1 Datuwe nadan nitudok an aap-apun di holag Israel an naki-en Ezra hi nibangngadan dad Jerusalem handih numpatulan Artaserses: 2-14 Hi Gersom hi holag Pinehas, hi Daniel hi holag Itamar, hi Hattus an imbabalen Sekaniah hi holag David, hi Sekariah hi holag Paros an hinggatut ta naliman linalakiy ibbana, (waday nitudok mipanggep hi tonton di aammod da) hi Eliehoenai an imbabalen Serahiah hi holag Pahat Moab an duwanggatut an linalakiy ibbana, hi Sekaniah an imbabalen Jahasiel hi holag Sattu an tuluy gatut an linalakiy ibbana, hi Ebed an imbabalen Jonathan hi holag Adin an naliman linalakiy ibbana, hi Jeshaia an imbabalen Athaliah hi holag Elam ya napituy ibbanan lalaki, hi Sebadiah an imbabalen Michael hi holag Sephatiah an nawalun linalakiy ibbana, hi Obadiah an imbabalen Jehiel hi holag Joab an duwan gatut ta himpulut walun linalakiy ibbana, hi Selomit an imbabalen Josiphiah hi holag Bani an hinggatut ta nan-om di linalakin ibbana, hi Sekariah an imbabalen Bebai hi holag Bebai an duwampulut walun linalakiy ibbana, hi Johanan an imbabalen Hakkatan hi holag Asgad an hinggatut ta himpulun linalakiy ibbana, hi Eliphelet, hi Jeuel ya hi Semaiah hi holag Adonikam an nan-om an linalakiy ibbana. (Mu dida ke ya nanguddidi dan nibangngad ad Jerusalem.) Ya hi Uthai ya hi Sakkur hi holag Bigbai an napitun linalakiy ibbana.

15 Hituwey kanan Ezra: Inamung kun am-in dida nah pingngit di ittay an wa-el an nundalan nah bobled Ahaba ot mungkampu kamih dih tulun algo. Indanit ek inilaon ya maid nadan udum an holag Libay te ammuna nadan padin wada. 16 Impaayag kuy hiyam hanadah aap-apu an hi Elieser, hi Ariel, hi Semaiah, hi Elnathan, hi Jarib, hi Elnathan, hi Nathan, hi Sekaria, hi Meshullam ya nadan duwan mittulu an hi Joiarib ya hi Elnathan 17 ot ipaek dida ke Iddo an ap-apun nadan iKasipia ya nadah iibanan mumpungngunuh Templo ta ibaga dan didat umipaali dah tatagun pungngunuwon Apu Dios nah Templona. 18 Indani ya gapuh ulen Apu Dios ke dakami ya impaali dah Serebiah an nalaing an tagu an holag Mahli an holag Libay an imbabalen Israel. Ingkuyug nay himpulut walu nadah linalakin imbabalena ya tutulang na. 19 Impaayag da pay hi Hashabiah an ibbanay duwampulun imbabalena ya iibana takon hi Jeshaia an holag damdaman Merari. 20 Nid-um di duwanggatut ta duwampulun mungngunu nah Templo an hay aammod da handi ya tinuddu tuwalin din patul an hi David ya nadan opisyal nan bumaddang nadah holag Libay nah Templo. Waday listaan an nitudokan am-in di ngadan da.

21 Handih wada kami nah pingngit nan ittay an Wa-el an Ahaba ya in-olden ku ot muntopol kamin ugge kami nangan ya nundasal kamin Apu Dios ta ibaga min hiya an ipangpangulu dakami ya ihwang dakamih pangayan mi takon nadan imbabalemi ya am-in nadan wadan dakami. 22 Man-uket bimmainak ot uggeyak numbaga nah patul hi tindalun maki-en mungguwalyan dakami nah dalan ta maid di ad-adih aton di buhul min dakami ya kinalik ke hiyan ipaptok Apu Dios am-in nadan tatagun mundinol ke hiya. Ya am-in nadan mangiwalong ke hiya ya kastiguwona dida. 23 Ot muntopol kami ya nundasal kamit ipaptok dakamin Apu Dios ya dingngol nay dasal mi.

24 Ya nadah mangipangpanguluh papadi ya pinilik hi Serebiah, hi Hashabiah ya hay himpulun ibba da. 25 Ingkilok ot ipaboltan kun dida nadan balituk ya silber ya nadan udum an ngunut an mausal nah Templon indat nan patul, nadan konsehal na ya opisyal na ya nadan holag Israel. 26-27 Datuwey ngam-ut nadan impaboltan kun dida: 25,000 an kilon silber, hinggatut an ngunut an silber an hay ngam-ut di dam-ot da ya umeh 3,850 an kilo, hay balituk an nahawwal hi 3,850 an kilo, duwampulun malukung an balituk an nahawwal an walun kiloy dam-ot da ya duwan giniling an malukung an nun-ingngoy balol da nah balituk an malukung.

28 Kanak ke diday “Midawat kayun nan AP-APU an Dios handidan aammod taku ta hiya moy ingunuwan yu. Athidi bo ke datuwen ngunut an silber ya balituk an niappit ke hiya. 29 Kinali tibon yu ta idatong yuh di nah Templon maid di gaga-ihon maat. Deket dumatong kayu ya ikilo yu bo ne ahiyu impaboltan nah ap-apun nadan padi, nadan ibbadan holag Libay ya nadan aap-apun di holag Israel ad Jerusalem.” 30 Hanadan padi ya nadan ibbadan holag Libay di ingkalgadun mangipaptok ya mangie ke dadiyen silber, balituk, ya nadan udum an ngunut nah Templod Jerusalem.

31 Tinaynan mid Ahaba handih mikahimpulut duway algo nah namangulun bulan ot ume kamid Jerusalem. Hi Apu Dios an dayawon mi ya inibbaan dakami ot maid di nangubat weno numbotak ke dakami kediyen nundalanan mi. 32 Handih dimmatong kamid Jerusalem ya nun-iyatu kamih tulun algo.

33 Ot ume kami nah Templo handih mikap-at an algo ot ikilo mi bo nadan silber, nadan balituk ya nadan ngunut ot ipaboltan mi nah padi an hi Meremot an imbabalen Uriah. Hay ibbana ya da Eleasar an imbabalen Pinehas, nadan duwan ibbanan holag Libay, hi Josabad an imbabalen Jeshua ya hi Noadaia an imbabalen Binnui. 34 Binilang mi ya kinilo min am-in ot ilista mi.

35 Hanadan ibbak an holag Israel an numbangngad tuh boble mi ya nun-iali day gobhon dan iappit dan Apu Dios an dayawon min holag Israel. In-ali da pay di himpulut duwan bulug an baka, nahiyam ta onom an lakin kalnero, napitut pitun impan di kalnero ya himpulut duwan gulding an iappit dat makaan di liwat min am-in an holag Israel. Am-in datuwe ya naghob an niappit dan APU DIOS. 36 Ya eda indat nan nitudkan nan olden nan patul nadah gobernador ya opisyal nadah bobled Euphrates nah nangappit hi kalin-oban di algo. Ot bumaddang datuwen aap-apu ya oopisyal nadah tatagu ya nadah mahapul nah Templon Apu Dios.