1 Duwampulut limay toon Jotham handih numpatulana ot mun-ap-apud Judah hi himpulut onom di toon. Hay ngadan inana ya hi Jerushah an imbabalen Sadok. 2 Maphod di inat nan umipaamlong ke Apu Dios, umat ke amanan hi Ussiah, mu hiya ke ya ugge hinumgop hi Templon APU DIOS an munggohob hi bangbanglu. Mu nada ken tatagu ya intultuluy dan inainat di gaga-iho. 3 Impaphod Jotham nan nuntap-on Hoob nan Templon APU DIOS ya inhamad na nadan alad nah bilid ad Ophel. 4 Ya nangapyah bobboble nah mabilid ad Judah ya nangapyah nungkahamad an pungguwalyaan hanadah muyung.

5 Indani ya ginubat na nadan iAmmon ot sakuponay boble da. Ot mumbayad dah buwis ke hiyah tulun toon. Hay idat dah katootoon ya umeh opat an libun kilon silber, naliman libun sakun wheat, ya naliman libun sakun barley. 6 Numbalin an ongal di kabaelan Jotham te makangngun-unud nah AP-APU an Dios na.

7 Hanadan inainat nah nun-ap-apuwana, hay nakigubagubatana ya nadan udum an inat na ya nitudok nah Liblun Nadan Patul di Judah ya Jerusalem. 8 Duwampulut limay toona handih numpatulana ot mun-ap-apud Judah hi himpulut onom an toon. 9 Nate ot milubuk nah Boblen David ot mihannot an numpatul nan imbabalenan hi Ahas.