1-2 Indani ya kimmalih APU DIOS ke ha-on an kananay “He-an tagu, makangohhe danaen ibbam. Man-ut waday mamata da mu adida tibon ya man-ut waday iinga da mu adida dumngol te makangohhe da nimpe.

3 Athituy pinhod kun atom. Umibasket kah o-ohan ngunut mu an kay ka balud an mipaeh udum an boble ne hinakbatam. Atom hituwe nah mapat-al ta tibon nadan ibbam an holag Israel ta kal-ina ot ya maawatan day at-attom takon di mangohe da. 4 Ilah-un mu nimpe dadiyen ngunut mu nah mapat-al ta tibon nadan tatagu. Ne deket nahilong ya tumayan ka nah balem, umat hi aton nadan mipaeh udum an boble. 5 Ya kediyen ang-angon dakah tatagu ya uwangam nan dingding di balem ne indalan muh din inhakbat mu nan ngunut mu. 6 Ipatibom hanadah tataguy pangihakbatam nah ngunut mun mange ka yaden nahilong. Ya mumpongot kan mahaniyan di matam ta adim tibon di pangayam. Hinaen atom ya pangiang-angan nadan ibbam an holag Israel nah ahi maat ke dida.”

7 Ot atok am-in dadiyen kinalin APU DIOS kediyen algo an imbasket kuy ngunut ku umat hi aton di tagun mipaeh udum an boble. Ya kediyen mungkahilong ya inuwangak nan dingding di balek an in-usal kuy taklek ot lumah-unak an ihakbat ku nan ngunut ku ot mangeyak yaden ang-angonak hi tatagu.

8 Handih nabiggatana ya kimmali boh APU DIOS ke ha-on an kananay 9 “He-an tagu, deyan punmahmahan nadan ibbam an holag Israel hin tipet at-attom hidiye. 10 Kanam ke diday ‘Hituwey kanan nan Nakattag-en AP-APU: Hanan impainilak an maat ya mipanggep ke Sedekiah ad Jerusalem ya nadan aap-apu ya nadan tataguh di.’ 11 Iesplikar mun hanadah ibbam an nan inat muy kitib-an di ahi maat ke dadiyen nabatid Jerusalem, te ahida damdama mipakaan hi nunhituwan dat mipaali dah tu.

12 Takon hi Sedekiah an patul ad Jerusalem ya ihakbat nay ngunut nat idalana nah uwang nah dingding an kinapya dan dalanona. Ya adina mo tibon di pangayana te munhihhilong ya nahophopan di matana. Ya adina mo tibon di boble na. 13 Te ahik ipadpap an kay ku tawangon ta mied Babilon mu mateh din adina tibon hidiyen boble. 14 Ahik hiyyahiyyakon nadan opisyal na, guwalyana ya konsehal na mu ipaunud kuy mamaten dida.

15 Ta kediyen pangiwahitak ke didah nungkidawwin boble ya inilaon da uppen ha-oy di AP-APU. 16 Mu ahik ihwang di o-ohan didah gubat, bitil ya dogo ne kalyon da uppe nadah kon balud ke dida nadan gaga-ihon inat da ya abuluton da mon ha-oy di APU DIOS.”

17 Indani ya kimmali boh APU DIOS ke ha-on an kananay 18 “He-an tagu, munggagayonggong kan mangan ya uminum gapuh takut mun kay hidiyey poppog di nitaguwam. 19 Kalyom hanadah iIsrael ya iJerusalem an ahida munggagayonggong an mangan ya uminum gapuh takut da te ahi madadag di boble dat mama-id di limmu da gapu nadah gaga-ihon inat da. 20 Ahi matoan nadan boble ya nadan payo te miwalong da. Ta kediye ya inilaon dan ha-oy di AP-APU.”

21 Kimmali boh APU DIOS ke ha-on an kananay 22 “He-an tagu, antipet athituy kanalkalyon nadan iIsrael: ‘Mangngemangnge man di tiempo yaden ad-addi umannung nadan naabig.’ 23 Kalyom ke didah tuwen kalyok: Ha-oy an Nakattag-en AP-APU ya patikodok hinaen makalkali ta adida mo kalkalyon hidiyeh tud Israel ta hay oggan da mo kalyon ya ‘Umannung am-in di mipaabig.’ 24 Man-uke ya maid moy ahi mun-abig ya mangalkalih langkak an in-inop ad Israel. 25 Te ha-oy mo an Dios di kumalin dida ya am-in di ipaabig ku ya umannung. Ya dakayu ken makangohhe ya maat ke dakayu nadan kinalik an maat. Ha-oy an Nakattag-en AP-APU di nangalin tuwe!”

26 Indani ya kimmalih boh APU DIOS ke ha-on an kananay 27 “He-an tagu, kanan nadan tataguy ‘Makabayyag di umannungan diyen inabig na!’

28 Gapun diye ya kalyom ke didah tuwe: ‘Hanan Nakattag-en AP-APU ya hituwey kanana: Adi mo mabayag ya nunna-ud an maat di abigok. Ha-oy an Nakattag-en AP-APU di nangalin tuwe!’ ”