1 Handih umeh nahiyam ta hiyam di toon Abram ya numpatibo boh APU DIOS ke hiya ot kananay “Ha-oy nan Dios an Kabaelanan amin. Un-unudonak ya hay maphod di atom ta nangamung. 2 Paannungok nan kinalik ke he-a an idattan dakah dakol hi holag mu.” 3 Kediyen mungkalih Apu Dios ya nunyuung hi Abram hi punlispitu nan hiya. Kanan bon Apu Dios di 4 “Kalyok ke he-a an he-ay ahi kahlagan di dakol an tataguh kabobboble. 5 Ad uwani ya hay mo ngadan mu ya hi Abraham, bokon mo Abram, te pumbalinon dakah pun-aman di dakol an tataguh kabobboble.* 17:5 Romans 4:17-18 6 Idattan dakah dakol an holag mu. Mumbalin day udum hi patul ya dumakol di pumboblayan da. 7 Punnanongok hituwen kinalik ke he-a takon hanadah holag muh udum hi algo. Hituwen nakitobbalak ke dakayu ya munnananong an maid di poppog na. Ya munnanong an ha-on di Dios an dayawom ya athidi bon hanadah holag mu an ha-on di Dios an dayawon dat nangamung. 8 Hituwen boblen Kanaan an nakiboblayam ya idat kun am-in ke he-a ya nadah holag mu ta dakayuy kon lutat inggana ya ha-oy an Dios di dayawon da.

9-13 Mahapul an he-a ya nadan holag mu ya mumpakugit kayu ta kitib-anan punnanongon yu tun nakitobbalak ke dakayu. Kinali mipalpud uwani ya makugit am-in di lalakin mitungo nah mikawalun algo mipalpuh nitungawan da, takon nadan itungon di himbut yuh nunhituwan yu ya nadan himbut an iali dan malpuh udum an boble ya makugit da damdama. Hituwen kakugitan yuy kitib-ana an adi mapoppog di nakitobbalak ke dakayu.† 17:9-13 Acts 7:8 14 Hanan lalakin ugge nakugit ya adi mibilang an taguk te uggena inun-unud nan kinalik an planuk.”

15 Kanan bon Apu Dios ke Abraham di “Hi Sarai an inayam ya hi Sarah moy ngadana mipalpud uwani. 16 Bendisyonak ta mun-imbabale kayuh lalaki. Pumbalinok hi Sarah an pun-inan di tataguh kabobboble. Ya wadaday ahi mumpatul hi holag na.”

17 Ya nunyuung hi Abraham hi pundayaw nan Apu Dios. Mu makatattawah nomnom na te kananay “Kon e mo uppe pakaimbabaley tagun hinggatut di toon na? Ya takon di hi Sarah an nahyam di toona ya kon e mo pakaimbabale?” 18 Ot kanan Abraham ke Apu Dios di “Daan mot hi Ismael ot ya abu?”

19 Mu kanan Apu Dios di “Bokon te mun-imbabaleh Sarah hi lalaki ta ahiyu ngadanan hi Isaac. Hiya ya nadan holag nay ahik pangipaannungan nah kinalik ke he-a an planuk an adi mahannotan, mu munnananong ta inggana. 20 Dingngol ku nan imbagam an kiphodan Ismael, kinali bendisyonak damdamat idatak hi dakol an holag na. Hiyay ahi pun-aman di himpulut duwan aap-apu ya datuwen holag na ya ongngaongngal di pumboblayan da ya madmadngol da damdama. 21 Mu hay pangipaannungak nah kinalik ke he-an planuk ya nan imbabalem an hi Isaac an ahi itungon Sarah hi athitun tiempo tuh umalin toon.” 22 Ginibbun Apu Dios hidiyen kinalina ot tayananah Abraham.

23 Kediyen algo ya inun-unud Abraham nan kinalin Apu Dios ot kugitona nan imbabalenan hi Ismael ya am-in nadan linalakih nunhituwana takon nadan imbabalen di muttatyuna. 24 Ya takon hiya ya numpakugit an hay toon an diye ya nahiyam ta hiyam 25 ya hi Ismael ke ya himpulut tuluy toona. 26 Nundihhan dan hin-ama an numpakugit kediyen algo 27 ya takon nadan linalakin muttatyuna.