1 Indani ya kimmali boh APU DIOS ke ha-on an kananay “Umala kah ongal an puntudokan ta ongngalom an itudok di ‘Maher-Salal-Has-Bas.’* 8:1 Hay kibalinana ya “Gagalan mibtik an limmu.” 2 Ayagam da Uriah an padi ya hi Sekariah an imbabalen Jeberekiah an muntistigun tuwen itudok mu. Dida ya limpiyu dan tatagu.”

3 Indani ya nawadaan nan inayak. Handih nitungoh diyen lalakin imbabale mi ya kanan APU DIOS ke ha-on di “Ngadanan yuh Maher-Salal-Has-Bas. 4 Hay kibalinan nan ngadana ya umannung an maat hantuh adi ni-an pakaikalih ‘ama’ weno ‘ina’ te ahi alan nadan iAssyrian am-in di kinadangyan di iDamascus ya iSamaria ta ie dah boble da.”

5 Kimmali boh APU DIOS ke ha-on an kananay 6 “Gapu te adi bigbigon datuwen tatagud Judah nan maphod an pamaptok kun didan mialig nah madin-ong an wangwang ad Siloah ya maan-anla da nah namnamaon dan baddangan di iAssyria didat maapput nadan duwan patul an buhul dan hi Resin ya hi Pekah. 7 Mu ha-oy an Ap-apu ya ipaalik nan patul di Assyria ya nadan tatagunat gubaton day Judah. Umali dan umat da nah Wangwang an Euphrates hin immolwang. 8 Hanadan titindalun di Assyria ya umali dan umat da nah olwang ta duplugonan am-in di wadad Judah. Ya umali dan umat da nah hamutin bokyagonay payak nat mungkohop an mampap nah aggayam an kanona.† 8:8 Maid di maptok hin hay kibalinan tuwen hamuti ya nadan tindalun di Assyria an ahi umalin manadag nadah iJudah weno hay kibalinana ya hi Emmanuel an waday kabaelanan mangihwang nadah iJudah ke dadiyen tindalu. Ahi athidiy titindalun di Assyria an mihinap am-in hi bobleh tu.”

Ya he-a, Emmanuel ya abuy makabael an mangihwang ke dakami!

9 Maamung kayun am-in an tataguh kabobboblen gumubat. Mu maapput kayu ta miwahit kayu. 10 Tagan yuh planu ya humanuhummangan kayu mipanggep hi pangubatan yun dakami, mu maid di hilbina te ipaptok dakamin Apu Dios.

11 Hi APU DIOS ya kinaliyanak an kananay “Adim unnudan di at-atton nadan ibbam an iJudah. 12 Ya adim abuluton nan kalyon dan he-ay nangihdul nah boble yu gapu te kinalim ke didan adida mundinol hi baddang di Assyria. Adim takutan nan tatakkutan nadan tatagum. 13 Nomnomom an ha-oy an AP-APU an Kabaelanan am-in ya makaphodak an abu. Ha-oy di takutam. 14 Ahiyak makiha-ad nadah tataguk ya ipaptok ku dida, mu nadah iIsrael ya iJudah ya ahiyak mialig nah batun kihupdugan ya kag-ahan da. Ya hanada ken iJerusalem ya mialigak nah lingon an kaknaan da. 15 Dakol ke diday ahi mihupdug ya mag-a ta magmik da. Ya ahida makna.”‡ 8:14-15 Romans 9:33, 1 Pedro 2:8 Hituwey kinalin APU DIOS ke ha-on.

16 Dakayun makangngun-unud ke ha-on, amungon yun am-in nadan impitudok APU DIOS ta idulin yu ya ipapaptok yu ta nangamung. 17 Ha-oy ya nanongnan waday dinol ku ya waday namnamak ke APU DIOS an mamaddang ke ditaku, takon di adi ditaku hangudon an tatagunad uwani.

18 Dehtuwak an ibbak nadan imbabalen APU DIOS an indinol nan ha-on ta ipainila mih tatagud Israel di pinhod diyen DIOS an aton di tataguna. Hiya ya Kabaelanan am-in an dehdi nah Bilid an Zion.§ 8:18 Hebrews 2:13

19 Mu wada day ahi mangalin dakayun eyu mahmahan di pinhod yun inilaon hanadah mahikpan ya mun-abig an mumbedebede. Mu hay kalyok ya hi APU DIOS di pangibagaan yu kediye. Tipet dakayun matagu ya eyu mahmahan hanadah nungkakate?* 8:19 Tibon yuy Isaiah 19:2.

20 Donglon yu ot ya abuy ituttudun APU DIOS ta bokon hay kalyon nadan mahikpan ya mun-abig di un-unudon yu te maid di ibaddang dah kiphodan yu. Man-uke ya paddungnay ugge napat-alan di punnomnom da.

21 Ahi e humanawwangan nadan tatagu nah boble te nadismaya da ya naagangan da. Ya gapuh inagang da ya gaga-iho moy kalyon da nah patul da, takon hi Apu Dios. 22 Takon di daanay pangayan dah eda pumpabaddangan ya maid di bumaddang ke dida te kon ot hay punligatan ya kabulubulunan day hamakon dan paddungnay miwele da nah munhihhilong.