1 Kimmali boh APU DIOS ke ha-on an kananay 2 “He-an tagu, kalyom di ad-adi mipanggep nah boble an Jerusalem. Ya mipanggep nadah pundayawan di tataguh di. Ya kalyom ke didan iIsrael 3-4 an ha-on an Nakattag-en AP-APU ya kanak di buhulak ke dida. Kinali uknutok di ispadak ta midadaan an pamatek ke didan am-in, maphod ya gaga-iho mipalpuh south inggana north. 5 Ta panginilaan am-in di tatagu an ha-oy an APU DIOS ya hinuknut ku key ispadak ya adik mo ibangngad nah hikot na inggana atok di pinhod kun aton.

6 He-an tagu, ipatibom am-in hi tatagun u-umyung kan maid moy namnamam. 7 Ya deket hanhanan da hin tipet u-umyung ka ya kalyom an hay gapuna ya nan dandanin maat an katatakut. Ya gapun diyen maat ya gumayonggong di tatagu ya kumapuy dan maid moy tulid da. Gagala mon madatngan nan gintud kun umannungana. Ha-oy an Nakattag-en DIOS di nangalin tuwe.”

8 Kanan bon APU DIOS di 9-10 “He-an tagu, kalyom di maat ya kalyom hituwen kinalik: Ha-oy an Dios ya impakahhait kuy ispadak ot humilin kay kil-at ta midadaan an pamatek. Kinali adida mun-an-anla hantuh pangastiguwak ke dida. Man-uke ya uggeda hinangud nadan kanalyok ke dida ya uggeda nagilat hi nanganastiguwak ke dida. 11 Nakadangngiyan di ispadak ya makataddom te indadaan kun usalok an pamate. 12 Kinali he-an tagu, u-umyung ka ya pungkulpig muy pagom te tun ispadak ya niong-ong an iusal kuh pamatek hi tataguk an iIsrael takon nadan mangipangpangulun dida. Ya nunna-ud an mate da te maid tuwaliy namnama da.

13 Athidiy pamatnak ke didan tataguk ta deket adida muntutuyu ya maat ke didan am-in danae. 14 He-an tagu, athituy atom an mangipainila nadah tataguk nah ahi maat ke dida: Oltom an mumpalakpak ne inalam on ispadat iwahiwam hi maminduwa weno mamintulu. Hidiyey kitib-an nan himpappangen ahi maat ke didat mungkakate da. 15 Ahi mama-id di tulid nadan tataguk gapuh namahig an takut da. Te ahi wadan am-in hanadah hogpan di ispadan humihhilin kay kil-at an nidadaan an pamatek. 16 Ahik pumpalang hidiyen ispadak hi kannigid ya kannawan ya takon di daanay pinhod kun pangipalangan. 17 Deket naat hidiye ya makaan uppey boh-ol kut mumpalakpakak. Ha-oy an DIOS di nangalin tuwe.”

18 Kimmali boh APU DIOS ke ha-on an kananay 19 “He-an tagu, markaam di duwan kalatan dalanon nan patul di Babilon hi umaliyanan itabinay ispadana. Dadiyen duwan kalata ya malpu dah ohan boble. Mu takon di athidi ya mahapul an ha-adam hi sinyal nan nunhappangan nadan kalata. 20 Imarkam an nan oha ya mumpaed Kabbah an ongal an bobled Ammon. Ya nan oha ya imarkam an mumpaed Judah ya Jerusalem an nahamad an naaladan. 21 Hidiyen patul di Babilon ya ahi umohnong nah nunhappangan nan kalatat atonay panginilaana hin daan di pumpa-ayana. Ibunut nan usalonay panana, ne munhanhan hanadah dios na ya itibo na nah alten nan niappit an aggayam. 22 Loktat ya nan panan namarkaan hi Jerusalem di bunutona. Hidiyey panginilaanan hidiy pumpaeyan da. Ikapya day panadag da nah hoob ya ipu-ul day lutah puun nan binattun alad ta dalanon dan kumayat kediyen alad ne tumkuk ta ipainilanan hogpon da nan boblet pumpate da nadan tatagu. 23 Hanadan iJerusalem ya adida maawatan hin tipe bot waday athidi yaden nahamad di nuntotobbalan da ya maphod di punhahayyupan da. Mu hidiyey mangipanomnom ke dida nadah inat dan bahul ya hidiyey mangipainilan didan mumbalin dan balud.

24 Kinali ha-oy an DIOS an Nakattag-e ya hituwey kalyok ke didan iJerusalem: Nainila nadan inat yun gaga-iho kinali gapu te nakaliwwat kayu ya ipaboltan dakayuh buhul yu ta mumbalin kayun balud.

25 Ya he-a ken gaga-ihon ap-apun di iIsrael ya nadatngan moy nagtud an algon kakastiguwam. 26 Kinali ha-oy an DIOS an Nakattag-e ya kanak ke he-ay kaanom nan inusal mun pongot ya taddung di patul. Te hinnatkon moy maat an adi umat handi. Hanadan nababan tatagu ya ahida mipatag-e ya nadan natag-e ya ahida mipababa. 27 Om, ahi madadag hituwen boble, ya adi miphod inggana umali nan lebbengnan mun-ap-apu.”

28 “He-an tagu, ipainilam di kalyok ya baalon dakat em ipainila nadah iAmmon an manaltalanggah iIsrael. Kanam ke diday ‘Nunna-ud an madadag kayu. Nakahhait ta humilin kay kil-at di ispadak ya nidadaan an miusal an mamaten dakayu. 29 Adi makulug di kinalin nadan profetas yun kanan day malinggop kayun maid di maat ke dakayuh ad-adi. Ya kanan day pumhod kayu mipuun hi in-inop da ya abig da. Mu dandanin madatngan nan nagtud an algon kakastiguwan yu ta pumpate dakayun iusal kuy ispadak. 30 Kinali idulin yu nadan iispada yu te kastiguwon dakayun ha-oy hinah boble yu. 31 Ipaboltan dakayuh mabubungot an tatagun hay dumadag di punlaingan dat kastiguwon dakayu gapuh namahig an boh-ol ku. 32 Mate kayu ya gobhon dakayu nah boble yu. Ta makal-iwan kayun maid moy munnomnom ke dakayu. Ha-oy an DIOS di nangalin tuwe.’ ”