34
Hay kantan David mipanggep handi kahin-angngowanah hinangngab Abimelek an nangitud-ak ke hiya
1 Mumpasalamatak ta nangamung ke APU DIOS ya kanalkalyok ta nangamung di kidayawana. 2 Om, hiyay dayawok ta nangamung gapuh inat na. Kal-ina ot ya donglon nadan maligatan an tatagu tun pundayaw kun hiya ta umamlong da. 3 Dayawon takuy kinatag-en APU DIOS! Dayawon taku!
4 Nundasalak ke APU DIOS ya dingngol na ot ihwangak nadah tatakutak. 5 Hanada ke tuwalin mangidinol ke hiyah ligat da ya umamlong dat adida mibabain. 6 Umat ke ha-on an handih mumpahpahmokak ke APU DIOS ya binaddanganak am-in hi ligat ku. 7 Te nadan anghel na ya guwalyaan dat ihwang da nadan makangngun-unud ke hiya.
8 Mangulug kayun APU DIOS ta gibokon yuy kaphod na. Te makulug an umamlong nan tagun mundinol ke hiya. 9 Dakayun tatagun APU DIOS, un-unudon yu hiya te idat nay mahapul am-in nadan mangun-unud ke hiya. 10 Takon nadan layon ya makudangan dah kanon da, mu nadan mangun-unud ke hiya ya adida makudangan hi mahapul da.
11 Dakayun u-unga, mundongol kayu ta tuttuduwan dakayun mangun-unud ke APU DIOS. 12 Deket pinhod yun madukdukey biyag yu ya madukdukey pun-amlongan yu 13 ya halipat-an yu ta adiyu kalyon di gaga-iho ya langkak. 14 Adiyu aton di gaga-iho, hay maphod di aton yu. Ya mahapul an malinggop di paki-ki-ayan yuh ibba yun tagu.
15 Te paka-ippaptok APU DIOS nadan maphod di pangi-ena ya donglonay dasal da. 16 Mu namahig di boh-ol na nadah gaga-ihon tatagu. Deket nate da ya makal-iwan dah gagala.* 34:12-16 Tibon yuy 1 Pedro 3:10-12
17 Adi umat nadah tatagun maphod di pangi-e dan nundadaan hi APU DIOS an mangngol hi dasal da ya nundadaan an mamaddang ke didah kumpulnan ligat da. 18 Ya alubyagona ya pakodholonay nomnom nadan maid di namnama dah biyag da.
19 Dakol di ligat an holholtapon nadan tatagun maphod di pangi-ena, mu baddangan APU DIOS didah am-in an ligat da. 20 Ya nahamad di pangipaptok nan didat maid di e magi-uh gunit da, takon di oha.
21 Mu nadan gaga-ihon tatagu ya humlun nadan aton dah katayan da. Ya nadan humihhingit nadah maphod an tatagu ya makastigu da. 22 Mu nadan makangngun-unud ya mundinol ke APU DIOS ya ihwang na dida. Maid ke didan mundinol ke hiyay adi ipaptok.