1 Indani ya hinumang APU DIOS hi Job nah puwok. 2 Kananan hiyay “Tipet kahingom di kinalaing kun nalgonalgom di kanalyom? 3 Umina kat humangom di hanhanak ke he-a hin kabaelam.

4 Kon wada ka handih lintuk di kabobboble tuh luta? Kumali ka hin nakanginnila ka. 5 Dahdiy kon nomnom ot athituy kabilog di luta? 6 Dahdiy nangiha-ad hi tukud di luta? Ya dahdiy nangiha-ad nah nipab-unana 7 an kediye ya mungkankanta nadan bibittuwon ya mun-am-amlong nadan aanghel?

8 Dahdiy nangiha-ad hi koltog di danum hanadah baybay handih nakapyaana? Ha-oy! Maid di udum. 9 Ya linibbutak nan baybay hi makahdol an kulabut ot tumapol. 10 Minarkaak di poppog di baybay ot ihamad kuy dakkig na. 11 Ya kinalik nah dalluyun ta adina la-uwan nan koltog an inha-ad ku.

12 Kon wada ni-moy naminghan Job an minandalam di hilong ta mabigat weno minandalam nan algo ta tumimil? 13 Kon minandal muy pat-al ta mihinap am-in hi lutat mapoppog di gaga-ihon ma-ma-at nah tapol? 14 Deket manimil di algo nah biggatna ya maka-ang-ang moy kapkapyan di duduntug ya numpundotal. 15 Ya deket makappat-al ya adi mo mabalin an aton di tataguy gaga-ihon implanu da.

16 Kon kinabaelam an nundalan hi dallom di baybay ta tinibom di pun-otbolan di danum? 17 Ya kon tinibom nan hoob an inha-ad kuh hogpan hi boblen di nate? 18 Kon inilam hin nganney kaongal di luta? Humangonak hin inilam.

19 Ya kon inilam hin daan di kalpuwan di pat-al ya tapol? 20 Kon inilam di dalanom? Ya kon inilam hin nganney innun an umeh di? 21 Mabalin nin an kayam te lintu daka tuwali ot ahi mawadan am-in tudan wada. Ya hiniktamam am-in di nganneh diye.

22 Kon imme ka nah nangiamungak hi dalalu? 23 Indulin ku dadiye ta mausal nah tiempon di gubat ya tiempon waday gulu. 24 Daan di kalpuwan di algo ya daan di kiwahitan nan dibdib an nalpuh timilan di algo?

25 Dahdiy mangipaalih madgon udan ya dahdiy nangiha-ad hi dalan di kil-at? 26-27 Dahdiy mangipaalih udan hanadah mamagan adi maboblayan ta tummol di holok?

28 Kon waday ammod di udan ya dulnu? 29 Dahdiy ammod di dalalu 30 an dadiye nadan mangipakulhih danum hanadah wangwang ya lobong umat hi kulhin di batu?

31 Kon he-ay mangonoknong hi kadligan nadan bibittuwon umat hi Pleiades ya Orion? 32 Kon kabaelam an mangipaduttuk hi aliyan nadan naamuamung an bibittuwon nah ustun tiempo, weno em ipangulu nadan bittuwon an kanan dan bear ya nadan impana? 33 Kon maawatam di inat kut un-unudon nadan bibittuwon di pinhod kun pangayan dah kabunyan? Ya kon kabaelam an ipaduttuk di ngannen ma-ma-at hinah luta umat ke ha-on?

34 Kon mabalin an tukukam nadan kulabut ta ipaali day udan ta matina ka? 35 Ya hin kananat mandalam di kil-at ta bumudal, kon umalin he-at kananay ‘Inat kuy kinalim an atok.’ 36 Kon dahdiy nangidat hi laing ya nomnom di tagu? 37-38 Dahdiy kabaelanan mamilang ya manigging nadah kulabut ta miduyag nadan danum nah mamagan luta?

39 Kon kabaelam an ihamakan hi kanon nadan layon ya nadan impadan 40 mumpunluklukbub nah liyang weno hin wada dah muyung an numbotak? 41 Dahdiy mumpakan hanadah impan di gawwang an mumbagan ha-on hi kanon da hin naagangan da?