1 Apu Dios, adim anhan pamgay op-opya. 2 Tibom key ngohen nadan buhul mun humihhingit ke he-a. 3 Itottool dan mumplanuh gaga-ihon aton da nadah tatagum an ipanaptok mu. 4 Kanan day “Dadagon taku nadan holag Israel ta makal-iwan dat nangamung.”

5 Ot muntotobbalan dan am-in an athidiy aton da. Ya nunhuhummangan dan miohha dan makihanggan he-a. 6 Dadiye ya tatagud Edom, Ismael, Moab, Hagrite, 7 Gebal, Ammon, Amalek, Pilistia ya Tyre. 8 Takon di iAssyria ya nakid-um dat banaddangan da nadan iAmmon ya iMoab an holag Lot.

9 Apu Dios, atom ke diday umat hi inat mu nadah tatagud Midian, ya ke Sisera ya hi Jabin nah Wangwang an Kishon an 10 dinadag mu didad Endor ot mabuluk di adol dan nah luta. 11 Ya atom damdama nadah aap-apu day umat hi inat mu ke da Oreb, hi Seeb, hi Sebah ya hi Salmunnah. 12 Diday nangalin kanan day “Pulhon takuy numboblayan nadan tatagun Apu Dios ta ibagi taku.”* 83:12 Hay ohan kibalinan nan nitudok nah Hebrew ya bokon ya abu “nadan numboblayan nadan tatagun Apu Dios,” mu “nadan pumpatulan Apu Dios.”

13 Apu Dios, iwahit mu didan umat hi dap-ul ya dugin itayyap di dibdib. 14-15 Ipatibom ke diday boh-ol mun umat hi ongngaongngal an apuy an logabonay bibilid. Ya patakutom dida gapuh boh-ol mun umat nah nakakkal-ot an puwok. 16 APU DIOS, atom di kibabainan da inggana mumpakumbaba dan he-at un-unudon daka. 17 Hana ot ta mibabain da ya tumakut da. Ya hana ot ta makastigu dat nangamung. 18 Om, atom dadiye inggana abuluton dan he-a ya abuy DIOS an Katagtag-ayan an Ap-apun am-in tuh luta.