1 Ibaga yun APU DIOS di udan ten mahapul di intanom yu te hiyay nunlutuh kulabut an mangipaalih udan ta puppumhod di itanom yu.

2 Hanadan tatagu ya mumpabaddang da nadah dios an kinapyan di tagu yaden maid di ibaddang da. Hanadan mumpalad ya maid di hilbin di itugun da ya langkak di abigon da, athidi bo nadah mangalih kibalinan di in-inop. Kinali nadan tatagun mangulug ke dida ya umat da nadah natalak an kalneron maid di mangipattol ke dida.

3 Kanan APU DIOS di “Ha-oy an APU DIOS an Kabaelanan am-in ya namahig di boh-ol ku nadah mangipangpanguluh tataguk te adida ipaptok dida. Kinali kastiguwok dida. Mu ipaptok ku nadan tataguk an iJudah ta pumbalinok didan kay kabayun makigubat an nal-ot da. 4 Ahi malpu ke diday aap-apu, mangipangpangulu ya ap-apun di titindalu. 5 Mundodollop dan makigubat ta apputon day buhul dat pun-igatin da didan kay da pitok. Te ha-oy an DIOS ya baddangak dida ta apputon dan am-in di buhul da takon nadan numpuntakkeh kabayun buhul da.

6 Ihwang ku ya pal-otok nadan tatagud Judah ya Israel te homkok dida. Ta ianamut ku didah boble da ya donglok moy dasal dan kay ku ugge inwalong dida handi. Man-uke ya ha-oy di AP-APU an Dios da. 7 Dida an holag Israel ya mumbalin dan nakal-ot umat hi tindalu. Ya maka-an-anla dan umat dah linalakin imminum hi mainum. Ta nadan iimbabale da ya nomnomon dah tuwen nangapputan dat umamlong da damdama gapu kediyen inat ku an APU DIOS da. 8 Ayagak didan tataguk ta maamung da te ihwang ku dida ta padakkolok bo didat umat hi kinadakol da handi. 9 Takon di inwahit ku didah kabobboble ya ahiyak metlaing nomnomon ke dida nadah nidawwin boblen niayan da. Ihwang ku dida ya nadan imbabale da ta umanamut dan am-in hi boble dad Israel. 10 Ilpuk didad Egypt ya Assyria ta ianamut ku dida. Ahik padakkolon didat mapnuy boble da ingganad Gilead ya Lebanon. 11 Ahida kaya pala-uwon di namahig an ligat an umat nah nangagwatan da nah baybay te padin-ongok di dalluyun ya mag-anak di dallom nan Wangwang an Nile. Ya ahik poppogon di pun-ap-apuwan di iAssyria ya iEgypt ta adida mo mumpahhiya. 12 Pumbalinok bon ongal di kabaelan nadan tataguk ya pumbalinok didan mangun-unud ya mundayaw ke ha-on. Ha-oy an DIOS di nangalin datuwe!”