1 Datuwe nadan grupun naganodwaan nadan nahlag ke Aaron: hi Aaron ya waday opat an imbabalenan hi Nadab, hi Abihu, hi Eleasar ya hi Itamar. 2 Mu nate da Nadab ke Abihun maid di imbabaleda, yaden matagu pay hi amada, kinali da Eleasar ke Itamar ya ammunay numbalin an padi. 3 Binaddangan da Sadok an holag Eleasar ke Ahimelek an holag Itamar nan patul an hi David an nanganodwa nadah holag Aaron hi dakol an grupu mipuun hi natuddun ngunuwon da. 4 Hanadan holag Eleasar ya naganodwa dah himpulut onom an grupu ya nadan holag Itamar ya naganodwa dah walun grupu. Naat hituwe te dakdakol di lalakin holag Eleasar. 5 Gapu te dakol nadah holag Eleasar ke Itamar di opisyal ya mangipangpanguluh pundayawan ya impabinnunut day nanuddu hin nganney midat ke didan ngunuwon da. 6 Munhihinnannot nadan holag Eleasar ke Itamar an bumunut on inlistan nan sekretari an hi Semaiah an imbabalen Nethanel an holag Libay di natuddun ngunu da. Inat da datuweh hinangngab nan patul, nadan opisyal na, nan padin hi Sadok, hi Ahimelek an imbabalen Abiathar ya nadan mangipangpangulu nadah pamilyan di padi ya pamilyan nadan ibba dan nadan holag Libay. 7-18 Datuwey nunhahaynod nadah duwampulut opat an pamilyan nangidatan dah ngunu mipuun hi numbubunnutan da. Hay namangulu ya hi Jehoiarib ot mitun-ud da Jedaiah, da Harim, da Seorim, da Malkijah, da Mijamin, da Hakkos, da Abijah, da Jeshua, da Sekaniah, da Eliashib, da Jakim, da Huppah, da Jeshebeab, da Bilgah, da Immer, da Hesir, da Happises, da Pethahiah, da Jeheskel, da Jakin, da Gamul, da Delaiah ot da Maasiah di nanguddidi.

19 Datuwen tatagu ya nilista da mipuun hi ngunu da nah Templo ya mipuun hi pangat dah ngunun inlappun handin ammod dan hi Aaron hi nangun-unudanah tugun APU DIOS an Dios di holag Israel.

20 Datuwe nadan udum an mangipangpanguluh pamilyan nahlag ke Libay:

Hi Sebuel di mangipangpangulun hanadah holag Amram. Hi Jehdeiah di mangipangpangulun hanadah holag Sebuel.

21 Hi Issiah di mangipangpangulu nadah holag Rehabiah.

22 Hi Selomot di mangipangpangulun hanadah holag Ishar. Hi Jahat di mangipangpangulun hanadah holag Selomot.

23 Hi Jeriah di mangipangpangulun hanadah holag Hebron ya hi Amariah di mikadwa, mikatluh Jahasiel ya mikap-at hi Jekameam.

24-25 Hi Mikah di mangipangpangulu nadah holag Ussiel ya hi Samir an holag Mikah ya hi Issiah an tulang Mikah di mangipangpanguluh holag Mikah. Hi Sekariah di mangipangpanguluh holag Isshiah.

26 Da Mahli ke Mushi di mangipangpanguluh holag Merari. Hi Beno di mangipangpanguluh holag Jaasiah. 27 Hanadan imbabalen Jaasiah an hi Beno, hi Soham, hi Sakkur ya hi Ibri di mangipangpanguluh holag Merari. 28 Hi Eleasar di mangipangpanguluh holag Mahli mu maid di imbabalenan lalaki. 29 Hi Kish ya waday ohan imbabalenan lalakin hi Jerahmeel ot hiyay mangipangpangulu nadah holag na. 30 Hi Mahli, hi Eder ya hi Jerimot di mangipangpanguluh holag Mushi.

Datuwe nadan pamilyan di holag Libay.

31 Umat nadah iiba dan holag Aaron an numbubunut da damdamah hinangngab patul an hi David, hi Sadok ya hi Ahimelek ya nadan mangipangpangulu nadah pamilyan di padi ya pamilyan di iiba dan holag Libay ta inilaon da hin nganney ngunuwon da.