1-2 Handih nunlutuwan Apu Dios hi tagu ya in-ummat nah pangi-ena. Lintuna didan lalaki ya babai* 5:1-2 Mateo 19:4, Marcos 10:6 ya binendisyonana dida ot ngadanana didah tagu. Hituwey tonton di holag Adam.

3 Handih hinggatut ta tulumpuluy toon Adam ya nahlag boh ohan lalakin nanguk-ukbun hiya ot ngadananah Seth. 4 Timmagu pay hi waluy gatut an toon ya nawada day udum an imbabalena. 5 Handih natayana ya hiyam di gatut ta tulumpuluy toona.

6 Hi Seth ya hinggatut ta limay toona ot ahi mawada nan imbabalenan hi Enos. 7 Timmagu pay hi waluy gatut ta pituy toon ot mawada day udum an imbabalena. 8 Handih natayana ya hiyam di gatut ta himpulut duway toona.

9 Hi Enos ya nahiyam di toona ot ahi mawada nan imbabalenan hi Kenan. 10 Timmagu pay hi waluy gatut ta himpulut limay toon ot mawada day udum an imbabalena. 11 Handih natayana ya hiyam di gatut ta limay toona.

12 Hi Kenan ya napituy toona ot ahi mawadah Mahalalel. 13 Timmagu pay hi waluy gatut ta nap-at an toon ot mawada day udum an imbabalena. 14 Handih natayana ya hiyam di gatut ta himpuluy toona.

15 Hi Mahalalel ya nan-om ta limay toona ot ahi mawadah Jared. 16 Timmagu pay hi waluy gatut ta tulumpuluy toon ot mawada day udum an imbabalena. 17 Handih natayana ya waluy gatut ta nahiyam ta limay toona.

18 Hi Jared ya hinggatut ta nan-om ta duway toona ot ahi mawada nan imbabalenan hi Enoch. 19 Ot tumagu pay hi waluy gatut an toon ot mawada day udum an imbabalena. 20 Handih natayana ya hiyam di gatut ta nan-om ta duway toona.

21 Hi Enoch ya nan-om ta limay toona ot ahi mawada nan imbabalenan hi Methuselah. 22 Timmagu pay hi tulun gatut an toon ot mawada day udum an imbabalena. Hiya ya nakihayyup ke Apu Dios. 23 Hay ngam-ut di toon an numbiyagana ya tulun gatut ta nan-om ta lima. 24 Kediyen numbiyagana ya maphod di nakihayyupanan Apu Dios. Indani ya mama-id te ingkuyug Apu Dios.† 5:24 Hebrews 11:5

25 Hi Methuselah ya hinggatut ta nawalut pituy toona ot ahi mawada nan imbabalenan hi Lamek. 26 Timmagu pay hi pitun gatut ta nawalut duwan toon ot mawada day udum an imbabalena. 27 Ot mate handih hiyam an gatut ta nan-om ta hiyam di toona.

28 Hi Lamek ya hinggatut ta nawalut duway toona ot ahi mawada nan imbabalenan lalaki. 29 Ya kananay “Maphod ta wada tun ungan kalpuwan di alubyag takun am-in tuh naligat an ngunu taku tuh lutan dinug-ahan APU DIOS.” Ot ngadana nah Noah. 30 Ot tumaguh Lamek hi liman gatut ta nahiyam ta liman toon ot mawada day udum an imbabalena. 31 Handih natayana ya pituy gatut ta napitut pituy toona.

32 Hi Noah ya nuntoon hi liman gatut ot ahi mawada nan tulun imbabalenan da Sem, hi Ham ya hi Japet.