1 Dayawon takuh APU DIOS an kihikugan taku. Ikanta takuy amlong takun hiyan mangihwang ke ditaku. 2 Humgop taku nah Balenat ikanta takuy pumpasalamat taku ya hay amlong takun mundayaw ke hiya. 3 Te hi APU DIOS ya ongal di kabaelana. Hiyay Katagtag-ayan an Patul. Ya maid nadah udum an dios di miingngon hiya. 4 Hiyay Ap-apun am-in tuh luta, takon ad dalom ya nadah bibilid. 5 Ya am-in di wadah baybay ya luta ya bagina te lintuna.

6 Aga, mundukkun takut dayawon takuh APU DIOS an nunlutu ke ditaku. 7 Hiyay Dios taku ya ditakuy mialig an kalneronan ipaptok na.

Donglon yuh APU DIOS ad uwanin kananay 8-9 “Adinadaman ngohayonak. Adiyu iummat handidah aammod yun nginoheyak handi ot patnaan day ulek ke dida takon di tinibotibo day inat kun kiphodan da nah adi maboblayan ad Meribah ya Massah.* 95:8-9 Tibon yuy Hebrews 3:8, ya 3:15, ya 4:7. Ya tibon yu damdamay Exodus 17:1-7 ya Numbers 20:2-13 10 Bimmobboh-olak ke didah nap-at an toon. Kanak di: Inay mo anhan datuwen tatagu, iwalongak ke dida ya adida un-unudon di tugun ku. 11 Ot gapuh namahig an boh-ol ku ya insapatak an kanak di ‘Adida migappat nah pun-iyatuwan an indadaan kun dida.’ ”† 95:10-11 Hebrews 3:10-11 ya 4:5