1 Datuwey nahlag ke Esau an Edom di ohan ngadana. 2 In-inenay tulun iKanaan an hay oha ya hi Adah an imbabalen Elon an iHittite. Ya nan mikadwa ya hi Oholibamah an imbabalen Anah ya inap-apun Sibeon an iHibite. 3 Ya nan mikatlu ya hi Basemat an hi tulang Nebayot an imbabalen Ismael. 4 Hay imbabale dan Ada ya ohan lalaki an hi Eliphas ya oha bon lalakiy imbabale dan Basemat an hi Reuel. 5 Ya hay imbabale dan Oholibamah ya tulun linalaki, hi Jeus, hi Jalam, ya hi Korah. Am-in datuwen imbabalen Esau ya nitungod dad Kanaan.

6 Indani ya ninomnom Esau an mit-an hi ohan boble ta midawwi ke Jacob ot awitona nadan inayana, imbabalena ya nadan tataguna. Impakial-alana nadan haluna ya am-in di nganneh diyen wadan dida 7 te adi mo gumla nan boble dad Kanaan an mananud hi halun dan hintulang te dimmakol. 8 Ot eda miha-ad nah mabilid ad Edom.

9 Datuwey nahlag ke Esau an ammod nadan iEdom. 10-13 Hi Eliphas an imbabalen da Esau ke Adah ya nahlag ot wadaday liman linalaki, hi Teman, hi Omar, hi Sepho, hi Gatam ya hi Kenas. Ya nikan-om hi Amalek an imbabalenah ohan babain hi Timna. Hi Reuel an imbabalen da Esau ke Basemat ya nahlag ot wadada bo damdamay opat an linalaki, hi Nahat, hi Serah, hi Sammah ya hi Missah.

14 Ya nadan imbabalen da Esau ke Oholibamah ya hi Jeus, hi Jalam ya hi Korah. Hi Oholibamah ya imbabalen Anah ya inap-apun Sibeon.

15-16 Hay imbabalen da Esau ke Adah ya hi Eliphas an panguluwan. Nahlag hi Eliphas ot hi Teman, hi Omar, hi Sepho, hi Kenas, hi Korah, hi Gatam ya hi Amalek.

17 Hi Reuel an imbabalen da Esau ke Basemat ya nahlag ot hi Nahat, hi Serah, hi Sammah ya hi Missah an diday aap-apun di holag da.

18 Hanadan imbabalen da Esau ke Oholibamah an imbabalen Anah ya hi Jeus, hi Jalam ya hi Korah ya dida damdamay aap-apun di holag da. 19 Am-in datuwen natonton ya holag Esau.

20-21 Hanadan datin tatagud Edom ya nahlag da nadah holag Seir an Horite. Datuwe ya hi Lotan, hi Sobal, hi Sibeon, hi Anah, hi Dishon, hi Eser ya hi Dishan.

22 Hi Lotan ya waday tulang nan babai an hi Timna. Hi Lotan di kon imbabalen Hori ya hi Heman.

23 Ya hi Sobal ya hiyay aman da Alban, hi Manahat, hi Ebal, hi Sepho ya hi Onam.

24 Hi Sibeon ya wadaday duwan imbabalenan linalakin da Aiah ke Anah. Hituwen hi Anah nan nanamak nah mun-otbol an maatung an danum handih ena impattol nadan kabayun amana nah adi maboblayan. 25-26 Nahlag hi Anah ot da Dishon ke Oholibamah. Hi Dishon ya hiyay aman da Hemdan, hi Esban, hi Itran ya hi Keran.

27 Hi Eser ya hiyay aman da Bilhan, hi Saaban ya hi Akan.

28 Hi Dishan ya hiyay aman da Us ya hi Aran.

29-30 Kinali datuwey aap-apun nadan Horite hidid Edom: hi Lotan, hi Sobal, hi Sibeon, hi Anah, hi Dishon, hi Eser ya hi Dishan. Datuwe nadan Horite an nun-ap-apud Edom.

31 Handih maid da ni-an di numpatul ad Israel ya wadada tuwaliy nahanhanot an patul ad Edom. 32 Hay namangulu ya hi Bela an imbabalen Beor an iDinhaba. 33 Nateh Bela ot mihannot hi Jobab an imbabalen Serah an iBosrah. 34 Nateh Jobab ot mihannot boh Husham an iTeman. 35 Nateh Husham ot ahi mihannot hi Hadad an imbabalen Bedad an iAbit. Hituwen hi Hadad nan nangapput nadah iMidian handih nunggugubatan dad Moab. 36 Nateh Hadad ot mihannot hi Samlah an iMasrekah. 37 Nateh Samlah ot mihannot hi Saul ad Rehobot an boble nah kad-an di Wangwang an Euphrates. 38 Nateh Saul ot mihannot hi Baal Hanan an imbabalen Akbor. 39 Nateh Baal Hanan ot mihannot hi Hadad an iPau. Hay inayan Hadad ya hi Mehetabel an imbabalen Matred ya inap-apun Mesahab.

40 Hi Esau di nahlagan nadan tatagud Edom an holag da Timna, hi Albah, hi Jethet, 41 hi Oholibamah, hi Elah, hi Pinon, 42 hi Kenas, hi Teman, hi Mibsar, 43 hi Magdiel ya hi Iram an oha on naappil da an nungkingadan di ngadan dah boblen niha-adan da.