1 Kanan APU DIOS di “Makayun am-in an nauwo, dehtuy danum an inumon yu. Dakayun maid di pihhunan ibayad na, makayu ta umala kayuh pinhod yun kanon ta mangan kayu takon di hay gatas ya mainum. 2 Tipet eyu igastuy pihhu yu nadah adi bumhug? Tipet umahon yuy binokla yu yaden maagangan kayu metlaing? Mundongol kayun ha-on ya un-unudon yuy pinhod kun aton yu ot mialig an hidiyey makaphod an makan.

3 Aga, donglon yuh tuwe, dakayun tataguk. Umali kayun ha-on. Un-unudonak ta mawaday biyag yu. Ya makitobbalanak ke dakayuh kiphodan yun munnananong ta nangamung.* 55:3a Tibon yuy Jeremiah 31:31, 32:40 ya Hebrews 13:20. Ya bendisyonan dakayun hidiye din hinamad kun kinali ke David.† 55:3b Acts 13:34 4 Impumbalin kuh David an ap-apuh kabobboble ot gapun hiya ya nipainilah tataguy ongal an kabaelak. 5 Ad uwani ya deket ayagan yuy tataguh udum an boblen ugge nanginilan dakayu handi ya mangali dan makid-um ke dakayu! Ha-oy an AP-APU an Dios yu an makaphod an abun Dios Israel di mangat ke datuwen ipatag-e dakayu ta kidayawan yu.”

6 Deket makulug an hapulon yuh APU DIOS ya hangudon dakayun hiya te nundadaan an mamaddang ke dakayu.‡ 55:6 Tibon yuy Jeremiah 29:13-14. 7 Ya dakayun gaga-ihoy at-attona, iwalong yu nadan gaga-ihon pangi-eyu ya baliwan yuy punnomnom yu. Hi APU DIOS an Dios taku ot ya abuy pundinolan yu te hiya ya ongal di homok na ya gagaid an mangaan hi liwat.

8 Te kanan APU DIOS di “Adi umat hi punnomnom kuy punnomnom yu ya adi umat hi pangi-ek di pangi-e yu te hinnatkon di pangi-ek. 9 Umat hi kabunyan an nakattag-e mu hay luta ya athidih pangi-ek ya punnomnom kun nakattag-e mu hay pangi-e yu ya punnomnom yu.

10 Ya hay kalik ya mialig nah dalalu ya udan an mag-an malpuh kabunyan ta madanuman di luta. Patmolonay intanom ta mawaday buwa dan mitanom ya mawaday makan. 11 Athidi boy kalyok an adi mibahho nah kiatana te maat am-in nadan pinhod ku takon di daanay pangipainilaak.

12 Ahi kayu maka-an-anlan tumayan ad Babilon. Ya malinggop di pangipakaanan APU DIOS ke dakayu kediyen boble. Ta nadan bibilid ya duduntug ya kay da ikantay amlong da. Takon di kakaiw ya kay da mungkalapkap. 13 Ya mihannot di saypres ya myrtle nadah tinummolan di pagit. Hituwey ahi mangipanomnom ta nangamung nadah inat ku an AP-APU.”