18 Mosestä Isrel ämawebe ŋode yäwetgän täŋkuk; Apiŋo man täwetpäŋ täwoŋärek täyat ŋo yäpmäŋpäŋ bänepjinken peŋpäŋ yäpmäŋ kuŋat täkot. Täŋpäkaŋ unita nadäŋpäŋ kuŋatta ketjinken ba damajinken däpmäŋ gatäŋpäŋ pewä kaŋ irän. 19 Ba äpetjiye nanakjiye kwikinik yotjinken itnayäŋ täkaŋken ba kädet kuŋatnayäŋ täkaŋken ba itpäŋ-nadäk tänayäŋ täkaŋken ba epän tänayäŋ täkaŋken man u yäwetpäŋ yäwoŋärek kaŋ täk täŋput. 20 Täŋkaŋ yämajin terak ba yotjin täŋo bek terak kaŋ kudän täwut. 21 Ude tänayäŋ täŋo uwä in ba äpetjiye nanakjiye kome Yawe Anutujintä orajiyeta yämikta yäŋkehärom taŋkuko ŋoken kadäni käroŋi api it yäpmäŋ kuneŋ. Kome kenta kunumtä it yäpmäŋ kudayäŋ täkamän ude api it yäpmäŋ kuneŋ.

26 Nadäkaŋ? Apiŋo kädet yarä intä yäpmäŋ daniŋpäŋ kubä iwatneŋta täwetpäŋ täwoŋärewayäŋ; Kädet kubäwä Anututä säkgämän täŋ tamikta. Täŋ kubäwä in täŋpäwakta kädet. 27 Säkgämän täŋ tamikta yäyak uwä Yawe Anutujin täŋo jukuman kädet apiŋo täwerayäŋ täyat u buramiŋpäŋ iwatnayäŋ täŋo uyaku ude api tamek. 28 Täŋ, in täŋpäwakta yäyak uwä Yawe Anutujin täŋo jukuman u mäde utpäŋ injinken gärip iwatpäŋ anutu jopi-jopi bian nämo yäniŋ oretkuŋo uken kunayäŋ täŋo uwä Anututä inken täŋpäwak u api pewän ahäwek.