aton yu datuwe ya idat kuy kiphodan yu ya paphodon dakayuh gagala, umat nah hiyon di algon hingkakatang ya bimmudal nah mahdol an kulabut. Ya wadaak ta nangamung ta ha-oy di mangipaptok ke dakayu takon di daanay kad-an yu. Ha-oy an mangitakdog ke dakayuy mangipangpangulun dakayu ya adugan dakayu. 9 Ya deket mundasal kayun ha-on an mumpabaddang kayu ya kanak di: Om baddangan dakayu.

Deket itikod yun mangipaligat hi mahmok an tagu ya deket itikod yu nan pabahulon yuy udum an tatagu ya adi kayu kumalih mahakit, 10 deket idatan yuh makan nadan maagangan ya baddangan yu nadan mahmok ya mialig kayu nah dilag an pat-alanay nunlinikkod ta kay maka-al-algo ta makaan moy kay tapottapol hi kad-an yu. 11 Ya wadawadaak ta nangamung an mangituttuduh aton yu. Ipaptok dakayun idat ku nadan maphod an mahapul yu ya pal-oton dakayu ta umat kayu nah laguntan adi makudangan hi danum ya umat kayu nah ob-ob an adi matduk. 12 Ahi iphod di iimbabale yu nadan nadadag an boble yu takon nadan pangipataddogan hi babale. Ahi kanan di tataguy makangngiphod kayuh napa-in alad ya napa-in babale.”

13-14 Kanan bon APU DIOS di “Deket pinhod yun mihamad di pakihayyupan yun ha-on ya un-unudon yu nan tugun mipanggep nah Sabadun Tungo ta bokon hay pun-amlongan yuy ipaanhan yu. Ya hay ot ya abuy aton yu umat ke ha-on ya ibilang yun importanteh diyen algo mu nadan udum. Ta hidiye nan adiyu baybay-an hidiyen algo, mu lispituwon yu ta adi kayu e makianab-abig hi nalgom ya bokon hay ngunu yu ya nadan udum an pinhod yuy aton yu. Deket athidiy pangibilang yu kediyen algo ya nunna-ud an bendisyonan dakayun ha-oy ta pumbalinon dakayun matbal hi kabobboble ya ipaboltan kun dakayu nan lutan indat ku dih ammod yun hi Jacob. Ha-oy an AP-APU di nangalin tuwe.”