1 Hi udum hi algo ya mumbalin nan bilid an niha-adan nan Templo hi kaim-importanteyan an bilid. Ta hidiye nan am-in di tataguh kabobboble tuh luta ya ahida umeh din mundayaw. 2 Ahida kanan di “Etaku nah bilid APU DIOS ta etaku dayawon nan Dios di holag Israel nah Templona. Ta ituttudunay pinhod nan aton taku ya un-unudon taku.”

Ahida kalyon di umat hitu te hidid Jerusalem di ahi kalpuwan di tuttudun APU DIOS an mituttudu nadah tataguna.

3 Hiya boy ahi mangipanuh punhahallaan di tatagu nadah boblen ongal di kabaelana, nih-up ya nidawwi. Kediye ya adida mo mundadaan an makigubat weno munggugubat, mu pandayon day hinalung dat kapyaon dah aladu da. Ya pandayon day pahul dat kapyaon dah uwan pangaan hi haping di nitanom.* 4:1-3 Isaiah 2:2-4 4 Ta wada moy oha on malinggop an maid di takutana. Ya waday oha on waday laguntanan puntanomanah bungbunga-an umat hi grapes ya nadan kaiw an fig. Hituwey insapatan APU DIOS an Kabaelanan am-in an ahi maat. 5 Ya takon di kananat hay kinapyan di tatagun dios di dayawon am-in nadan bobleh nunlinikkod, mu ditaku ke pe ya hi APU DIOS an Dios takuy dayawon taku ya un-unudon takut nangamung.

6 Kanan APU DIOS di “Hi udum hi algo ya amungok nadan kinastiguk an tataguk an nieh udum an boble. Ipappaptok ku didan umat hi pamaptok di mumpattol nadah kalneron napilay. 7 Nakaiddawwi dah boble da ya makakkahmok da ya immo-ohha da mo. Mu ahik idatan hi ongal an kabaelan di boble da. Te ha-oy an DIOS di pumpatul dat nangamung nah Bilid an Zion.

8 Ya ha-oy an DIOS an mun-adug ke didan tataguk ad Jerusalem ya umatak nah mumpattol an pakaadduganay kalnerona ya kalyok ke dida an nan boble dad Jerusalem ya ahi bo midayaw ya hidiy ahi pun-ap-apuwan nan tudduwok an mumpatul.”

9 Dakayun iJerusalem, tipet kumga kayu ya munholholtap kayun umat kayu nah babain dandanin muntungo? Kon gapu te maid di maat di patul yu ya gapu te maid moy hilbin nadan konsehal yun kay da nate? 10 Nunna-ud an namahig di holholtapon yun iJerusalem an umat hi punholholtap di babain muntungo te pumbalinon dakayun balud nadah iBabilon. Ne mundag-udag-u kayu nah maid di boble hi pangiayan dan dakayuh boble da. Muden ahi dakayu ihwang ke APU DIOS ke dadiyen buhul yu.

11 Takon di ad uwani ya dakol di tataguh kabobboblen umabtu dan dadagon dakayu ke dadiyen buhul yu. Kanan day “Madadag kumay Jerusalem!”

12 Mu ugge inilan dadiyen tatagun hay wadah nomnom APU DIOS ya maamung da ke ya kastiguwona dida umat hi aton da nah nagapas an page nah pun-ilikan an pun-igatin da ya banakdungan da.

13 Kanan APU DIOS ke dakayuy “Umina kayun iJerusalem, eyu kastiguwon nadan buhul yu. Pal-oton dakayun ha-on umat hi kakinal-ot di bulug an bakan kay gumok di hakgud na ya kay gombang di kukub na. Ta kay yu pun-igatin dadiyen tataguh dakol an boble ta alan yuy kinadangyan dan bokon limpiyuy nalpuwanat iappit yun ha-on an Dios an Ap-apun am-in di boble tuh luta.”